Skanda Purana · Verses 5.43-3

śrīmārkaṇḍeya uvāca -
tato gacchettu rājendra vimaleśvaramuttamam /
tatra devaśilā ramyā svayaṃ devairvinirmitā

tatra snātvā tu yo bhaktyā brāhmaṇānpūjayennṛpa /
svalpenāpi hi dānena tasya cānto na vidyate

yudhiṣṭhira uvāca -
kāni dānāni viprendra śastāni dharaṇītale /
yāni dattvā naro bhaktyā mucyate sarvapātakaiḥ

śrīmārkaṇḍeya uvāca -
suvarṇaṃ rajataṃ tāmraṃ maṇimauktikameva ca /
bhūmidānaṃ ca godānaṃ mocayatpaśubhānnaram

tatra tīrthe tu yaḥ kaścitkurute prāṇasaṃkṣayam /
rudraloke vasettāvadyāvadā bhūtasamplavam

tataḥ puṣkariṇīṃ gacchetsarvapāpakṣayaṃkarīm /
tatra snātvārcayeddevaṃ tejorāśiṃ divākaram

ṛcamekāṃ japetsāmnaḥ sāmavedaphalaṃ labhet /
yajurvedasya japanādṛgvedasya tathaiva ca

akṣaraṃ vā japenmantraṃ dhyāyamāno divākaram /
ādityahṛdayaṃ japtvā mucyate sarvakilbiṣaiḥ

tatra tīrthe tu yaḥ snātvā vidhinā japeddvijān /
tasya koṭiguṇaṃ puṇyaṃ jāyate nātra saṃśayaḥ

anāśakenāgnigatyā jale vā dehapātanāt /
tasmiṃstīrthe mṛto yastu sa yāti paramāṃ gatim

brāhmaṇaḥ kṣatriyo vaiśyaḥ śūdro vā nṛpasattama /
vihitaṃ karma kurvāṇaḥ sa gacchetparamāṃ gatim

yudhiṣṭhira uvāca -
vyādhiṃ sattvakṣayaṃ mohaṃ jñātvā varṇā dvijottama /
pāpebhyo vipramucyante kena tatsādhanaṃ vada

śrīmārkaṇḍeya uvāca -
tilodakī tilasnāyī kāmakrodhavivarjitaḥ /
brāhmaṇo'naśanaiḥ prāṇāṃstyajallabhati sadgatim

saṅgrāme sadgatiṃ tāta kṣatriyo nidhane labhet /
tadabhāvānmahāprājña sevamāno labhediti

vyādhigrahagṛhīto vā vṛddho vā vikalendriyaḥ /
ātmānaṃ dāhayitvāgnau vidhinā sadgatiṃ labhet

vaiśyo'pi hi tyajanprāṇānevaṃ vai śubhabhāgbhavet /
jale vā śuddhabhāvena tyaktvā prāṇāñchivo bhavet

śūdro'pi dvijaśuśrūṣustoṣayitvā maheśvaram /
vimucya nānyathā pāpaḥ patate narake dhruvam

athavā praṇavāśakto dvijebhyo gurave tathā /
pañcāgnau śoṣayeddehamāpṛcchya dvijasattamān

śāntadāntajitakrodhāñchāstrayuktān vicakṣaṇān /
teṣāṃ caivopadeśena karīṣāgniṃ prasādhayet

evaṃ varṇā yathātvena mūḍhāhaṅkāramohitāḥ /
patanti narake ghore yathāndho girigahvare

ye śāstravidhimutsṛjya vartante kāmacārataḥ /
kṛmiyoniṃ prapadyante teṣāṃ piṇḍo na ca kriyā

śrutismṛtyuditaṃ dharmaṃ tyaktvā yathecchācārasevinaḥ /
aṣṭāviṃśatirvai koṭyo narakāṇāṃ yudhiṣṭhira

pratyekaṃ vā patantyete magnā narakasāgare /
durlabhaṃ mānuṣaṃ janma bahudharmārjitaṃ nṛpa

tallabdhvā madamātsaryaṃ yo vai tyajati mānavaḥ /
saṃniyamya sadātmānaṃ jñānacakṣurnaro hi saḥ

ajñānatimirāndhasya jñānāṃjanaśalākayā

yasya nonmīlitaṃ cakṣurjñeyo jātyandha eva saḥ /
etatte kathitaṃ sarvaṃ yatpṛṣṭaṃ nṛpasattama

tathāniṣṭatarāṇāṃ hi rudrasya vacanaṃ yathā /
narmadā saritāṃ śreṣṭhā rudradehādviniḥsṛtā

tārayetsarvabhūtāni sthāvarāṇi carāṇi ca /
sarvadevādhidevena īśvareṇa mahātmanā

lokānāṃ ca hitārthāya mahāpuṇyāvatāritā /
mānasaṃ vācikaṃ pāpaṃ snānānnaśyati karmajam

rudradehādviniṣkrāntā tena puṇyatamā hi sā /
prātarutthāya yo nityaṃ bhūmimākramya bhaktitaḥ

etanmantraṃ japettāta snānasya labhate phalam /
namaḥ puṇyajale devi namaḥ sāgaragāmini

namo'stu pāpanirmoce namo devi varānane

namo'stu te ṛṣivarasaṅghasevite namo'stu te trinayanadehaniḥsṛte /
namo'stu te sukṛtavatāṃ sadā vare namo'stu te satatapavitrapāvani

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe vimaleśvaratīrthamāhātmyavarṇanaṃ nāma tricatvāriṃśo'dhyāyaḥ //