Skanda Purana · Verses 5.45-2

// śrīdevadeva uvāca / //
paṃcacatvārikaṃ viddhi devaṃ trilocaneśvaram //
yasya darśanamātreṇa sarvasiddhiravāpyate

itihāsamihāsīdyatpīṭhe virajasaṃjñake //
trilocanasya prāsāde maṇimāṇikyanirmite

nānābhaṃgigavākṣāḍhye ratnasānāvivāpare //
dedīpyamānasauvarṇakalaśena virājite //

pārvaṇena śaśāṃkena khedādiva samāsite //
tatra pārāvatadvaṃdvaṃ vasatsvairaṃ kṛtālayam

prātaḥ sāyaṃ ca madhyāhne kurva nnityapradakṣiṇam //
uḍḍīyamānaṃ paritaḥ pakṣavātairitastataḥ

rajaḥprāsādasaṃlagnaṃ dūrīkurvaddiśo daśa //
trilocaneti satataṃ nāma bhaktairudāhṛtam //
triviṣṭapeti ca tathā tayoḥ karṇātithībhavet

caturvidhāni vādyāni śaṃbhuprītikarāṇyalam //
tayoḥ karṇaguhāṃ prāpya pratiśabdaṃ pratanvate

maṃgalārātrikajyotistrisaṃdhyaṃ pakṣiṇostayoḥ //
netrāṃtaṃ nirviśannityaṃ bhaktaceṣṭāṃ pradarśayat

prāṇayātrāṃ vihāyāpi kadācitsthiramānasau //
noḍḍīya vāṃchitaṃ yātaḥ paśyaṃtau kautukaṃ khagau

tatrāsakṛjjanākīrṇaṃ prāsādaṃ parito'vanau //
taṃḍulādi caraṃtau tau kurvaṃtau ca pradakṣiṇam

devadakṣiṇadigbhāge viṣṇudehodbhavaṃ jalam //
tṛṣārttau pibato nityaṃ snātvā cājagmatuśca tau

tayoritthaṃ vicaratostrilocanasamīpataḥ //
agādbahutithaḥ kālo dvijayoḥ sādhuceṣṭayoḥ

atha devālayaskaṃdhe gavākṣāṃtargatau ca tau//
śyenena kenaciddṛṣṭau krūradṛṣṭyā sukhaṃ sthitau

tacca pārāvatadvaṃdvaṃ śyenaḥ parijighṛkṣayā //
avatīryāṃbarādāśu upaviṣṭaḥ śivālaye

tato vilokayāmāsa tadāgamavinirgamau //
kena mārgeṇa viśato durgameṇa patatriṇau

kenādhvanā ca niryātaḥ kiṃkāle kurutaśca kim //
kathaṃ yugapadetau me grāhyau svairaṃ bhaviṣyataḥ

durbalo'pyākalayituṃ sahasārirna śakyate //
kariṇāṃ ca sahasreṇa varāśvānāṃ ca lakṣataḥ

na karma siddhyennṛpaterdugeṇaikena yadbhavet //
durgastho nābhibhūyeta vipakṣaḥ kenacitkvacit//
svataṃtraṃ yadi durgaṃ syādapamārgaprakāśakam

iti durge balaṃ śaṃsañchyeno roṣāruṇekṣaṇaḥ //
asādhvasau kalaravau vīkṣya yāto nabhoṃgaṇe

atha pārāvatī dakṣā vipakṣakṣapaṇekṣaṇam //
mahābalaṃ durgabalātprāha pārā vataṃ patim

// kalaravyuvāca // //
priya pārāvata prājña sarvakāmasukhārava //
tava dṛgviṣayaṃ prāptaḥ śyeno'yaṃ prabalo ripuḥ

sa ca tadvākyamākarṇya pārāvatyāśca satpatiḥ //
pārāvatīmuvācedaṃ kā ciṃteti tava priye

pārāvata uvāca // //
kati nāma na saṃtīha subhage vyomacāriṇaḥ //
kati devālayādyeṣu khagā nopavasaṃti hi

kati caiva na paśyaṃti nau sukhasthāviha priye //
tebhyo yadīha bhetavyaṃ kuto nau tatsukhaṃ priye

rama tvaṃ ca mayā sārddha tyaja ciṃtāmimāṃ śubhe //
asya śyenavarākasya gaṇanāpi na me hṛdi

itthaṃ pārāvatavarācchutvā pārāvatī vacaḥ //
maunamālambya saṃtasthe patyuḥ pādārpitekṣaṇā

hitavatyopadiśyāpi priyaṃ priyacikīrṣayā //
patnyā joṣaṃ samāstheyaṃ kāryaṃ patyurvacaḥ sadā

anyedyurapyathāyātaḥ śyenaḥ paśyansa daṃpatī //
aparicchinnayā dṛṣṭyā yathā mṛtyurgatāyuṣam

atha maṃḍalagatyā sa prāsādaṃ parito bhraman //
provāca preyasī nātha dṛṣṭo duṣṭastvayā'hitaḥ

tasyā vākyaṃ samākarṇya punaḥ kalaravo'bravīt //
kiṃ kariṣyatyasau mugdhe mama vyomavihāriṇaḥ

durgaṃ ca svargatulyaṃ me yatra nāstyarito bhayam //
ayaṃ na tāṃ gatiṃ vetti yāṃ vedāhaṃ nabhoṃgaṇe

praḍīnoḍḍīnasaṃḍīnakāṃḍavyāṃḍakapāṭikā //
sraṃsinī maṃḍalavatī gatayo'ṣṭāvudāhṛtāḥ

yathaitāsu hi kauśalyaṃ mayi varttati ca priye //
gatiṣu kvāpi kasyāpi pakṣiṇo na tathāṃbare//
sukhena tiṣṭha kā ciṃcā mayi jīvati te priye

iti tadvacanaṃ śrutvā āsthitā mūkavatsatī//
aparedyurapi śyenastatrāyātaḥ śilātale//
kiyadaṃtaramāsādya upaviṣṭo'tihṛṣṭavat//
āyāmāṃte ca sa sthitvā tatkulāyakulasya ca/३५//
punaḥ śyeno viniryātaḥ sāpi kāṃtā'bravītpunaḥ//
priya sthānamidaṃ tyājyaṃ duṣṭadṛṣṭividūṣitam

asau krūro'tinikaṭamupaviṣṭo'tihṛṣṭavat//
sāvajñaṃ sa punaḥ prāha kiṃ kariṣyatyasau priye

mṛgākṣīṇāṃ svabhāvoyaṃ prāyaśo bhīruvṛttayaḥ //
itaredyurapi prāptaḥ sa ca śyeno mahābalaḥ //

tayorabhimukhaṃ tatra sthito yāmadvayāvadhi //
punarvilokya tadvartma śīghraṃ yāto yathāgatam

gatetha śakunau tasminsā babhāṣe vihaṃgamam//
nātha sthānāṃtaraṃ yāvo mṛtyurvai nikaṭe'nvagāt

punardṛṣṭe praṇaṣṭaḥ syādāvāsaśca sukhaṃ priya //
priya yasyāsti pakṣasya gatiḥ sarvatra siddhidā

sa kiṃ svadeśarāgeṇa nāśaṃ prāpnoti buddhimān //
sopasargaṃ nijaṃ deśaṃ tyaktvā yonyaṃ tu na vrajet

sa paṃgurnā śamāpnoti kūlasthita iva drumaḥ //
priyoditaṃ niśamyeti sa bhavitrīdaśārdditaḥ

tāṃ vākyaṃ punarapyāha priye mā bhaiḥ khagārditā //
aparasminnahani ca sa śyenaḥ prātareva hi

taddvāradeśamāsādya sāyaṃ yāvatsthito'calaḥ //
astācalasya śikharaṃ yāte bhānau gate khage

kulāyādbāhyamāgatyovāca pārāvatī patim //
nātha nirgamanasyāyaṃ kālaḥ kālo'sti dūrataḥ

yāvattāvadviniryāhi tyaktvā māmapi śaṃsinīm //
tvayi jīvati duṣprāpyaṃ na kiṃcijjagatītale

punardārāḥ punaḥ putrāḥ punarvasu punargṛham //
yadyātmārakṣitaḥ puṃsāṃ dāraipi dhanairapi

tadā sarvaṃ hariścaṃdrabhūpateriva labhyate //
ayamātmā priyo baṃdhurayamātmā mahaddhanam

dharmārthakāmamokṣāṇāmayamātmārjakaḥ paraḥ //
yāvadātmani vai kṣemaṃ tāva tkṣemaṃ jagattraye

so'pi kṣemaḥ sugatinā yaśasā saha vāṃchyate //
yaśohīnaṃ tu yatkṣemaṃ takṣemānnidhanaṃ varam

tadyaśaḥ prāpyate puṃbhirnītimārgaṃ pravartibhiḥ //
ato nītipathaṃ ciṃtyaṃ nātha sthānādito vraja//
na vrajiṣyasi cetprātastato māṃ saṃsmariṣyasi

ityukto'pi sa vai patnyā pārāvatyā sumedhayā //
na niryayau tataḥ sthānādbhavitryā prativāritaḥ

athoṣasi samāgatya śyenena balinā tadā //
nirgamadvāramāruddhaṃ kiṃcidbhakṣya vatā tadā

dināni katicittatrātiṣṭhacchayeno mahābalaḥ //
pārāvatamuvācedaṃ dhiktvā pauruṣavarjitam

kiṃ vā yudhyasva durbuddhe kiṃ vā niryāhi me girā //
kṣudhākṣīṇo mṛtaḥ paścānnirayaṃ paśyasi dhuvam //
vidhireva hi sāhāyyaṃ na kuryāttava noditam

itthaṃ śyenena sa proktaḥ patnyā sa sahitaḥ khagaḥ //
ayudhyattena śyenena svadurgadvāramāśritaḥ

kṣudhitastṛṣitaḥ so'tha śyenena balinā dhṛtaḥ //
caraṇena dṛḍhenāśu caṃcvā sāpi dhṛtā khagī

tāvādāyoḍḍayāṃcakre śyeno vyomani satvaram //
ciṃtayanbhakṣaṇasthānamanyatpakṣivivarjitam

atha patnyā kalaravaḥ proktastatra sumedhayā//
yato'vamānitā nātha tvayāhaṃ strīti buddhitaḥ

ato'vasthāmimāṃ prāptaḥ kiṃ kuryāmabalā yataḥ//
adhunāpi vacaścaikaṃ karoṣi yadi me priya

tadā hitaṃ te vakṣyāmi kurve tadavicāritam //
mamaikavākyakaraṇātstrījito na bhaviṣyasi

yāvadāsyaṃ gatāsmyasya yāvatkhastho na bhūmigaḥ //
tāvadātmavimuktyai tvaṃ caṃcvā pādaṃ dṛḍhaṃ daśa

iti patnīvacaḥ śrutvā tathā sa kṛtavānkhagaḥ //
sa pīḍito dṛḍhaṃ pāde śyenaścītkṛtavānbahu

tena cītkaraṇenātha muktā sā mukhasaṃpuṭāta //
pādāṃgulīnāṃ śūnyatve so'pi pārāvato'patat //

vipadyapi ca prājñairna saṃtyājyaḥ kvacidudyamaḥ //
kva ca caṃcupuṭastasya kva ca tatpādapīḍanam

kva ca dvayostathābhūtaṃ dūre mokṣaṇamadbhutam//
durbale'pyudyamaḥ śreyāniti śāstreṣu gīyate

tasmādbhāgyānusāreṇa phalatyeva sadodyamaḥ //
praśaṃsaṃtyudyamaṃ cāto vipadyapi manīṣiṇaḥ

/
atha tau kālayogena jaṃbūmārge mṛtau tadā //
jaṃbūmārge mṛtā ye vai teṣāṃ svargaḥ sadā'kṣayaḥ

puṇyaśeṣe tadā jāto gaṃdharvatanayaḥ śubhaḥ //
maṃdāradāmatanayo nāmnā parimalālayaḥ

anekavidyānilayaḥ kalākauśalabhājanam //
kaumāraṃ vapurāsādya śivabhaktiparo'bhavat

niyamaṃ cāpi jagrāha vijitedriyamānasaḥ ///
ekapatnīvrataṃ nityaṃ cariṣyāmīti niścitam

parayoṣitsamāsaktirāyuḥ kīrtiṃ rbalaṃ sukham //
haretsvargagatiṃ cāpi tasmāttāṃ varjayetsudhīḥ

aparaṃ cāpi niyamaṃ sa śuciṣmānsamādade //
gatajanmāṃtarābhyāsāvilocanasamāśrayāt

/
samastapuṇyanilayaḥ samastārthaprakāśakaḥ //
samastakāmajanakaṃ parānaṃdaikakāraṇam

yāvaccharīraṃ nirujaṃ yāvannedriyaviplavaḥ //
tāvattrilocanovaṃtyāṃ maṃtavyo nātra saṃśayaḥ

itthaṃ maṃdāradāmiḥ sa kāśyāṃ parimalālayaḥ //
nityaṃ triviṣṭapaṃ draṣṭuṃ samāgacchetprayatnataḥ

pārāvatyapi saṃjātā ratnadīpasya maṃdire //
nāgarājasya pātāle nāmnā ratnāvalīti ca

samastanāgakanyānāṃ rūpaśīlakalāguṇaiḥ //
ekaiva ratnabhūtā''sīdratna dīporagātmajā

tasyāḥ sakhīdvayaṃ cāsīdekā nāmnā prabhāvatī //
kalāvatī tathānyā ca nityaṃ tadanuge śubhe

svadehādanapāyinyau chāyākāṃtī yathā tathā //
pūrve sakhyau bhavetāṃ hi ratnāvalyā maheśvari

sā tu bālye vyatikrāṃte kiṃcidudbhinnayauvanā //
śivabhaktaṃ sva pitaraṃ dṛṣṭvā niyamamagrahīt

pitastrilocanaṃ kāśyāmarcayitvā dinedine //
ābhyāṃ sakhībhyāṃ sahitā maunaṃ tyakṣyāmi nānyathā //

evaṃ nāgakumārī sā sakhīdvayasamanvitā //
trilocanaṃ samabhyarcya gṛhānaharaharvrajat

māṃ pratyagraiḥ sukusumaiḥ suśubhairi ṣṭagaṃdhibhiḥ //
suvicitrāṇi mālyāni pariguṃphyārcayedvibhum

tisro'pi gītaṃ gāyaṃti lalitaṃ caiva susvaram //
nārīmaṃḍalabhedena lāsyaṃ tisro'pi rvate

vīṇāveṇumṛdaṃgāṃśca layatālavicakṣaṇāḥ //
vādayaṃti mudāyuktāstisro'pi viramaṃti vai

itthamārādhayaṃtīśaṃ tisro nāgakumārikāḥ //
vicitrabhaṃgīmālābhirarcayaṃtyastrilocanam

prātaścaturthyāṃ tāḥ snātvā tīrthe pilipile śubhe //
trilocanaṃ samarcyātha prasuptā raṃgamaṇḍape

suptāsu tāsu sa śivastrinetraḥ śaśibhūṣaṇaḥ //
vāmārddhavilasacchaktirnāgayajñopavītakaḥ

liṃgādeva hi nirgatya gaṃgāpannagamekhalaḥ //
pratyuvāca tataḥ kanyā vibhuruttiṣṭhateti saḥ

utthāya tā vinirmathya locane śrutisaṃgame //
aṃgamoṭanavatyaśca tadā nirghūrṇitekṣaṇāḥ

yāvatpaśyaṃti purataḥ saṃbhramāpannamānasāḥ //
atarkitāgamastāvattābhirdṛṣṭastrilocanaḥ

vavaṃdire'tha tā bālā jñātvā lakṣmabhirīśvaram //
tuṣṭuvuśca prahṛṣṭāstāḥ sannakaṃṭhyo'tiviklavam

jaya śaṃbho jayeśāna jaya sarvaga sarvada //
jaya tripurasaṃhartarjayāṃdhakaniṣūdana

jaya jālaṃdharahara jaya kaṃdarpadarpahṛt //
jaya trailokyajanaka jaya trailokyavaṃdita //
jaya bhaktajanādhīśa jaya pramatha nāyaka

namastubhyaṃ namastubhyaṃ namastubhyaṃ namonamaḥ //
trilocana namastubhyaṃ triviṣṭapa namo'stu te

ityuktvā daṃḍavadbhūmau praṇipetuḥ kumārikāḥ //
athotthāpya kumārīstāḥ provāca śaśibhūṣaṇaḥ

suto maṃdāradāmnaśca nāmnā parimalālayaḥ //
patirvidyādharavaro bhavatīnāṃ bhaviṣyati

ciraṃ vidyādhare loke bhogānbhuktvā samaṃtataḥ //
tato hyavaṃtikāṃ prāpya māṃ dhyātvā siddhimāpsyatha

janmāṃtarepi me bhaktirbhavatībhiśca tena ca //
vihitā tena vo janma nirmalaṃ bhaktibhāvitam

etatprabhāvatīstotraṃ ye paṭhiṣyaṃti me puraḥ //
tebhyaḥ kāmānpradāsyāmi bhavatīnāmayaṃ varaḥ

ityuktavati deveśe tāḥ kanyā hṛṣṭamānasāḥ //
praṇamya procurīśānaṃ prabaddhakarasaṃpuṭāḥ

//
// nāgakanyā ūcuḥ //
pṛcchāmo brūhi no nātha karuṇākara śaṃkara //
janmāṃtare kathaṃ sevā caturbhirbhavataḥ kṛtā

tataḥ prāktanavṛttāṃta metasyāpi kṛtātmanaḥ //
asmākamapi cākhyāhi kṛpāṃ kuru kṛpānidhe

iti śrutvā praṇayato bālodīritamīpsitam //
provāca tāsāmapi ca bhavāṃtaraviceṣṭitam

// īśvara uvāca // //
śṛṇudhvaṃ nāgatanayāstisropi hi samāhitāḥ //
prāgbhavaṃ bhavatīnāṃ ca tasyāpi kathayāmyaham

eṣā ratnāvalī pūrvamāsītpārāvatī khagī //
sa ca vidyādharavaraḥ patirasyāḥ khago'bhavat

prāsāde ca mamaitābhyāmuṣitaṃ suciraṃ sukham//
rajaḥ prāsādasaṃlagnaṃ nunnaṃ pakṣānilaiḥ punaḥ

upariṣṭādadhastācca kṛtā bhūripradakṣiṇāḥ //
vyomni saṃcaramāṇābhyāṃ saṃcīrṇaṃ ca mamājire

snātaṃ caturnade tīrthe pītaṃ tatrāṃbu cāsakṛt //
ābhyāṃ kalaravābhyāṃ ca kṛtāḥ kalaravā mudā

etābhyāṃ sthiracittābhyāṃ muditā tvamatīva hi //
dṛṣṭvā hi kautukānyatra mama bhaktaiḥ kṛtānyapi

amūbhyāṃ bahuśo dṛṣṭā mama maṃgaladīpikāḥ //
pītaṃ śrutipuṭābhyāṃ ca mama nāmākṣarāmṛtam //
tiryagyoniprabhāvena na mṛtau mama saṃnidhau

jaṃbūmārge mṛtau yasmātsvargaprāptikare dhruvam //
tasmātpārāvatī hyeṣā ratnadīpasutā'bhavat

patiḥ pārāvato'syāśca jāto vidyādharāṃgajaḥ //
eṣā prabhāvatī nāgī nāgarājasya sadmani //
iha janmani kanyāsītpūrvajanma bravīmi ca

triśikhasyorageṃdrasya sutā ceyaṃ kalāvatī //
etasyā api vṛttāṃtaṃ niśāmaya tu vacmyaham //

bhavāṃtare tṛtīyetaḥ kanye cārāyaṇasya ca //
āstāṃ maharṣeḥ śīlāḍhye premavatyau parasparam

pitrā cārāyaṇenāpi tābhyāṃ saṃpreritena vai //
āmuṣyāyaṇaputrāya datte nārāyaṇāya hi

aprāptayauvanoraṇye samidāharaṇāya vai //
gato vidhivaśāddaṣṭo daṃdaśūkena kānane

bhavānīgautamīnāmnyau te tu cārāyaṇāṃgaje //
vaidhavyaduḥkhamāpanne dainyagraste babhūvatuḥ

ata eva prayatnena pariṇetā vivarjayeta //
devatāsaridāhvānakanyāpāṇigrahaṃ sudhīḥ

atharṣeḥ kasyaciddaivādāśrame devasannibhe //
raṃbhāphalānyadattāni mohājjagrahatustadā //

kṛtvā nānopavāsādivratāni brāhmaṇāṃgaje //
adhyāsya nidhanaṃ kālācchākhāmṛgyau babhūvatuḥ

phalacauryavipākena vānara tvaṃ tayorabhūt //
śīlarakṣaṇabhāvenāvaṃtyāṃ janimavāpatuḥ

sa ca nārāyaṇo vipraḥ pitṛśuśrūṣaṇe rataḥ //
daṣṭo'pi daṃdaśūkena kāśyāṃ pārāvato bhavata

evaṃ bhavāṃtare cāsīdetayoḥ patireva saḥ //
tisṛṇāṃ bhavatīnāṃ ca bhāvī bhartā punaḥ sa vai

prāsādasyāpi pārśve tu nyagrodhaśca mahānagaḥ //
tasmiñchākhini vāsāḍhye śākhāmṛgyo babhūvatuḥ

viṣṇudehajale tīrthe krīḍayā ca mamajjatuḥ //
papatuścāpi pānīyaṃ tasmiṃstīrthe tṛṣāture

jātisvabhāvacāpalyātkīḍaṃtyau ca pradakṣiṇam //
cakraturbahukṛtvaśca liṃgaṃ dadṛśa turbahu

vicaraṃtyāvitaḥ svairaṃ tatra nyagrodhasaṃnidhau //
kenacidyogaveṣeṇa pāśena ca niyaṃtrite

bhikṣārthaṃ śikṣite tena na plutirna nivarttanam //
atha te kvāpi markaṭyau kāladharmavaśaṃgate

avantīvāsapuṇyena trilocanasya sevayā //
prādakṣiṇyānurūpeṇa jāte nāgasute api

adhunā taṃ patiṃ prāpya vidyādharakumārakam //
nirviśya svargabhogāṃścāvaṃtyāṃ nirvṛtimāpsya

yairalpamapi cāvaṃtyā kṛtaṃ karma śubhāvaham //
tasya mokṣaḥ parīpāko niścitaṃ madanugrahāt //
trailokye'pi ca sarvasmiñchreṣṭhā'vantīpurī sadā

tato'pi liṃgamoṃkāraṃ tato'pyatra trilocanam //
tiṣṭhagāno'tra liṃge'haṃ bhuktiṃ muktiṃ dadāmi vai

ataḥ sarvaprayatnenāvantyāṃ pūjyastrilocanaḥ //
ityuktvā devadeveśastatprāsādāṃtare'viśat

liṃgasvarūpamāsādya śubhaṃ tribhuvanādapi //
tāśca svasadanaṃ prāpya tadvṛttāṃtamaśeṣataḥ //
svamātuḥ purataścoktvā kṛtakṛtyā ivābhavan

ekadā mādhave māsi saha sārthāḥ samāgatāḥ //
vidyādharāstathā nāgā militāḥ saparicchadāḥ

virajaske mahākṣetre trilocanasamīpataḥ //
devasya varadānācca pṛṣṭvānyonyaṃ kulāvalim

vidyādharāya tāḥ kanyā nāgaistisro'pi kalpitāḥ //
maṃdāradāmā santuṣṭaḥ prāpya tacca snuśatrayam

ratnadīpaiśca nāgendraḥ padmī ca bhujageśvaraḥ //
viśikho'pi phaṇīṃdraśca hṛṣṭā ete trayo'pi ca //
jāmātaraṃ samāsādya śubhaṃ parimalālayam

anyo'nyaṃ svajanāste tu mudā vikasitekṣaṇāḥ //
vivāhotsavamāracya svaṃsvaṃ bhavanamāviśan

trilocanasya liṃgasya varṇayaṃto'pi gauravam //
sa ca vidyādharaḥ śrīmānnāgībhirvipulaṃ sukham //
bhuktvāvantīṃ tataḥ prāpya saṃsevya ca trilocanam

gāyangītaṃ sumadhuraṃ nāgībhiḥ sahitaḥ kṛtī //
ātmānaṃ cātivismṛtya madhyeliṃgaṃ layaṃ gataḥ

trilocanasya mahimā kalau devena gopitaḥ //
tatolpasattvā manujā na tallimagamupāsate

trilocanakathāmetāṃ śrutvā pāpānvito'pyaho //
vipāpo jāyate martyo labhate ca parāṃ gatim

eṣa te kathito devi prabhāvaḥ pāpanāśanaḥ //
trilocanasya devasya śṛṇu vīreśvaraṃ param //

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṃgamāhātmye trilocanamāhātmyavarṇanaṃnāma paṃcacatvāriṃśo'dhyāyaḥ