Skanda Purana · Chapter 5.45

// sanatkumāra uvāca // //
śṛṇuṣvāvahito vyāsa kathāṃ pāpaharāṃ parām //
eṣā kumudvatī jātā yathā padmāvatī purī //
tathāhaṃ saṃpravakṣyāmi yathā me lomaśo'bravīt

// lomaśa uvāca // //
śṛṇu vatsa mayā dṛṣṭā bahupuṇyatamā purī //
ekadā tīrthayātrāyāṃ gato'haṃ vai kuśasthalīm //
guhyādguhyataraṃ sthānaṃ yatra saṃnihito haraḥ

yasya darśanamātreṇa brahmahatyāṃ vyapohati //
yatra tatra sthitā viprā brahmaghoṣamakurvata

yajñāṃścaiva tathā citrānṛtvijodārakarmaṇaḥ //
ṛṣayaśca mahābhāgāḥ prakurvaṃti samāhitāḥ

ṛṣipatnyastathā sādhvyaḥ paricaryāṃ prakurvate //
daśa viṣṇusamāḥ khyātāstatraiva nivasaṃti te

rudrā hyekādaśa proktā dvādaśārkāstathaiva ca //
aṣṭau ca vasavaḥ khyātā viśve devāstrayodaśa

aṣṭau ca diggajāścaiva manavaśca caturdaśa //
marudgaṇāśca te sarve tatraiveṃdrapurogamāḥ

gaṃdharvāsarasaścaiva kiṃnaroragarākṣasāḥ /
siddhāstapasvino vatsa tatraiva samupasthitāḥ

aṣṭau vai bhairavāḥ khyātāścatvāraḥ pavanātmajāḥ //
vināyakāśca ṣaṭ proktā devyaśca caturviṃśatiḥ //

ete devagaṇāḥ proktā raudrāścaiva tathā gaṇāḥ //
brahmā vedavidāṃ śreṣṭho maricikaśyapādayaḥ

dakṣaḥ prajāpatiśreṣṭho ditirvai devamātaraḥ /
surabhīpramukhā gāvaḥ sthāvarāṇi carāṇi ca

tīrthāni yāni sarvāṇi nadyaḥ prasravaṇāni ca //
kṣetrāṇi caiva sarvāṇi bhuvi puṇyatamāni vai

sapta puryastrayo grāmā navāraṇyā navoṣarāḥ //
caturdaśāni guhyāni muktidvārāṇi bhūtale

samudrāścaiva catvāro ratnāni vividhāni ca //
satī pativratāḥ sādhvyastathā brahmarṣayo'malāḥ //
rājarṣayastathā śāṃtā brāhmaṇā vedapāragāḥ

vedāḥ purāṇasmṛtayo gāthā gītiprahe likāḥ //
upāsāṃcakrire tasya devadeveḍumāpateḥ

tasya darśanamātreṇa jāto'haṃ vijvaro'malaḥ //
dīrghāyurdīrghatapasā jarārogavivarjitaḥ

snāto'haṃ sarvatīrtheṣu śucirbhūtvā samāhitaḥ //
prasannamānaso jātaḥ sarvapāpaparāṅmukhaḥ

dṛṣṭvā padmāvatīṃ śuddhāṃ sarvakāmavarapradām //
na yatra dṛśyate kaścicchokarogaparo janaḥ

na duḥkhī na ca dāridro na mūrkho nājiteṃdriyaḥ //
parasparavirodhī na nṛtiryyakṣu ca dṛśyate

anyonyaṃ sarvamitrāṇi anyonyaṃ copakāriṇaḥ //
sarve dāṃtāśca śāṃtāśca sarve vidyopadeśinaḥ

udyānāni ca ramyāṇi vanānyupavanāni ca //
harmyāṇi ca suśubhrāṇi śreṇībaddhāni bhāṃti vai

nānāratnasamākīrṇairhemakuṃbhaiḥ suśobhanaiḥ //
virājaṃte vicitrāṇi gītavādyamahotsavaiḥ

sadaiva vasate yatra umayā saha śaṃkaraḥ //
caṃdracūḍaḥ kṛttivāsāścitābhasmāṃgalepanaḥ

caṃdrajyotsnākalāpūrṇamarīcibhiḥ sadā babhau //
yatra no kṛṣṇapakṣo'bhūnnāmāvāsyā na vai tamaḥ

sadaiva puṣpitā śyāmā bālyarūpavatī yathā //
harmyapṛṣṭhe gavākṣe ca dvārājiragṛhāṃtare

girigahvarakuṃjeṣu guhādhvāṃtāṃtareṣu ca //
āśrameṣu ca ramyeṣu vaneṣūpavaneṣu ca

gṛhadīrghikāsu ramyāsu śālāmālāsu sarvataḥ //
caṃdrajyotsnāsamāpūrṇā dṛśyaṃte dhavalā diśaḥ

kumudvatīpraphullāni virājaṃte sarāṃsi ca //
jyotirgaṇasamākīrṇaṃ śaradīva nabhaḥsthalam

nadyaḥ sarāṃsi sarvāṇi vāpīkūpasupalvalāḥ //
kumudvatyā samākīrṇā āsīccāṃdramasī mahī

yasmātsarveṣu kāleṣu praphullā ca kumudvatī //
tasmātpadmāvatī hyeṣā jātā kumudvatī purī

kumudvatyāṃ narā ye tu śrāddhaṃ kuryuḥ samāhitāḥ //
na teṣāṃ pitaraḥ svargāccyavaṃte hi kadācana

akṣayaṃ labhate śrāddhaṃ pitṝṇāṃ dattamakṣayam //
snānaṃ dānaṃ tathā homo devatārādhanaṃ tathā

yatkiṃcitkriyate karma tatsarvaṃ cākṣayaṃ bhavet //
evaṃ kumudvatī jātā purī vyāsa sanātanī

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe'vantīkṣetramāhātmye kumudvatīprabhāvakathanaṃnāma pañcacatvāriṃśo'dhyāyaḥ