Skanda Purana · Chapter 5.38

// sanatkumāra uvāca // //
nāsti śeṣaṃ yadā raktaṃ pīyamānaṃ ca rakṣasaḥ //
cāmuṃḍāyāstato raktamabhūdāsyaṃ ca bhāsuram

kṛṣṇaṃ kṛtāṃtakalpāṃtaṃ karāladaśanādharam //
prajvalatyaṃdhake śāṃtaṃ jvalatkesaralocanam

ghoraghargharanirghoṣasphītaphetkāravisvaram //
tārkṣyapakṣakṛtāpīḍaṃ tīkṣṇadaṃṣṭrākurojjvalam

tasminmukhe kapālāgraṃ nidhāya ruṣitānanā //
apibadrudhiraṃ caṃḍī caṇḍa dordaṃḍamaṃḍitā

tayā pibaṃtyā daityeṃdraḥ śarīre kṛśatāṃ gataḥ //
kṣayaṃ ninye'tha saṃkṣīṇakṣudrakṣubhitavīkṣaṇaḥ

itthaṃ nirvīryadeho'sau babhūvāṃdha kadānavaḥ //
sarvāṃ saṃhṛtya māyāṃ yo balaṃ kṣīṇamathākarot

tīvraṃ bhayaṃ samāsādya prāṇatrāṇaparāyaṇaḥ //
dṛṣṭvā nānyāṃ gatiṃ loke daityastuṣṭāva śaṃkaram

kṛtāṃjalipuṭo bhūtvā romāṃcitaśarīrakaḥ //
sāttvikaṃ bhāvamāpannastyaktvā caiva rajastamaḥ

lokānāṃ kāraṇaṃ devaṃ vibudhādhi patiṃ prabhum //
śaśvadbuddhyānvito bhaktyā nirmalenāṃtarātmanā

ślāghyaṃ śivaṃ ca tuṣṭāva devaṃ caṃdrārdhaśekharam

// aṃdhaka uvāca // //
kṛtsnasya yo'sya jagataḥ sacarācarasya kartā kṛtasya ca tathā sukhaduḥkhadātā//
saṃsāraheturapi yaḥ punaraṃtakāle taṃ śaṃkaraṃ śaraṇadaṃ śaraṇaṃ vrajāmi

yaṃ yogino vigatamohatamorajaskā bhaktyaikatānamanaso vinivṛttakāmāḥ //
dhyāyaṃti ye'khiladhiyo'mitadivyabhūtiṃ taṃ śaṃkaraṃ śaraṇadaṃ śaraṇaṃ vrajāmi

yaścaṃdrakhaṃḍamamalaṃ vilasanmayūkhaṃ baddhvā sadā surasaricchirasā bibharti //
yasyārdhadehamabhajadgirirājaputrī taṃ śaṃkaraṃ śaraṇadaṃ śaraṇaṃ vrajāmi //

yaḥ siddhacāraṇaniṣevitapādapadmo gaṃgāṃ mahormiviṣamāṃ gaganātpataṃtīm //
mūrdhnā dadhe srajamiva trijagatpunaṃtīṃ taṃ śaṃkaraṃ śaraṇadaṃ śaraṇaṃ vrajāmi

kailāsaśailaśikharaṃ pravikaṃpyamānaṃ kailāsaśṛṃgasadṛśena daśānanena //
yaḥ pādapadmaparipīḍanasevyamānastaṃ śaṃkaraṃ śaraṇadaṃ śaraṇaṃ vrajāmi

dakṣādhvare ca nayane ca tathā bhagasya pūṣṇastathā daśanapaṃktimaśātayadyaḥ //
vyaṣṭaṃbhayatkuliśahastamatheṃdramīśaṃ taṃ śaṃkaraṃ śaraṇadaṃ śaraṇaṃ vrajāmi

yenāsakṛdditisutāśca danoḥ sutāśca vidyādharoragagaṇāśca varaiḥ samagraiḥ //
saṃyojitā munivarāḥ phalamūlabhakṣāstaṃ śaṃkaraṃ śaraṇadaṃ śaraṇaṃ vrajāmi

evaṃ kṛtepi viṣayeṣvapi saktabhāvā jñānena ca śrutaguṇairapi tena yuktāḥ //
yaṃ saṃśritāḥ sukhabhujaḥ puruṣā bhavaṃti taṃ śaṃkaraṃ śaraṇadaṃ śaraṇaṃ vrajā mi

brahmeṃdraviṣṇumarutāṃ ca saṣaṇmukhānāṃ yo'dādvarānsubahuśo bhagavānmaheśaḥ //
sūtaṃ ca mṛtyuvadanātpunarujjahāra taṃ śaṃkaraṃ śaraṇadaṃ śaraṇaṃ vrajāmi

ārādhitastu tapasā himavannikuṃje dhūmravratena tapasā ca parairagamyaḥ //
saṃjīvanīṃ samadadādbhṛgave mahātmā taṃ śaṃkaraṃ śaraṇadaṃ śaraṇaṃ vrajāmi

krīḍārthameva bhagavānbhuvanāni sapta nānānadīvihagapādapamaṃḍitāni //
sabrahmakāni sasṛje sukṛtābhidhāni taṃ śaṃkaraṃ śaraṇadaṃ śaraṇaṃ vrajāmi

yaḥ savyapāṇikamalāgranakhena devastatpaṃcamaṃ prasabhameva karālaraṃdhram //
brāhmyaṃ śirastaraṇipadmanibhaṃ cakarta taṃ śaṃkaraṃ śaraṇadaṃ śaraṇaṃ vrajāmi

ye tvāṃ surottamaguruṃ puruṣā vimūḍhā jānaṃti nāsya jagataḥ sacarācarasya //
aiśvaryamānavigame'nuśayena paścātte yātanāmanubhavaṃti yathāhameva

yaḥ paṭhetstutimimāṃ śucikarmā yaḥ śṛṇoti satataṃ śivabhaktaḥ //
viprasaṃsadi sadā śubhakarmā sa prayāti śivaloka makhaṃḍam

// sanatkumāra uvāca // //
tasyaivaṃ stuvato devaḥ śūlapāṇirvṛṣadhvajaḥ //
pūrṇe varṣaśatasyāṃte prītaḥ provāca śaṃkaraḥ

putra tuṣṭo'smi bhadraṃ te jātastvaṃ nirmalo'dhunā //
divyaṃ dadāmi te cakṣuḥ paśya māṃ vigatajvaraḥ

yacca te manasā vāpi kiṃcicca kāṃkṣitaṃ phalam //
tattatsarvaṃ pradāsyāmi brūhi dānavasattama

// dānava uvāca // //
brāhmyaṃ vaiṣṇavameṃdraṃ vā padamāvṛttilakṣaṇam //
viditaṃ mama tatsarvaṃ manāgapi na kāṃkṣaye

yadi tuṣṭo'si deveśa gāṇapatyaṃ dadasva me //
saviśeṣaṃ viśuddhaṃ ca tadakṣayyaṃ ca sarvadā

// mahādeva uvāca // //
amaro jarayā tyaktaḥ sarvaduḥkhavivarjitaḥ //
bhaviṣyasi gaṇādhyakṣaḥ sarvalokanamaskṛtaḥ

kāmarūpo mahāyogī mahāsattvo mahābalaḥ //
aṇimādiguṇairyuktaḥ priyaśca mama sarvadā

// sanatkumāra uvāca // //
tataśca soṃ'dhakaḥ śrīmānvarām̐llabdhvā sudurlabhān //
mahādevagaṇo bhūtvā tatraivāṃtaradhīyata

gateṃ'dhake tato devyo brahmāṇyādyāḥ samāgatāḥ //
sa devo yatra bhagavānaṃdhakasya varapradaḥ

tāstaṣṭuvurmahādevamatha tuṣṭo maheśvaraḥ //
cāmuṃḍā ca maheśena samāśvastā śivā'bhavat

śaṃkaraṃ praṇataṃ dṛṣṭvā tāsāmagre vyavasthitam //
brahmādayo'pi te hṛṣṭāstuṣṭuburvividhaiḥ stavaiḥ

praśāṃtāstā yadā hṛṣṭāḥ śaṃbhunā rudhirāśanāḥ//
tadā vocadidaṃ vākyaṃ tāsāṃ sthityarthamuttamam

āvaṃtye viṣaye sarvā yasmājātā mahābalāḥ //
āvaṃtyamātarastasmātkhyātā loke bhaviṣyatha //

avaṃtyāṃ prītisaṃpannāḥ sarvapāpapraṇāśinīḥ //
sthirā vasaṃtyo lokānāṃ varadāśca bhaviṣyatha

śrāvaṇasya tu māsasya amāvāsyāṃ samāhitāḥ //
ye drakṣyaṃti sadā bhaktyā teṣāṃ lokā mahodayāḥ

aputro labhate putrāndhanārthī labhate dhanam //
rūpavānsubhago bhogī sarvaśāstraviśāradaḥ

haṃsayuktena yānena pitṛloke mahīyate //
purīmimāṃ ca rakṣadhvaṃ kalpekalpe krameṇa tu

evamuktvā tu deveśo gataḥ kailāsa parvatam //
stūyamāno gaṇai raudrairdaityāmaragaṇeśvaraiḥ

asurasuragaṇānāṃ nāyakasyānukīrtiṃ kathayati kathanīyāṃ śraddhayā yaḥ śṛṇoti //
sakala sukhanidhānaṃ rudralokaṃ sa kāṃtaṃ suragaṇadanunāthairarcitaṃ yātyanaṃtam

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe'vantīkṣetramāhātmye'ndhakavṛttāṃtavarṇanaṃnāmāṣṭātriṃśo'dhyāyaḥ