Skanda Purana · Verses 5.38-2

// īśvara uvāca // //
aṣṭātriṃśattamaṃ viddhi kusumeśvarasaṃjñakam //
devaṃ svargapradaṃ devi mahāpātakanā śanam

purā vaivasvate kalpe prāpte vārāhasaṃjñake //
prādurbhūte viśālākṣi kailāsādahamāgataḥ

mahākālavane ramye ramamāṇasya pārvati //
tvayā sārddhaṃ mamākṣaiśca prādurāsīnmahāsvanaḥ

pṛṣṭo'haṃ ca tadā śrutvā śabdaṃ cātīva duḥsaham //
śabdotpattirmayā devi kathitā sā tvadagrataḥ

ete gaṇeśāḥ krīḍaṃti madhye vai vīrako gaṇaḥ //
kusumairbhūṣito'tyarthaṃ mamātīva suvallabhaḥ

kusumairhanyate'pyarthaṃ pūjyate kusumotkaraiḥ //
sa eva vīrako devi sadā me harṣadāyakaḥ

nānāścaryaguṇādhāro gaṇeśvaraśatārcitaḥ //
madīyaṃ vacanaṃ śrutvā tvayāpyuktaṃ varānane

na dṛśyate vinā puṇyaiḥ putrasyānanapaṃkajam //
īdṛśasya sutasyāpi mamotkaṇṭhā maheśvara

kadāhamīdṛśaṃ putraṃ drakṣyāmyānandadāyakam //
mayā tava vacaḥ śrutvā hasitvā ca punaḥpunaḥ //
proktaṃ pārvati putro'yaṃ pradatto vīrako'dhunā

eṣa eva sutastestu nayanānandadāyakaḥ //
tvayā mātrā kṛtārthastu vīrakaḥ kusumārcitaḥ

madīyaṃ vacanaṃ śrutvā preṣitā vijayā tvayā //
datto hareṇa me putro vijaye śīghramānaya

vijayovāca gaṇapaṃ gaṇamadhye ca varttinam //
ehi vīraka cāpalyāttvayā devaḥ prakopitaḥ //
kimunmattavadatyarthaṃ nṛtyarāgeṇa mohitaḥ

ityukto bhayasaṃtrastaḥ kusumairbhūṣitastadā //
tvatsamīpaṃ samāyāto vijayānugataḥ śanaiḥ

bhūṣitaṃ kusumairdṛṣṭvā bhayatrastaṃ ca vīrakam //
tvayā cākārito devi girā madhuravarṇayā

ehyehi jāto'si me putrakastvaṃ devena datto'dhunā vīrakosi //
uktavatyevamaṃke nidhāyātha taṃ paryacumbaḥ kapole kalaṃvādinam

mūrdhanyupāghrāya sammārjya gātrāṇi sā bhūṣayāmāsa divyaiḥ svayaṃ bhūṣaṇaiḥ //
kiṃkiṇīmekhalānūpuraiḥ sanmaṇīniṣkakeyūrahārotkaraiḥ sadguṇaiḥ

komalaiḥ pallavaiścitritaiścārubhirdivya mantrodbhavaistasya śubhraistataḥ //
bhūtibhiścākarormiśrasiddhārthakairaṃgarakṣāvidhīṃstasyatuṣṭā satī

evamādhāya covaktha kṛtvā srajaṃ mūrdhni gorocanāpatrabhaṃgojvalaiḥ //
vatsa gacchādhunā krīḍa sārddhaṃ gaṇairapramatto yathā bālacaryāṃ śanaiḥ

so'pi siddhyākule gaṇḍaśaile miladratnajāle vṛhacchā latālākule //
kṣaṇaṃ phullamālātamālālimāle kṣaṇaṃ vṛkṣamūle vilolālimāle

kṣaṇaṃ svalpapaṃke jale paṃkajāle kṣaṇaṃ vṛkṣakhaṇḍe śubhe niṣkalaṃke //
parikrīḍate bālako vai vihārī gaṇeśādhipo devatānandakārī

evaṃ vikrīḍatastasya vīrakasya gaṇasya ca //
saṃdhyā tamo mayī prāptā vijñapto'haṃ tvayā priye

aiśvaryaṃ dīyatāmasya mama putrasya śaṃkara //
śarīrārddhaṃ gaṇeśatvaṃ lokapālatvamagrataḥ

liṃgatvamakṣayatvaṃ ca sthānaṃ divyaṃ sudurllabham //
vaṃdyamānaṃ yathā deva siddhagandharvakiṃnaraiḥ //
brahmendravaruṇādityalokapāleśvareśvaraiḥ

etaireva gaṇaiḥ sārddhaṃ stūya mānaṃ mahātmabhiḥ //
alaṃkṛto mayā yasmātkusumairvividhaiḥ śubhaiḥ

kusumeśvarasaṃjñastu tasmātkhyāto bhavatviti //
mayāpyuktaṃ viśālākṣi vīrakaṃ dayitaṃ mama

matprabhāvasamaṃ divyaṃ sevitaṃ gaṇapaiḥ sadā //
śṛṇu gandharvagītānāṃ mādhuryamamṛtopamam

paśya kinnaranārīṇāṃ gāyantīnāṃ manoramam //
paśyāpsaraḥsamūhasyanṛtyametannirantaram

vidyādharaiḥ parivṛtaḥ kusumeśo varānane //
viśeṣato mayā devi prathamaṃ pramathe śvaraḥ //
kusumeśvaratāṃ nīto yadā kusumamaṃḍitaḥ

sthānaṃ dattaṃ viśālākṣi śivaliṃgasya cottare //
varo datto bahumato duṣprāpyastridaśairapi

ye tvāṃ drakṣyaṃti gaṇapa kusumeśvarasaṃjñakam //
na teṣāṃ jāyate pāpaṃ padmapatre yathā jalam

kusumairarcayiṣyaṃti ye narāḥ kusumeśvaram //
matsthānaṃ te samāsādya modiṣyaṃti gatavyathāḥ

yo'pyekaṃ divasaṃ marttyastvāṃ paśyati samāhitaḥ //
sa muktaḥ pātakaiḥ sarvairmama lokaṃ gamiṣyati

yaḥ pūjayati bhāvena kusumaiḥ kusumeśvaram //
sa prāpsyati paraṃ sthānaṃ punarāvṛttidurlabham

evamādivaraiḥ puṣṭaḥ kṛtoyaṃ kusu meśvaraḥ //
kṛtakṛtyo gaṇo devi liṃgeneśvaratāṃ gataḥ

kusumeśvaradevasya prabhāvaḥ kathitastvayam //
akrūreśasya devasya śrūyatāṃ tadanantaram

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe kusumeśvaramāhātmyavarṇanaṃnāmāṣṭātriṃśo'dhyāyaḥ