Skanda Purana · Verses 5.39-2

// hara uvāca // //
akrūreśvaramekonacatvāriṃśattamaṃ śṛṇu //
yasya darśanamātreṇa subuddhirjāyate nṛṇām

purā tvayaiva kalpādau parayā śaktirūpayā //
kṛtaṃ kṛtsnaṃ varārohe trailokyaṃ sacarācaram

tatastvaṃ saṃstutā devaiḥ sakiṃnaramahoragaiḥ //
pradakṣiṇāṃ prakurvati gaṇā nānāvidhāstu te

namaskāraṃ prakurvati stotraṃ kurvaṃti cāpare //
na karoti namaskārameko bhṛṃgiriṭistadā

krūrāṃ buddhiṃ samāsādya garveṇatīva garvitaḥ

eko devo mahādevaḥ striyā kimanayā mama //
yadā nāyāti te pārśvaṃ tadā proktastvayā gataḥ

kasmānna kuruṣe pūjāṃ pradakṣiṇamatho stutim //
madbhakto madadhīno'si mama putro mayā kṛtaḥ //
itthaṃbhūtagaṇeśa tvaṃ kiṃ vai laulyena varttase

iti bhṛṃgiriṭiḥ śrutvā kuddhastvāmāha garvitaḥ //
nāhaṃ pārvati te putraḥ putro'haṃ śaṃkarasya tu

eṣa eva ca me mātā eṣa eva ca me pitā //
evaṃ rātridinaṃ yāmi śaraṇaṃ parameṣṭhinam

tvamapyasyaiva śaraṇaṃ nanu pārvati saṃsthitā//
yadi ca tvāmahaṃ vaṃde tadvaṃde sakalāngaṇān

iti bhṛṃgiriṭeḥ śrutvā vākyaṃ kupitayā tvayā //
tasyoktaṃ pramatheśasya bhīru bhṛṃgiriṭeridam

suto bhūtvā bhavānkasmādadākṣiṇyaṃ bravīṣi mām //
tvaṅmāṃsaśoṇitāṃtraṃ ca mātṛkaṃ tanayasya tu

nakhadaṃtāsthisaṃghātaḥ śiśnaṃ vākca śirastathā //
tathaiva śukraṃ gaṇapa paitṛkaṃ tu śarīrakam

iti bhṛṃgiriṭiḥ śrutvā sadyo yogabalena tu //
māṃsādi tyaktavānsarvaṃ mātṛkaṃ bhāgameva hi

tataḥ prabhṛti vāmoru nakhadaṃtāsthināsikaḥ //
sa ca krūrāṃ matiṃ kṛtvā krodhasaṃraktalocanaḥ//

tvāṃ parityajya duḥkhārtta ājagāma mamāṃtikam //
atha tvayā tadā śapto gaṇo bhṛṃgiriṭiḥ priye

krūrā buddhiḥ kṛtā yasmāttvayā kumatinā bhṛśam //
tasmāttvaṃ mānuṣe loke gamiṣyasi na saṃśayaḥ

ityuktastu tvayā devi gaṇo bhṛṃgiriṭistathā //
papāta mānuṣaṃ lokaṃ puṇyāṃte sukṛtī yathā

sa gatvā puṣkaradvīpaṃ tapase bhāvitātmavān //
tatraikapādūrddhvabhujo daśapadmānyavasthitaḥ //
dagdhībhūtaṃ ca tapasā jagadvai duṣkareṇa tu

tato brahmā ca viṣṇuśca śakraśca tridaśaiḥ saha //
vayaṃ ca cārujaghane tatsamīpaṃ samāgataḥ

upagamya tatastasya kathitaṃ purato mayā //
alaṃ krūreṇa tapasā lokasyotsādanena vai

trailokyamapi niḥsaṃjñaṃ jātamevaṃ sthite tvayi //
saṃharasva tapo ghoraṃ lokasaṃtāpanaṃ mahat

prārthyatāṃ pārvatī putra sā dāsyati varaṃ ca te//
asyāḥ prasādānmuktiste śāpāccaiva bhaviṣyati //
evamuktastadā tena prārthitā tvaṃ maheśvari //
gaṇena bhṛṃgiriṭinā bhaktinamreṇa sādarāt

tvayā proktaṃ viśālākṣi putra gaccha mamājñayā //
mahākālavane ramye tatrā'krūro bhaviṣyasi

punaḥ prāpsyasi kailāsaṃ siddhagaṃdharvasevitam//
aṃkapādāgrato liṃgaṃ saptakalpānugaṃ mahat //
yasya darśanamātreṇa śubhā buddhiḥ prajāyate

kṛtaghnā nāstikāḥ krūrā ye ca viśvāsaghātakāḥ //
mahāpātakino ye ca ye ca śāpavaśaṃ gatāḥ //
darśanāttasya liṃgasya te'pi svarga bhujo narāḥ

krūrāṃ buddhiṃ samāsādya kaṃsaṃ hatvā ca keśihā //
baladevena sahitastyaktvā tāṃ mathurāṃ purīm

mahākālavanaṃ gatvā toṣa yitvā maheśvaram//
akrūratvaṃ ca saṃprāptaṃ kīrttirlabdhā ca śāśvatī

tvadīyaṃ vacanaṃ śrutvā gaṇo bhṛṃgiriṭistadā //
tatheti pratyayī jāto mahā kālavanaṃ gataḥ //
devamārādhayāmāsa tapasā duṣkareṇa tu

etasminnaṃtare devi liṃgamadhyāttvamutthitā //
arddhāṃgaṃ māmakaṃ kṛtvā svakīyāṃgamathā rddhataḥ //
phaṇīṃdrabaddhajūṭārddhamarddhadhamillabhūṣitam

patravallīvicitrārdhamarddhacaṃdravirājitam //
muktāhāranibaddhārddhamarddhaṃ sarpaiśca veṣṭitam

tato bhṛṃgiriṭirdevi dṛṣṭvā tanmahadadrutam //
ciṃtayāmāsa hṛdaye mayā'jñānādanuṣṭhitam

umā ca śaṃkaraścaiva dehamekaṃ sanātanam //
ekā mūrttiranirdeśyā dvidhā bhedena dṛśyate

evaṃ ciṃtayatastasya bhaktinamrasya pārvvati //
proktaṃ tvayā prasannāhaṃ varaṃ varaya putraka

tenoktaṃ yadi tuṣṭāsi mātarmama maheśvari //
asya liṃgasya māhātmyātkrūrā buddhirgatā mama

akrūreśvaranāmāyaṃ devaḥ khyāto bhavatviti //
tvaṃ devi sarvabhāvānāmekā kāraṇamucyate

tvaṃ mūrtā puṇyanicayā tvaṃ gatiḥ puṇyasevinām//
pitā mātā suhṛdbandhustvamekā kāraṇaṃ param

kuru puṇyatamaṃ sthānaṃ brahmahatyādināśanam //
bhuktidaṃ muktidaṃ caiva vāṃchitārthapradāyakam

tatheti ca tvayā proktaṃ girā madhurayā tadā //
yatte priyatamaṃ vatsa tatpūrvaṃ prakaromyaham

na me'sti duṣkaraṃ putra tvatkṛte kanakaprabha //
asminsthāne tu ye devamakūreśvarasaṃjñakam //
prasaṃgādapi paśyaṃti api pāparatā narāḥ //
te'pyavaśyaṃ bhaviṣyaṃti tvatsamā niyataṃ gaṇāḥ

bhaktyā stoṣyaṃti ye nāma liṃgasyāsya ca mānavāḥ //
mānasaiḥ pātakairmuktā yāsyaṃti svargamakṣayam

snātvā tu vidhivatpūjāṃ yaḥ kariṣyati mānavaḥ//
sa muktaḥ pātakaiḥ sarvaiḥ prāpsyate ravimaṃḍalam

āyurārogyamaiśvaryaṃ kāmamatra hi vāṃchitam //
gosahasraphalaṃ cātra spṛṣṭvā prāpsyati mānavaḥ

snātvā maṃdākinīkuṃḍe yo'kūreśvaramīśvaram //
pūjayedvividhaiḥ puṣpairmahāpāpahatopi vā

vimānaṃ divyamārūḍho yāvatkalpacatuṣṭayam //
gaṃdharvairgīyamānastu so'pi svargaṃ gamiṣyati

ityuktaḥ sa gaṇo devi matsamīpamupāgataḥ //
śāpānmuktastvayā sārdhaṃ vismṛtā kiṃ varānane

eṣa te kathito devi prabhāvaḥ pāpanāśanaḥ //
akrūreśvaradevasya śṛṇu kuṃḍeśvaraṃ param

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṅgamāhātmye'krūreśvaramāhātmyavarṇanaṃnāmai konacatvāriṃśo'dhyāyaḥ