Skanda Purana · Verses 5.42-2

// śrīhara uvāca // //
dvācatvāriṃśataṃ devaṃ gaṃgeśvaramatho śṛṇu //
yasya darśanamātreṇa sarvatīrthaphalaṃ labhet //
dhruvādhāraṃ jagadyoneḥ padaṃ nārāyaṇasya tu

padātpravṛttā yā devī gaṃgā tripathagā nadī //
sā praviśya sudhāyoniṃ somamādhāramaṃbhasām

tataḥ saṃvarddhamānārkaraśmisaṃgatipāvanī //
papāta merupṛṣṭhe ca sā caturdhā tato yayau

merukūṭataṭāntebhyo nipatantī yaśasvinī //
vikīryamāṇasalilā nirālaṃbā papāta sā

mandarādiṣu śaileṣu pravibhaktodakā samam //
tatra sīteti vikhyātā yayau caitrarathaṃ vanam

tatplāyitvā ca yayāvaruṇodaṃ saridvarā

tathaivālakanandākhyā dakṣiṇe gandhamādane //
merupādavanaṃ gatvā nandane devanandane

mānasaṃ ca mahāvegātplāvayitvā sarovaram //
tasmācca śailarājānaṃ ramyaṃ triśikharaṃ gatā

tasmācca parvatāḥ sarve plāvitāstatkṣaṇātpriye //
tānplāvayitvā saṃprāptā himavantaṃ mahāgirim

mayā dhṛtā ca tatraiva jaṭājūṭena pārvati //
na muktā ca yadā gaṃgā tadā kruddhā mamopari

gātrāṇi plāvayāmāsa madīyāni varānane //
mayā ca ruddhā krodhena jaṭāmadhye yaśasvini

tatraiva sā tapaścakre bahukalpaśatāni ca //
bhagīrathenopavāsaiḥ stutyā cārādhito hyaham

tadā muktā mayā devi gaṃgā tripathagāminī //
mahākālamanuprāptā plāvayitvottarānkurūn

samudramahiṣī jātā prāṇebhyo'pi garīyasī //
nadīnāmuttamā gaṃgā samudreṇa kṛtā tadā //
sa tayā sahito reme samudraḥ saritāṃpatiḥ

tataḥ kadācidbrahmāṇamupāsāṃcakrire surāḥ //
tathārṇavo jagāmātha brahmalokaṃ sanātanam//
gaṃgayā sahito devi darśanārthaṃ mahotsave

atha gaṃgā saricchreṣṭhā samupāyātpitāmaham //
tasyā vāsaḥ samuddhūtaṃ mārutena śaśiprabham

tato'bhavansuragaṇāḥ sahasā'vāṅmukhāstadā //
mahābhiṣastu rājarṣirniḥśaṃko dṛṣṭavānnadīm

tasya bhāvaṃ viditvā'tha brahmaṇā sa tiraskṛtaḥ //
uktastu jāto martyeṣu punarlokānavāpsyasi

gaṃgā śaptātha kruddhena samudreṇa yaśasvini //
māṃ vihāyānyasaktāsi tasmādyāsyasi mānuṣam

lokamalpāyuṣaṃ dīnā tatra duḥkhamavāpsyasi //
taṃ śāpaṃ dāruṇaṃ śrutvā gaṃgā vacanamabravīt

vināparādhācchaptāhaṃ kasmādvai devasaṃsadi //
pativratā patiprāṇā patinā paramārthataḥ

pramādādvastramuddhūtaṃ vāyunā vyāpakena tu //
pratyuvāca tato brahmā tāṃ nadīṃ lokapāvanīm

vasūnāṃ kāraṇāddevi śaptā yasmānmahānadi //
bhāvyarthe toyanidhinā tasmācchīghraṃ vrajādhunā

mahākālavane ramye siddhagaṃdharvasevite //
śiprāyā dakṣiṇe bhāge vidyate liṃgamuttamam

sarvasiddhikaraṃ puṇyaṃ sarvapātakanāśanam //
tamārādhaya yatnena sa te dāsyati vāṃchitam

pitāmahavacaḥ śrutvā tuṣṭā tripathagāminī //
gamanaṃ tatra me'bhīṣṭa vidyate yatsakhī mama //
śiprāpi me priyā puṇyā mahāpātakanāśinī

iti saṃciṃtya manasā divyā devanadī tadā //
ājagāma mahākāle hyapaśyalliṃgamuttamam

pūjayāmāsa payasā divyena vidhinā tadā //
dṛṣṭvā śiprāṃ sakhīṃ tatra saṃśleṣaṃ cābhavattayoḥ

tataḥ prabhṛti saṃjātā sā śiprā pūrvavāhinī //
triṣu lokeṣu vikhyāto devo gaṃgeśvaraḥ svayam //
gaṃgayārādhito yasmātsamīhitaphalapradaḥ

saṃstutā devagaṃdharvairgaṃgā devanadī tadā //
ṛṣibhirvālakhilyādyaistathānyairmunibhirmudā

samudrastatra saṃprāpto mānitā sā mahānadī //
liṃgenoktā tadā gaṃgā kalayā sthīyatāmiti

tatsamīpe mahāpuṇye yāvattiṣṭhati medinī //
aṃgīkṛtaṃ samudreṇa yathoktaṃ ca tathā stviti

evamuktvā gatā gaṃgā kalayā tatra saṃsthitā //
gaṃgeśvaraṃ tu yaḥ paśyetsnātvā śiprāṃbhasi priye

gosahasraphalaṃ tasya jāyate nātra saṃśayaḥ //
sarvatīrthaphalaṃ tasya sarvadharmaphalaṃ tathā

sarvayajñaphalaṃ samyaksarvadānaphalaṃ tathā //
sarvayogaphalaṃ devi prāpnotyeva nirantaram

tatra tīrthāni subhage pṛthivyāṃ yāni kānicit//
dharmāraṇyaṃ phalgutīrthaṃ puṣkaraṃ naimiṣaṃ gayā

prayāgaṃ ca kurukṣetraṃ kedāramamareśvaram //
caṃdrabhāgā vipāśā ca sarayūrdevikā kuhū

godāvarī śatadruśca bāhudā vetravatyapi //
sarvā evātra saritaḥ saṃgatāḥ saṃti gaṃgayā

guptāni puṇyatīrthāni siddhakṣetrāṇi caiva hi //
tatra sarvāṇi tiṣṭhaṃti kalāmātreṇa pārvati

eteṣāṃ phalamāpnoti yaḥ paśyati samāhitaḥ //
snātvā gaṃgeśvaraṃ devaṃ satyametanmayoditam //
ataḥ puṇyatamaṃ sthānaṃ gīyate gaṇavaṃdite

eṣa te kathito devi prabhāvaḥ pāpanāśanaḥ //
gaṃgeśvarasya devasya śṛṇvaṃgāreśvaraṃ param

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmye gaṃgeśvara māhātmyavarṇanaṃnāma dvācatvāriṃśo'dhyāyaḥ