Skanda Purana · Chapter 5.44

// sanatkumāra uvāca // //
athātaḥ saṃpravakṣyāmi padmāvatī yathā'bhavat //
śṛṇuṣva cādṛto vyāsa bahupuṇyakṛtāṃ kathām

ekadā sarvaratnānāṃ hānirjātā durātmabhiḥ//
dharmaglānirnirodhaśca jāto vai duṣṭadānavaiḥ

tadā surāsuraiḥ sarvairmilitvā mathitoṃ'bu dhiḥ //
merurvaṃśodadhiḥ pātraṃ rajjurvāsukipannagaḥ

kūrmapṛṣṭhe vidhiṃ kṛtvā ratnāni duduhustadā //
ādau lakṣmīrviniryātā kṛṣṇāya pratipāditā //

tena kṛtvā viṣādo'bhūddevadānavayostadā //
etasminnaṃtare prāpto nārado devadarśanaḥ/

vāritaḥ kalahastena devadaityasamudbhavaḥ //
mahākālavane sā'stu padmā siṃdhusamudbhavā

sāgarāṃte ca ratnāni tiṣṭhaṃti vividhāni ca //
tāni sarvāṇi cādāya bhavatāṃ vai dadāmyaham

mathyatāmudadhiḥ śīghraṃ nātra kāryā vicāraṇā//
punaste tūdyamaṃ cakruramṛtārthaṃ surāsurāḥ

mathyamāneṃ'budhau teṣāṃ maṇiḥ prāptaśca kaustubhaḥ //
parijātataruḥ paścātsurā jātā tataḥ param

dhanvaṃtarirathotpannaścaṃdro jāto'pi vai tataḥ //
kāmadhenustato jātā gajaratnaṃ tataḥ param

uccaiḥśravā hayaśreṣṭhaḥ sudhā raṃbhā tatastataḥ //
tataḥ paraṃ ca sāraṃgaṃ dhanuḥ sarvāstrasaṃbhavam

pāṃcajanyastathā śaṃkhaḥ kare tiṣṭhati muradviṣaḥ //
nidhireṣa mahāpadmo viṣaṃ hālāhalaṃ tataḥ

caturdaśāpi ratnāni prāptāni vividhāni ca //
samādāya gatāstatra yatra māheśvaraṃ vanam

gatvā te ca samāsīnā maṃtraṃ cakruḥ parasparam //
ahaṃpūrvamahaṃpūrvamiti te samayaṃtritāḥ

kolāhalastathotpanno nāradaḥ punarabhyagāt //
teṣāṃ kalimalaṃ dṛṣṭvā viṣṇumārādhayattataḥ

mohanīrūpamāsthāya nārībhūtvābhyagāddhariḥ //
atirūpavatī tanvī tāmālokya mahāsurāḥ

vihvalāṃgāśca te sarve kāmabāṇavaśaṃgatāḥ //
etasminnaṃtare teṣāṃ surāṃ prādātsureśvaraḥ

hastalāghavayogena devānāmamṛtaṃ dadau //
etasminnaṃtare vyāsa rāhustadrū padhārakaḥ

teṣāmaṃtarago bhūtvā papau cāmṛtamuttamam //
tajjñātvā ca drutaṃ viṣṇuḥ śiraścakreṇa cācchinat

sudhāsparśaprasaṃgena na mamārāsurastadā //
rāhuḥ keturiti khyātau kṣetre'sminmunisattama

rāhukāyātsamudbhūtaṃ bahu susrāva śoṇitam //
tasminkṣetre mahattīrthaṃ jātaṃ taddoṣa nāśanam

tatra snātvā śucirbhūtvā rāhordarśanatatparāḥ //
na teṣāṃ jāyate kiṃcidrāhupīḍā kadācana

vāṃchitārthamavāpnoti gosahasra phalaṃ bhavet //
tatastāni ca ratnāni mahākālavane surāḥ

vibhajya bhāgāṃste sarve prāpya ratnabhujo'bhavan //
maṇiṃ padmāṃ dhanuḥ śaṃkhaṃ viṣṇave nārado dadau

sūryāya ca dadau hyaśvaṃ saptāsyaṃ cābdhisaṃbhavam //
airāvataṃ gajaśreṣṭhaṃ vāsavāya samarpayat

pīyūṣaṃ diviṣadgaṇāndadau caṃdraṃ ca śaṃbhave //
pārijātaṃ taruśreṣṭhaṃ raṃbhāṃ caiva varāṃganām

iṃdrakrīḍāvane ramye naṃdane ca samarpayat //
ṛṣīṇāṃ samadāddhenuṃ kāmadogdhrīṃ yajñasiddhaye

nidhireṣa mahāpadmaḥ kuberabhavanaṃ gataḥ //
yattaddhālāhalaṃ proktaṃ viṣaṃ kenāpi nādṛtam

yatoyataḥ prasarati pralayaṃ yāṃti jaṃtavaḥ //
dadhāra tadviṣaṃ śaṃbhurjagatāṃ hitakāmyayā

tadāprabhṛti mahādevo nīlakaṃṭha iti smṛtaḥ //
ratnakuṃḍe naraḥ snātvā nīlagrīvaṃ ca paśyati

muktvā sa sarvapāpebhyaḥ sarvaratnabhujo bhavet //
śatāśvamedhikaṃ puṇyaṃ labdhvā śivapuraṃ vrajet

tadādāya surāḥ sarve brahmaviṣṇupurogamāḥ //
ūcuśca te tadā vyāsa harṣanirbharamānasāḥ

ujjayinīṃ samāsādya jātā ratnabhujo vayam //
padmāyāśca nivāsena yasmātsarvasukhāvahā

tasmātsarveṣu kāleṣu padmā vasatu niścalā //
adyaprabhṛti pūreṣā padmāvatīti ca smṛtā

ya etasyāṃ mahābhāgāḥ snānaṃ dānaṃ tathārcanam //
tarpaṇaṃ caiva devānāṃ pitṝṇāṃ ca viśeṣataḥ

na teṣāṃ duṣkṛtaṃ kiṃcinna dāridryaṃ na durgatiḥ //
śataṃ kulāni sarvāṇi tārayennirayāttadā

dhanārthī caiva putrārtho vidyārtho bahukāmukaḥ //
yatrakutra sthito bhūtvā padmāvatīti ca smaret

sarvānkāmānavāpnoti śivaḥ sākṣādbhavennaraḥ //
etadvyāsa phalaṃ nāmnaḥ kiṃ ciraṃ sevanena vai

ye śṛṇvaṃti kathāṃ puṇyāṃ ye śrāvayaṃti nityaśaḥ //
na teṣāṃ pātakaṃ kiṃcidaśvamedhaphalaṃ labhet //

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe'vantīkṣetramāhātmye padmāvatīnāmakathāvarṇanaṃnāma catuścatvāriṃ śo'dhyāyaḥ