Skanda Purana · Chapter 5.39

// vyāsa uvāca // //
bhagavankṣetramāhātmyaṃ kathitaṃ ca yathātatham //
tīrthānāmuttamaṃ tīrthaṃ puṇyānāṃ puṇyavardhanam

kati saṃtyatra tīrthāni liṃgāni ca tathā kati //
kathayasva prasādena pṛcchato mama sāṃpratam

// sanatkumāra uvāca // //
ṣaṣṭikoṭisahasrāṇi ṣaṣṭikoṭiśatāni ca //
mahākālavane vyāsa liṃgasaṃkhyā na vidyate

akāmo vā sakāmo vā jāyate yo'tra mānavaḥ //
mahākālavane ramye śivaloke mahīyate

kṛtakāmāni tīrthāni prāsādāyatanāni ca //
teṣu snātvā śucirbhūtvā śivaloke mahīyate

puṇyāni sarvatīrthāni siddhikṣetrāṇi sarvataḥ //
teṣāṃ mukhyatamaṃ viddhi kṣetraṃ tīrthaṃ tathottamam //

yaḥ śṛṇoti mahābhaktyā sa yāti paramāṃ gatim

//
iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantya khaṇḍe'vantīkṣetramāhātmye mahākālavanamāhātmyavarṇanaṃnāmaikonacatvāriṃśo'dhyāyaḥ