સ્કંદ પુરાણ · શ્લોક 5.47-3

શ્રીમાર્કણ્ડેય ઉવાચ -
ગીર્વાણાશ્ચ તતઃ સર્વે બ્રહ્માણં શરણં ગતાઃ ।
ગજૈર્ગિરિવરાકારૈર્હયૈશ્ચૈવ ગજોપમૈઃ

સ્યન્દનૈર્નગરાકારૈઃ સિંહશાર્દૂલયોજિતૈઃ ।
કચ્છપૈર્મહિષૈશ્ચાન્યૈર્મકરૈશ્ચ તથાપરે

બ્રહ્મલોકમનુપ્રાપ્તા દેવાઃ શક્રપુરોગમાઃ ।
દૃષ્ટ્વા પદ્મોદ્ભવં દેવં સાષ્ટાઙ્ગં પ્રણતાઃ સુરાઃ

દેવા ઊચુઃ ।
જય દેવ જગદ્વન્દ્ય જય સંસૃતિકારક ।
પદ્મયોને સુરશ્રેષ્ઠ ત્વામેવ શરણં ગતાઃ

સોદ્વેગં ભાષિતં શ્રુત્વા દેવાનાં ભાવિતાત્મનામ્ ।
મેઘગમ્ભીરયા વાચા દેવરાજમુવાચ હ

કિમત્રાગમનં દેવાઃ સર્વેષાં વૈ વિવર્ણતા ।
કેનાપમાનિતાઃ સર્વે શીઘ્રં મે કથ્યતાં સ્વયમ્

દેવા ઊચુઃ ।
અન્ધકાખ્યો મહાદૈત્યો બલવાન્ પદ્મસમ્ભવ ।
તેન દેવગણાઃ સર્વે ધનરત્નૈર્વિયોજિતાઃ

હત્વા દેવગણાંસ્તાવદસિચક્રપરદ્દ્વિશ્વધૈઃ ।
ગૃહીત્વા શક્રભાર્યાં સ દાનવોઽપિ ગતો બલાત્

દેવાનાં વચનં શ્રુત્વા બ્રહ્મા લોકપિતામહઃ ।
ચિન્તયામાસ રાજેન્દ્ર વધાર્થં દાનવસ્ય હ

અવધ્યો દાનવઃ પાપઃ સર્વેષાં વો દિવૌકસામ્ ।
સ ત્રાતા સર્વજગતાં નાન્યો વિદ્યેત કુત્રચિત્

એવમુક્તાઃ સુરાઃ સર્વે બ્રહ્મણા તદનન્તરમ્ ।
બ્રહ્માણં તે પુરસ્કૃત્ય ગતા યત્ર સ કેશવઃ ।
તુષ્ટુવુર્વિવિધૈઃ સ્તોત્રૈર્બ્રહ્માદ્યાશ્ચક્રપાણિનમ્

દેવા ઊચુઃ ।
જય ત્વં દેવદેવેશ લક્ષ્મ્યા વક્ષઃસ્થલાશ્રિતઃ ।
અસુરક્ષય દેવેશ વયં તે શરણં ગતાઃ

સ્તૂયમાનઃ સુરૈઃ સર્વૈર્બ્રહ્માદ્યૈશ્ચ જનાર્દનઃ ।
સમ્પ્રહૃષ્ટમના ભૂત્વા સુરસઙ્ઘમુવાચ હ

શ્રીવાસુદેવ ઉવાચ -
સ્વાગતં દેવવિપ્રાણાં સુપ્રભાતાદ્ય શર્વરી ।
કિં કાર્યં પ્રોચ્યતાં ક્ષિપ્રં કસ્ય રુષ્ટા દિવૌકસઃ

કિં દુઃખં કશ્ચ સંતાપઃ કુતો વા ભયમાગતમ્ ।
કથયન્તુ મહાભાગાઃ કારણં યન્મનોગતમ્

પરાભવઃ કૃતો યેન સોઽદ્ય યાતુ યમાલયમ્ ।
એવમુક્તાસ્તુ કૃષ્ણેન કથયામાસુરસ્ય તત્

દર્શયન્તઃ સ્વકાન્દેહાન્ લજ્જમાના હ્યધોમુખાઃ ।
હૃતરાજ્યા હ્યન્ધકેન કૃતા નિસ્તેજસઃ પ્રભો

પિતેવ પુત્રં પરિરક્ષ દેવ જહીન્દ્રશત્રું સહ પુત્રપૌત્રૈઃ ।
તથેતિ ચોક્તઃ કમલાસનેન સુરાસુરૈર્વન્દિતપાદપદ્મઃ

શઙ્ખં ચક્રં ગદાં ચાપં સંગૃહ્ય પરમેશ્વરઃ ।
ઉત્થિતો ભોગપર્યઙ્કાદ્દેવાનાં પુરતસ્તદા

શ્રીવાસુદેવ ઉવાચ -
પાતાલે યદિ વા મર્ત્યે નાકે વા યદિ તિષ્ઠતિ ।
તં હનિષ્યામ્યહં પાપં યેન સંતાપિતાઃ સુરાઃ

સ્વં સ્થાનં યાન્તુ ગીર્વાણાઃ સંતુષ્ટા ભાવિતૌજસઃ ।
વિષ્ણોસ્તદ્વચનં શ્રુત્વા બ્રહ્માદ્યાસ્તે સવાસવાઃ

સ્વયાનૈસ્તુ હરિં નત્વા હૃદિ તુષ્ટા દિવં યયુઃ

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે ગીર્વાણસ્વર્ગમનવર્ણનં નામ સપ્તચત્વારિંશોઽધ્યાયઃ ॥