Skanda Purana · Verses 5.36-3

mārkaṇḍeya uvāca -
tato gacchecca rājendra dārutīrthamanuttamam /
dāruko yatra saṃsiddha indrasya dayitaḥ purā

yudhiṣṭhira uvāca -
dārukeṇa kathaṃ tāta tapaścīrṇaṃ purānagha /
vidhānaṃ śrotumicchāmi tvatsakāśāddvijottama

śrīmārkaṇḍeya uvāca -
hanta te kathayiṣyāmi vicitraṃ yatpurātanam /
vṛttaṃ svargasabhāmadhye ṛṣīṇāṃ bhāvitātmanām

sūto vajradharasyeṣṭo mātalirnāma nāmataḥ /
sa putraṃ śaptavānpūrvaṃ kasmiṃścitkāraṇāntare

śāpāhato vepamāna indrasya caraṇau śubhau /
prapīḍya mūrdhnā deveśaṃ vijñāpayati bhārata

tamuvācābhiśaptaṃ cāpyanāthaṃ ca sureśvaraḥ /
karmaṇā kena śāpasya ghorasyānto bhaviṣyati

narmadātaṭamāśritya toṣayanvai maheśvaram /
tiṣṭha yāvadyugasyāntaṃ punarjanma hyavāpsyasi

punarbhūtvā tu pūtastvaṃ dāruko nāma viśrutaḥ /
saṃsevya paramaṃ devaṃ śaṅkhacakragadādharam

mānuṣaṃ bhāvamāpannastataḥ siddhimavāpsyasi /
evamuktastu devena sahasrākṣeṇa dhīmatā

praṇamya śirasā bhūmimāgato'sau hyacetanaḥ /
narmadātaṭamāśritya karṣayannijavigraham

vratopavāsasaṃkhinno japahomarataḥ sadā /
mahādevaṃ mahātmānaṃ varadaṃ śūlapāṇinam

bhaktyā tu parayā rājanyāvadābhūtasamplavam /
aṃśāvataraṇādviṣṇoḥ sūto bhūtvā mahāmatiḥ

toṣayan vai jagannāthaṃ tato yāto hi sadgatim

eṣa tatsambhavastāta dārutīrthasya suvrata /
kathito'yaṃ mayā pūrvaṃ yathā me śaṅkaro'bravīt

tato yudhiṣṭhiraḥ śrutvā vismayaṃ paramaṃ gataḥ /
bhrātḥn vilokayāmāsa hṛṣṭaromā muhurmuhuḥ

śrīmārkaṇḍeya uvāca -
tasmiṃstīrthe naraḥ snātvā vidhipūrvaṃ nareśvara /
upāsya saṃdhyāṃ deveśamarcayedyaśca śaṅkaram

vedābhyāsaṃ tu tatraiva yaḥ karoti samāhitaḥ /
so'śvamedhaphalaṃ rājaṃllabhate nātra saṃśayaḥ

tasmiṃstīrthe tu yo bhaktyā bhojayedbrāhmaṇāñchuciḥ /
sa tu viprasahasrasya labhate phalamuttamam

snānaṃ dānaṃ japo homaḥ svādhyāyo devatārcanam /
yatkṛtaṃ śuddhabhāvena tatsarvaṃ saphalaṃ bhavet

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe dārukatīrthamāhātmyavarṇanaṃ nāma ṣaṭtriṃśo'dhyāyaḥ //