Skanda Purana · Chapter 5.42

// sanatkumāra uvāca // //
purā caiśānakalpe tu smṛtāvaṃtī yathā purī //
tathā śṛṇu suraiḥ pūrvaṃ daityasainyaparājitaiḥ

āśritaṃ meruśikharaṃ vanakaṃdaguhāvṛtam//
tatra gatvā dvijaśreṣṭha maṃtraṃ ca cakrurudyatāḥ

anyonyaṃ ca samāsādya samabhyarcya parasparam//
jagmuḥ sarve suragaṇā yatra brahmā prajāpatiḥ

nivedayāṃcakrire sarvaṃ tatrāgamanakāraṇam//
teṣāṃ tadvacanaṃ śrutvā devānāṃ sa prajeśvaraḥ

jagāma tridaśaiḥ sākaṃ devadevaṃ maheśvaram//
sa cāpi hyagamattatra vaikuṭhaṃ dhāma yatra vai

ṛddhisiddhipradaṃ nityaṃ municāraṇasevitam //
kinnarairgīyamānaṃ ca apsarogaṇasevitam

ṛṣibhirbhārgavādibhirdevarṣināradottamaiḥ //
siddhagaṃdharvamukhyaiśca kumāraiḥ sanakādibhiḥ

prajāpatigaṇākīrṇaṃ mānavaiśca caturdaśaiḥ //
vasubhirviśvedevaiśca pitṝṇāmuttamairgaṇaiḥ

saṃsevyaṃ ca sadācāraiḥ puṇyavadbhirjanaistathā //
divyaṃ divyaiśca prāsādairdivyapādapaśobhitam

maṇiratnaiśca sopānai rdivyaṃ sarasaśobhitam //
haṃsakāraṃḍavākīrṇaṃ maṇibhābhiḥ subhāsvaram

ṣaḍūrmirahitaṃ sthānaṃ yatra tiṣṭhanti pakṣiṇaḥ //
tatra gatvā surāḥ sarve vāsu devadidṛkṣayā //
stutimārebhire kartuṃ devadevajagatpateḥ

// devā ūcuḥ // //
namo'naṃtāya bṛhate kūrmāya vai namonamaḥ

nṛsiṃharūpāyogrāya namo vārāharūpiṇe //
rāghavāya ca rāmāya brahmaṇe'naṃtaśaktaye

vāsudevāya śāṃtāya yadūnāṃ pataye namaḥ //
namo buddhāya śuddhāya kalkaye mlecchanāśine

iti stavābhiyuktānāṃ vāguvācāśarīriṇī //
śṛṇudhvaṃ bhoḥ surāḥ sarve bhūtvā caikāgramānasāḥ

mahākālavane ramye brahmarṣigaṇasevite //
tatra puṇyā purī hyekā sarvakāmaphalapradā

nāmnā kuśasthalī ramyā siddhagaṃdharvasevitā //
kalpādau kalpamadhye vā yatra saṃnihito haraḥ

kalpakṣaye kṣayaṃ yāṃti sthāvarāṇi carāṇi ca //
tīrthāni caiva sarvāṇi puṇyānyāyatanāni ca

saritaḥ sāgarāḥ sarve sarāṃsyupavanāni ca //
auṣadhīrvṛkṣavallīśca yaṃtraṃ maṃtraṃ śubhāśubham

jyotīṃṣi caṃdrasūryau ca sarvaṃ viṣṇumayaṃ jagat //
teṣāṃ bījaṃ ca puṇyaṃ ca jīvakarmāśaya tathā

sarvamādāya bhagavāñchaṃkarastatra tiṣṭhati //
sarvatīrthamayī gaṃgā sarvadevamayo hariḥ

sarvayajñamayo vedaḥ sarvadharmamayī dayā //
revā ca saritāṃ śreṣṭhā bhuvi puṇyakṛtādhikā

tasmāddhitakaraṃ kṣetraṃ kurūṇāṃ vai surottamāḥ //
tasmāddaśaguṇaṃ manye prayāgaṃ tīrthamuttamam

tasmāddaśaguṇā kāśī kāśyā daśaguṇā gayā //
tato daśaguṇā proktā kuśasthalī ca puṇyadā

uparāgasahasrāṇi vyatipātāyutāni ca //
amālakṣaṃ tu etasyāḥ kalāṃ nārhaṃti ṣoḍaśīm

lakṣamiṃdukṣaye dānaṃ sahasraṃ cāyanadvaye //
vyatīpāte ca koṭiḥ syādrā kāyāṃ ca hyanaṃtakam

tasmāddhitakarā devā purī hyeṣā kuśasthalī //
anaṃtā'naṃtasaṃkhyātaṃ dānaṃ kiṃcitkṛtaṃ naraiḥ

tatsarvaṃ bhoḥ suraśreṣṭhāḥ sarvaṃ taccākṣayaṃ bhavet //
tasmātsarvaprayatnena yūyaṃ yāta hi mā ciram

kṣīṇapuṇyā bhavaṃto vai bādhaṃte tena vaḥ surāḥ //
mahākālavane ramye purī hyeṣā kuśasthalī

tatra gatvā bhavaṃto vai snānadānādikaṃ bhuvi //
ācaradhvaṃ suvidhinā puṇyātsvargamavāpsyatha

etacchutvā vacastasyā vāṇyāścākāśagaṃ tadā //
praṇamya śirasā tasyai brahmeśānapurogamāḥ

punarjagmuḥ surāḥ sarve yatra māheśvaraṃ vanam //
purīṃ caiva dvijaśreṣṭha sarvakāmaphalapradām

cāturvarṇyasamākīrṇāmṛṣigaṃdharvasevitām //
puṇyavadbhirjanaiḥ pūrṇāṃ siddhacāraṇasevitām

daridro na jaḍo mūrkho na rogī na ca matsarī //
na vyādhito nāpakārī janaḥ kvacitpradṛśyate

dātā śāṃtāḥ suśīlāśca jarārogavivarjiṃtāḥ //
svadharmaniratā nityaṃ sadācārātithipriyāḥ

narā yatra nivasaṃti nāryaścaiva pativratāḥ //
mahotsavāḥ sugītāni havyaṃ kavyaṃ gṛhegṛhe

īdṛśīṃ ca purīṃ dṛṣṭvā devā harṣaṃ paraṃ gatāḥ //
tatra tīrthaṃ samākhyātaṃ nāmnā paiśācamocanam

puṇyavadbhiḥ sadā sevyaṃ sarvatīrthaniṣe vitam //
tasminsnātvā ca japtvā ca hutvā dattvā ca devatāḥ

puṇyaṃ cāthākṣayaṃ labdhvā punaryātāḥ surālayam //
jitvā'surānmahāduṣṭānsthānaṃ prāptāḥ svakaṃsvakam

ye'syāṃ kuryurmahābhāgāḥ snānaṃ dānaṃ tathārcanam //
havanaṃ tarpaṇaṃ pitṝṃstatsarvaṃ syāddhyanaṃtakam

tasmātsarvaprayatnena etatkāryaṃ sadā budhaiḥ//
devatīrthoṣadhībījabhūtānāṃ caiva pālanam

kalpekalpe ca yasyāṃ vai tenāvaṃtī purī smṛtā //
adyaprabhṛti purī hyeṣā nāmnāvaṃtī kuśasthalī

ityuktvā vai tadā devāḥ svadhāma paramaṃ gatāḥ //
tadārabhya dvijaśreṣṭha hyavaṃtī bhuvi viśrutā

ya etāṃ sukathāṃ divyāṃ puṇyāṃ ca pāpahāriṇīm//
śṛṇuyācchrāvayedyo vai sarvapāpaiḥ sa mucyate

aputro labhate putramadhano dhanamāpnuyāt //
vājapeyasahasrāṇāṃ rājasūyaśatādhikam

puṇyaṃ labdhvā naro nityaṃ śivaloke mahīyate

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe'vantīkṣetramāhātmye'vaṃtyabhidhānakathāvarṇanaṃnāma dvicatvāriṃśo'dhyāyaḥ