Skanda Purana · Verses 5.48-2

// śrīrudra uvāca // //
aṣṭādhikaṃ vijānīhi catvāriṃśattamaṃ priye //
yasya darśanamātreṇa na bhavasya bhayaṃ bhavet

kalpāvasāne prathame pādme padmanibhekṣaṇe //
naṣṭacaṃdrārkanakṣatre naṣṭabhūmitriviṣṭape //
brahmā vai ciṃtayāmāsa kathaṃ sṛṣṭirbhavediti

ityākulitarūpasya tasya netradvayāttadā //
papātāśrukaṇaḥ sthūlo netrādvāmānmahātmanaḥ

tasmādaśrukaṇājjāto hāravonāma dānavaḥ //
tīkṣṇadaṃṣṭro mahākāyo bhinnāṃjanacayaprabhaḥ

dakṣiṇānnayanājjātaḥ kālakelītiviśrutaḥ //
kṛṣṇadeho'tidīrghaśca mahādaṃṣṭrordhvaromakaḥ

karālavadano duṣṭo yamarūpo durāsadaḥ //
kṛṣṇāṃjanacayākāraḥ pāśapāṇirvibhīṣaṇaḥ

tau tu daityau samāgatya kṛtasaṃketakau tadā //
brahmāṇaṃ haṃtumicchaṃtau pramattāvabhidhāvitau

tato brahmā bhayāviṣṭaḥ kāṃdiśīkaścacāra ha //
tato jale'tigaṃbhīre so'paśyadamitadyutim

puruṣaṃ pītavasanaṃ śaṃkhacakragadādharam //
tamālokya tato brahmā saṃtrāsaṃ paramaṃ gataḥ //
uvāca ko bhavāñchete niḥśeṣesmiṃścarācare

tamuvāca tato viṣṇurahamevaṃ jagatpitā //
lokakṛllokasaṃharttā lokasthitividhāyakaḥ

ityuktaḥ padmajastena kṛṣṇenākliṣṭakarmaṇā //
pratyuvāca tadā brahmā sraṣṭāhaṃ bhuvanatraye

mayā sṛṣṭaṃ jagatsarvaṃ sadevāsuramānuṣam //
atrāṃtare ca tau daityāvāyātau baladarpitau

bhoktukāmau kṣudhāviṣṭau dṛṣṭvā brahmābravīdidam //
kṛṣṇaṃ kamalapatrākṣaṃ kaṃpitādharapallavaḥ

yadi tvaṃ kāraṇaṃ kiṃcidasya lokasya kathyase //
tadā tāvasurau bhīmau haṃtumarhasi sāṃpratam

tacchrutvā tu tadā viṣṇurjñātvā duḥkhaṃ parasparam //
kṣaṇaṃ viśramyatāṃ tāvatpaścāddvaṃdvaṃ bhaviṣyati

ityuktvā kṛtasaṃketau tau daityau balagarvitau //
brahmanārāyaṇau haṃtuṃ dhāvitau tu tvarānvitau

brahmaviṣṇū tadā dṛṣṭvā dānavau durjayau raṇe //
saṃtrāsaṃ jagmatustatra svedakaṃpapariplutau

anyonyamūcatustau hi deśakālocitaṃ vacaḥ //
kartavyaṃ kiṃ nu vā kāryaṃ mama vā tava vā bhavet

upasthitaṃ bhayaṃ ghoraṃ tatra kiṃ kāryamasti nau //
āsannaṃ maraṇaṃ dṛṣṭvā brahmā provāca keśavam

gamyatāṃ kṛṣṇa śīghraṃ vai mahākālavanottamam //
pralaye'pyakṣayaṃ proktaṃ tatra rakṣā bhaviṣyati //
ahaṃ tatra gamiṣyāmi vraja tvaṃ tatra keśava

ityukto brahmaṇā kṛṣṇo jagāma saha tena vai //
mahākālavanaṃ prāptau na ca dṛṣṭo maheśvaraḥ //
tatrāpi daśasāhasrakālaḥ paryaṭatostayoḥ

tato jvālāmayaṃ divyaṃ nūpureśvaradakṣiṇe //
dṛṣṭvā talliṃgamāhātmyaṃ brahmaviṣṇū tataḥ svayam //
prārthayāṃcakraturdevamabhayaṃ dehi nau prabho

śaraṇaṃ bhava deveśa dānavābhyāṃ prapīḍitau //
abhayaṃ ca tato dattaṃ tena liṃgena pārvati

śuśrāva garjitaṃ tābhyāṃ dānavābhyāṃ pitāmahaḥ //
pratyuvāca bhayatrasto liṃgaṃ kaṃpitakaṃ dharaḥ

sa eṣa mṛtyurasmākameti śīghraṃ bhayāvahaḥ //
dīyatāmabhayaṃ deva kṛṣṇenoktaṃ tadā priye

bhayārttavacanaṃ śrutvā brahmaṇaḥ keśavasya ca //
tau daivau tena liṃgena jaṭhare saṃniveśitau

dṛṣṭaṃ tābhyāṃ jagatsarvaṃ sārkacaṃdramahīdharam //
sasiddhagaṃdharvakulaṃ śailatālalatākulam

samudrapīṭhasaṃyuktaṃ nānāvarṇāśramojjvalam //
sapātālatalaṃ devi sabhujaṃgamahīruham

sasaptalokavinyāsaṃ sadevāsurarākṣasam //
punastau niḥsṛtau tasmājjaṭharādvismayānvitau

dṛṣṭvau bhasmīkṛtau daityau tena liṃgena pārvati //
tuṣṭuvāte paraṃ liṃgaṃ bhaktyā paramayā yutau

liṃgenoktaṃ prasannena bhavadbhyāṃ kiṃ dadāmyaham//
mamāmoghamidaṃ devau darśanaṃ cātidurlabham

tato brahmā ca viṣṇuśca varayāmāsaturvaram //
yadi deyo varo' smākaṃ nṛṇāmabhayado bhava

ye ca tvāṃ pūjayiṣyaṃti yakṣyaṃti ca samāhitāḥ //
saṃsmariṣyaṃti satataṃ teṣāmabhayado bhave

abhayeśvarasaṃjñastu khyāto bhuvi bhaviṣyasi //
te kṛtārthā bhaviṣyaṃti ye tvāṃ paśyaṃti bhaktitaḥ

bhaviṣyati bhayaṃ naiva saṃsārapatanaṃ tathā //
dhanaputrakalatrāṇāṃ viyogo na bhaviṣyati

duḥkhitā durbhagā nārī darśanaṃ yā kariṣyati //
saubhāgyasukhasaṃyuktā bhaviṣyati na saṃśayaḥ //
vīraṃ tu gurviṇī kanyā patimāpsyati śobhanam

yaṃyaṃ kāmamabhidhyāya ye tvāṃ paśyaṃti mānavāḥ //
taṃtaṃ manorathaṃ sarvaṃ gamiṣyaṃti na saṃśayaḥ

evaṃ bhaviṣyatītyuktvā liṃgena parameśvari //
visarjitau gatau daivau brahmaviṣṇū svamālayam

eṣa te kathito devi prabhāvaḥ pāpanāśanaḥ //
abhayeśvara devasya śrūyatāṃ pṛthukeśvaram

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṃgamāhātmye'bhayeśvaramāhātmyavarṇanaṃnāmāṣṭācatvāriṃśo'dhyāyaḥ