Skanda Purana · Chapter 5.37

sanatkumāra uvāca // //
bhinneṃ'dhake triśūlena dhvanī rudrasya nirgataḥ //
tatroṃkāraḥ samutpanno devadevo maheśvaraḥ

tatra snātvā śucirbhūtvā samādhiniyamena ca //
dṛṣṭvoṃkāraṃ mahādevaṃ mucyate sarvapātakaiḥ

hatvāṃdhake triśūlaśca bhogavatyā jale yayau //
dṛṣṭvā śūlaṃ sutejaskaṃ hāṭako vismayaṃ gataḥ //
papraccha kena kāryeṇa bhavāniha samāgataḥ

kathayāmāsa śūlosau śaṃkareṇāhamīritaḥ //
aṃdhakasya vadhārthāya pāpavṛtteḥ sudu rmateḥ

bhittvā tamahamāyāto bhogavatyā jale śubhe //
gamiṣyāmi punastatra yatra tiṣṭhati śaṃkaraḥ

śūloktaṃ vacanaṃ śrutvā parameśadidṛkṣayā //
hāṭakaḥ śūlamārgeṇa nirjagāma javena saḥ //
bahuvaktrasamākīrṇaṃ suprabhaṃ sumanoramam

taṃ dṛṣṭvā tridaśāḥ sarve śūleśaṃ hāṭakeśvaram///
praṇamya hṛṣṭaromāṇo yathā protphullapaṃkajam

tuṣṭuvurvividhaiḥ stotrairbrahmaviṣṇupurogamāḥ //
hāṭakeśvaranāmāsītpātāle yo vyavasthitaḥ

nirgataḥ śūlamārgeṇa tena śūleśvaraḥ smṛtaḥ //
dhūtapāpaṃ ca yattīrthaṃ devadevasya cottare

tatra pāpaḥ sa daityeṃdro dhūtaḥ śūlena vīryavān //
tena tīrthamidaṃ vyāsa dhūtapāpaṃ nigadyate

aṣṭamyāṃ vā paurṇamāsyāṃ caturdaśyāṃ śanau tathā //
upoṣya rajanīmekāṃ śivabhakto jiteṃdriyaḥ

dhūtapāpaṃ tu yaḥ paśyeddevadevaṃ maheśvaram//
vimuktaḥ sarvapāpaiḥ sa saptajanmakṛtairapi

kulānāṃ śatamuddhṛtya śivalokaṃ ca gacchati //
kṛtābhiṣekaṃ yaḥ paśyetpauṣe māsi sa vai naraḥ

śūleśvaraprabhāvena mucyate brahmahatyayā //
vimānānāṃ sahasreṇa mṛto yāti paraṃ padam

iti cāṃdhakaśūloyaṃ yāvadbhogavatīṃ gataḥ //
tāvatsamutthitā ghorā asurā rudhirodbhavāḥ

khaḍgahastā mahāvīryā anekaśatasaṃkhyayā //
caturdikṣu sthitairghorairhanya māno maheśvaraḥ //
siṃhanādaṃ mumocātha pīḍitastairdurātmabhiḥ

siṃhanādena te pāpā mūrchitāḥ patitā bhuvi //
punaḥ samutthitā jagmurdevadevaṃ maheśvaram //
vitrastāśca tato devā brahmaviṣṇupurogamāḥ

asādhyāṃstāṃstathā matvā maṃtraṃ kṛtvā hitaiṣiṇaḥ //
tato devā vicāryātha strīṃ sṛjāma iti svayam

ityuktvotpādayāmāsa brahmā haṃsāsanāṃ śubhām //
caturvaktrāṃ caturhastāṃ brahmāṇīṃ rūpadhāriṇīm

kumāraścaiva kaumārīṃ mayūravaravāhanām //
raktamālyābaradharāṃ śaktikukkuṭadhāriṇīm

punaḥ kumāraḥ kaumārīṃ pakṣīṃdravaravāhanām //
kṛṣṇāṃ karāladaśanāṃ dharmarājasya vāhanīm

daityadehapramathanīṃ daṃḍamudgaradhāriṇīm //
lalāṭalocanāṃ nīlāṃ kapālakarabhūṣitām

siṃhājinadharāṃ kṛṣṇāṃ sarvabhūṣaṇabhūṣitām//
kartrīhastāṃ khaḍgahastāṃ kheṭakhaṭvāṃgadhāriṇīm //
carmāsthikeśavapuṣaṃ cāmuṃḍāmamṛjatprabhuḥ

vaṭasya nikaṭe pūrvaṃ nirmitā lokamātaraḥ //
tato loke suvikhyātāḥ pratyakṣā vaṭamātaraḥ

tatra snātvā śucirbhūtvā mātṝḥ paśyati yo naraḥ //
sa muktaḥ sarvapāpebhyo mātṛloke mahīyate

siṃhanādo'pi devena kṛto yatra mahāmune //
tatra siṃheśvaro devaḥ sarvaduṣkṛtanāśanaḥ

darśanāttasya devasya siṃhavatsa balī bhavet //
siṃhanāde kṛte yatra jātaṃ kaṇṭakitaṃ vapuḥ

tatra kaṇṭeśvaro devo bhaktānāṃ sarvadaḥ sadā //
tatra tīrthe naraḥ snātvā dṛṣṭvā kaṇṭeśvaraṃ śivam

grahabhūtapiśācebhyo na bhayaṃ prāpnuyātkvacit //
tatastā mātaraḥ sarvā ādiṣṭāstu hareṇa vai

andhāsurasya raudrasya pibadhvaṃ rudhiraṃ drutam //
etasminnantare vyāsa prajvalajjvalanopamaḥ

abhayaṃ śakra mā bhaistvaṃ yatrovāceti śaṃkaraḥ //
tatra liṃgaṃ samudbhūtamabhayeśvaramuttamam

vaṃditaṃ devagaṃdharvaiḥ siddhavidyādharoragaiḥ //
tatra snātvā śucirbhūtvā sopavāso jitendriyaḥ

arcaye ddevadeveśamaśvamedhaphalaṃ labhet //
bhūtapretapiśācebhyo bhayaṃ tasya na vidyate

siṃhayuktena yānena śivalokaṃ sa gacchati //
andhakasya tu yā māyā raktāsurasamudbhavā

mātṛbhiryudhyamānābhiḥ kṣayamāśu jagāma sā //
devyaḥ pibantyo raktaughaṃ daiteyatanutaścyutam

ṣaṭtṛptiṃ paramā jagmurna tu tṛptā lalāṭajā //
hatamāyaḥ śiṣṭakastu bhinnaśūlatanucchadaḥ

uttarābhimukhaṃ śūlamaṃdhako'karṣayadbalī //
saṃniruddho mahādeho vārito gaṇapena saḥ

mahāvināyakaḥ khyātastasmālloke'bhavanmune //
darśanāttasya devasya na vighnaiḥ pīḍyate naraḥ

māsemāse caturthyāṃ yo gaṇeśaṃ pūjayeddvija //
na tasya vighnaṃ jāyeta iha loke paratra ca

svedabiṃduratho tasya lalāṭādapatadbhuvi //
tasmādaṃgārako jāto raktamālyānulepanaḥ

āvantye viṣaye jāto lohitāṃgo dharāsutaḥ //
aṃgārakastu raktākṣo mahādevasutastathā

nāmabhirbrahmaṇā stutvā grahamadhye'dhiropitaḥ //
tatra tīrthamathotpannamaṃgāreśvaramuttamam

brahmaṇā sthāpitaṃ liṃgaṃ gaṇagaṃdharvasevitam //
śucistatra ca yaḥ snāti naro hyaṃgāravāsare

dṛṣṭvāṃgāreśvaraṃ sotha mucyate sarvapātakaiḥ //
caturthyāṃ maṃgaladine nakte cārghyaṃ nivedayet

yāvatpūrṇāścatasraḥ syustāvatkāryāḥ prayatnataḥ //
pañca vai karakāḥ kāryāstāmrapātreṇa saṃyutāḥ

guḍapīṭhamayāḥ kāryā raktavastrasamanvitāḥ //
raktacaṃdanasaṃyuktā raktapuṣpaiśca pūjitāḥ

tilataṇḍulasaṃpūrṇamekaṃ tatraiva kārayet //
dvitīyaṃ laḍḍukaiścaiva tṛtīyaṃ payasā tathā

uttarībhiścaturthaṃ ca pañcamaṃ mūlakaistathā //
kṛtvā hyevaṃ vidhānena maṃtreṇārghyaṃ nivedayet

kujāya lohitāṃgāya grahamaghyasthitāya ca //
kārtikeyānurūpāya surūpāya namo namaḥ

śivalalāṭasaṃbhūta dharaṇīgarbhasaṃbhava //
rūpārthaṃ tvāṃ prapannosmi gṛhāṇārghyaṃ namo'stu te

jvalitāṃgāravarṇābha snigdhavidrumabhā sura //
putrārthī tvāṃ prapannosmi gṛhāṇārghyaṃ dharātmaja

āvantyamaṇḍale jāto dharaṇyāṃ ca śivena vai //
putraṃ dehi dhanaṃ dehi yaśo dehi namo'stu te

evaṃ saṃpūjito bhaumaścaturthyāṃ munisattama //
bhuktvā bhogāṃstathā putrānprāpya vai kṣitimaṃḍale

mṛtaḥ svargamavāpnoti yāvadindrāścaturdaśa

iti śrīskāṃde mahāpurāṇa ekāśītisāhasryāṃ saṃhitāyāṃ paṃcama āvaṃtyakhaṇḍe'vantīkṣetramāhātmye'ṅgārakīcaturthī vratamāhātmyavarṇanaṃnāma saptatriṃśo'dhyāyaḥ