Skanda Purana · Verses 5.43-2

// śrīśiva uvāca // //
catvāriṃśattamaṃ viddhi tryadhikaṃ parvatātmaje //
yasya darśanamātreṇa jāyate sarvasaṃpadaḥ

ādikalpe purā jāto vakrāṃgo lohitacchaviḥ //
raudrastvaṃgārasadṛśo mama gātrādvarānane //
mayā dhṛto dharaṇyāṃ sa vikhyāto bhūmiputrakaḥ

jātamātre sute tasminmahākāye bhayāvahe //
kaṃpitā dharaṇī devī devāstrastāḥ savāsavāḥ

kṣobhaṃ gatāḥ samudrāśca celuśca dharaṇīdharāḥ //
tenaiva pīḍitaṃ sarvaṃ sadevāsuramānuṣam

ṛṣayo vālakhilyāśca devāḥ śakrapurogamāḥ //
bṛhaspatiṃ puraskṛtya brahmalokaṃ gatāḥ priye

socchvām̐sāḥ kathayāmāsurnamaskṛtya pitāmaham //
vṛttāṃtaṃ vistarātsarvaṃ lokatrayavināśanam

haragātrodbhavenaiva jātamātreṇa līlayā //
lokatrayaṃ samākrāṃtaṃ pīḍitaṃ bhakṣitaṃ tathā

tacchrutvā vacanaṃ teṣāṃ brahmā lokapitāmahaḥ //
ciṃtayitvā tu taiḥ sārddhamājagāma mamāṃtikam

mayā pṛṣṭāstu te sarve kimarthaṃ bhayavihvalāḥ //
socchvāsahṛdayā dīnāḥ kasmādvo bhayamāgatam

taiḥ sarvaṃ kathitaṃ devi mamāgre bhayavihvalaiḥ //
tvadaṃgasaṃbhavenaiva devadeva jagatpate //
pīḍitaṃ bhakṣitaṃ caiva sadevāsuramānavam

iti teṣāṃ vacaḥ śrutvā kṣemārthaṃ kṛpayā mayā //
ākārito matsamīpamuvāca vadatāṃ varaḥ

ādeśo dīyatāṃ deva kiṃ karomītyuvāca saḥ //
nākarṣa tvaṃ jagadidaṃ mayā proktaḥ punaḥpunaḥ

mamāṃgādrajasā jātastenāṃgāraka ucyase //
lokānāṃ svastaye nityaṃ maṃgalosi mayā kṛtaḥ

idānīṃ vakratāṃ yāto vakrastvaṃ gīyase budhaiḥ //
vijñapto'haṃ tadā tena mama vākyaṃ śrutaṃ yadā //
āhāreṇa vinā deva kathaṃ tṛptirbhaviṣyati

tasmānme dehi susthānamādhipatyaṃ ca dehi me //
śaktiṃ ca dehi me śīghramāhāraṃ dehi me prabho

tasya tadvacanaṃ śrutvā putro'yaṃ mama vallabhaḥ //
tasmāddāsyāmi paramaṃ sthānamakṣayamuttamam

iti saṃcintya manasā smṛtaṃ sthānaṃ mayottamam //
utsaṃge ca sutaṃ kṛtvā premṇā proktaṃ punaḥpunaḥ

dattaṃ putra mayā sthānaṃ mahākālavanottame //
gaṃgeśvarasya pūrve tu praśasyaṃ sthānamuttamam

khagartā caiva śiprā ca saṃgamastatra vidyate

yadā mayā dhṛtā gaṃgā tadā sā candramaṇḍalāt //
pramādātpatitā bhūmau mahākālavanottame

khagarteti ca vikhyātā khādbhraṣṭā prāpatatkṣitau //
ato mayāvatārastu sahasā tava vai kṛtaḥ

liṃgamūrtirahaṃ putra tiṣṭhāmi surapūjitaḥ //
tatsthānaṃ durlabhaṃ devaistasmāttvaṃ gaccha satvaram

pūjito'haṃ tvayā tatra saṃgame lokapūjite //
triṣu lokeṣu yāsyāmi khyātiṃ vai tava nāmataḥ

madhye grahāṇāṃ sarveṣāmādhipatyaṃ mayā tava //
dattaṃ tṛtīyakaṃ sthānaṃ tatra tṛptirbhaviṣyati

pūjāṃ prāpsyasi tatraiva grahamadhye vyavasthitaḥ //
tithirdattā caturthī te tasyāṃ ye vratatatparāḥ //

tvāmuddiśya kariṣyaṃti pūjāṃ śāṃtiṃ sadakṣiṇām //
tena sarveṇa te tṛptirbhaviṣyati na saṃśayaḥ

vāraścaikaśca te datto maṃgalārthaṃ mayā tava //
navavastraparīdhānaṃ vidyāraṃbhaṃ dine tava //
tailābhyaṃgaṃ kariṣyaṃti na ca prāpsyaṃti te balam

ityuktastu mayā devi vakrāṃgo maṃgalaḥ sutaḥ //
aṃgāraketi vikhyātastathetyaṃgīcakāra saḥ

santuṣṭastena vākyena madīyena varānane //
ājagāma mudā yukto mahākālavanottame

śiprāyāśca taṭe ramye khagarttāsaṃgamāṃtikam //
dṛṣṭo'haṃ liṃgarūpeṇa parāṃ tuṣṭimupāgataḥ //

mayā cāliṃgitaḥ premṇā cumbitaḥ śirasi priye //
varo datto viśālākṣi vāṃchitaṃ te bhaviṣyati

dṛṣṭo'haṃ ca tvayā putra bhaktyā cārādhitastvayā //
mama vākyaṃ kṛtaṃ yasmāttasmāttuṣṭo'smi maṃgala

aṃgāreśvaranāmāhamadyaprabhṛti putraka //
triṣu lokeṣu vikhyā to bhaviṣyāmi na saṃśayaḥ

ye māṃ paśyaṃti satataṃ saṃgame'tra vyavasthitam //
na teṣāṃ punarāvṛttirbhaviṣyati mahītale

ye māṃ saṃpūja yiṣyaṃti hyaṃgārakadine narāḥ //
kalau yuge kṛtārthāste bhaviṣyaṃti na saṃśayaḥ

caturthyāṃ maṃgaladine ye māṃ paśyaṃti suvratāḥ //
na te yāsyaṃti saṃsāre ghore duḥkhaśatākule

amāvāsyā ca bhaumaśca saṃyogo dṛśyate yadā //
khagarttāyāśca śiprāyāḥ saṃgame devapūjite

snātvā tadā prapaśyaṃti māmatraiva vyavasthitam //
teṣāṃ puṇyaphalaṃ devi samāsācchṛṇu sāṃpratam

vārāṇasyāṃ prayāge ca kurukṣetre ca yatphalam //
gayāyāṃ puṣkare proktaṃ tatpuṇyamadhikaṃ bhavet

eṣa te kathito devi prabhāvaḥ pāpanāśanaḥ //
aṃgāreśvaradevasya śrūyatāmuttareśvaram

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśītiliṅgamāhātmyeṃ'gārakeśvaramāhātmyavarṇanaṃnāma tricatvāriṃśo'dhyāyaḥ