Skanda Purana · Verses 5.44-3

śrīmārkaṇḍeya uvāca -
tīrthānāṃ paramaṃ tīrthaṃ tacchṛṇuṣva narādhipa /
revāyā dakṣiṇe kūle nirmitaṃ śūlapāṇinā

mokṣārthaṃ mānavendrāṇāṃ nirmitaṃ nṛpasattama /
yudhiṣṭhira uvāca -
śrutā me vividhā dharmāstīrthāni vividhāni ca /
dānadharmāḥ samastāśca tvatprasādāddvijottama

anyacca śrotumicchāmi saṃsāraśchidyate yathā /
punarāgamanaṃ nāsti mokṣaprāptirbhavedyathā

etadākhyāhi me sarvaṃ prasādāddvijasattama

mārkaṇḍeya uvāca -
śṛṇuṣvaikamanā bhūtvā tīrthāttīrthāntaraṃ mahat /
śrute yasya prabhāve tu mucyate cābdikādaghāt

vācikairmānasairvāpi śārīraiśca viśeṣataḥ /
kīrtanāttasya tīrthasya mucyate sarvapātakaiḥ

pañcakrośapramāṇaṃ tu tacca tīrthaṃ mahīpate /
bhuktimuktipradaṃ divyaṃ prāṇināṃ pāpakarmiṇām

revāyā dakṣiṇe kūle parvato bhṛgusaṃjñitaḥ /
tasya mūrdhni ca tattīrthaṃ sthāpitaṃ caiva śambhunā

śūlabhedeti vikhyātaṃ triṣu lokeṣu bhūpate /
tatra sthitāśca ye vṛkṣāstīrthāccaiva caturdiśam

patitā nilayaṃ yānti rudrasya nātra saṃśayaḥ /
mṛtāstatraiva ye kecijjantavo bhuvi pakṣiṇaḥ

te yānti paramaṃ lokaṃ tatra tīrthe na saṃśayaḥ /
pātālānniḥsṛtā gaṅgā bhogavatītisaṃjñitā

niṣkrāntā śūlabhedācca sarvapāpakṣayaṃkarī /
yā sā gīrvāṇanāmnyanyā vahetpuṇyā mahānadī

patitā kuṇḍamadhye tu yatra bhinnaṃ triśūlinā /
śambhunā ca purā tāta utpādya ca sarasvatī

sā tatra patitā rājan prācīnāghavimocinī /
bhāsvatyā tritayaṃ yatra śilā gīrvāṇasaṃjñitā

tatra tīrthe ca tattīrthaṃ na bhūtaṃ na bhaviṣyati /
kedāraṃ ca prayāgaṃ ca kurukṣetraṃ gayā tathā

anyāni ca sutīrthāni kalāṃ nārhanti ṣoḍaśīm /
pañca sthānāni tīrthāni pṛthagbhūtāni yāni ca

vakṣyāmi ca samāsena ekaikaṃ ca pṛthakpṛthak /
gayā nābhyāṃ yathā puṇyā cakratīrthaṃ ca tatsamam

dharmāraṇye yathā kūpaṃ śūlabhedaṃ ca tatsamam /
brahmayūpaṃ yathā puṇyaṃ devanadyāstathaiva ca

yathā gayāśiraḥ puṇyaṃ surāṇāṃ ca yathā śilā /
yathā ca puṣkaraṃ sthānaṃ mārkaṇḍahrada eva ca

dattvā piṇḍodakaṃ tatra piṇḍāṇāṃ ca tathākṣayam /
yastatra kurute śrāddhaṃ toyaṃ pibati nityaśaḥ /
mucyate sarvapāpaistu uragaḥ kañcukairiva /
anindyānpūjayedviprān dambhakrodhavivarjitān

trayodaśadinaṃ dānaṃ trayodaśaguṇaṃ bhavet /
abhyarcitaṃ suraṃ dṛṣṭvā gaṇanāthaṃ gajānanam

sarve vighnā vinaśyanti dṛṣṭvā kambalakṣetrapam

pūjayetparayā bhaktyā śūlapāṇiṃ maheśvaram

devasya pūrvabhāge tu umā pūjyā prayatnataḥ /
mārkaṇḍeśaṃ tato bhaktyā pūjayedguhavāsinam

mucyante pātakaiḥ sarvairajñānajñānasaṃcitaiḥ /
guhāmadhye praviṣṭastu japetsūktaṃ tu tryakṣaram

nīlaparvatajaṃ puṇyaṃ ṣaṣṭhāṃśena labheta saḥ /
trinarāstatra tiṣṭhanti sādityamarutaiḥ saha

sarvadevamayaṃ sthānaṃ koṭiliṅgamanuttamam /
yathā nadīnadāḥ sarve sāgare yānti saṃkṣayam

tathā pāpāni naśyanti śūlabhedasya darśanāt /
pratyakṣo dṛśyate'dyāpi pratyayo hyavanīpate

visphuliṅgā liṅgamadhye spandante snānayogataḥ /
dvitīyaḥ pratyayastatra tailabindurna sarpati

evaṃ hi pratyayastatra śūlabhedaprabhāvajaḥ /
yaḥ smarecchūlabhedaṃ tu trikālaṃ nityameva ca

sa pūtaśca bhavetsākṣātsabāhyābhyantaro nṛpa /
na kasyacinmayā khyātaṃ pṛṣṭo'haṃ tridaśairapi

guhyādguhyataraṃ tīrthaṃ sadā gopyaṃ kṛtaṃ mayā /
sarvapāpaharaṃ puṇyaṃ sarvadoṣaghnamuttamam

sarvatīrthamayaṃ tīrthaṃ śūlabhedaṃ janeśvara /
śrute yasya prabhāve tu mucyate sarvapātakaiḥ

śūlabhedaṃ mayā tāta saṃkṣepātkathitaṃ tava /
yaḥ śṛṇoti naro bhaktyā mucyate sarvapātakaiḥ

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śūlabhedapraśaṃsāvarṇanaṃ nāma catuścatvāriṃśo'dhyāyaḥ//