Skanda Purana · Verses 5.36-2

// śrīhara uvāca // //
mārkaṇḍeyeśvaraṃ viddhi ṣaṭtriṃśattamamīśvaram //
yasya darśanamātreṇa putravāñjāyate naraḥ

brahmavaṃśasamutpanno mṛkaṇḍonāma tāpasaḥ //
vedādhyayanasaṃpannaḥ sa cāputro babhūva ha

putrārthaṃ cintayāmāma kathaṃ putro bhavediti //
aputrasya kuto loka iti vedeṣu paṭhyate

tasmāttapaḥ kariṣyāmi yena me tanayo bhavet //
evaṃ saṃcitya bahudhā sa jagāma himālayam

cakāra vasatiṃ cāpi tapase bhāvitātmavān //
vāyubhakṣoṃbubhakṣaśca nirāhārordhvapādakaḥ

śākamūlaphalāhāraḥ parṇāśyekadviparṇabhuk //
evamādīni cānyāni tapāṃsi subahūnyapi

cakāra sa munistatra varṣāṇi dvādaśaiva tu //
na tuṣṭo'haṃ tadā devi tapasā duṣkareṇa tu

tato jñātvā matiṃ tasya vijñapto'haṃ tadā tvayā //
karotyeva tapaḥ krūraṃ putrahetormunirmahān

tejasā dīpayañchailaṃ śoṣayansalilāśayān //
tapasā duṣkareṇaiva kṣubhitā nākavāsinaḥ

samudrāḥ kṣubhitāḥ sarve candrādityau tathaiva ca //
ṛṣayo vismṛtiṃ prāptāḥ kaṃpete cāpi rodasī //
akālapralayo deva bhaviṣyati na saṃśayaḥ

munaye tanmṛkaṇḍāya putro vai dīyatāmiti//
mayā proktaṃ varārohe putramicchatyayonijam

akṣayaṃ suviśālākṣi sahasrākṣamivāparam //
candrābhaṃ candravadanaṃ candravadbhuvanapriyam

nīlotpaladalaśyāmaṃ nīlotpaladalekṣaṇam //
viśālacārujaghanaṃ cārukuṇḍalamaṃḍitam //
putramicchati deveśi mṛkaṇḍo'yaṃ mahāmuniḥ

tvayāpyuktaṃ punardevi kāruṇyādbhaktivatsale //
na dadāsi muneḥ putraṃ tapyato viṣamaṃ tapaḥ

phalasya dātā tapasāṃ kathaṃ tvaṃ gīyase budhaiḥ //
kastvāṃ nu śaraṇaṃ gacchellokānāṃ sambhavaṃ bhavam

karoṣi sarvadaityānāṃ sarvadevākulākulam //
tvayāhaṃ suciraṃ devaṃ satkṛtā karuṇākara

nānyo māmanukampārthaṃ prayacchetpravaraṃ varam //
sa tvaṃ sarvajagannātha prabhuḥ karttā praśāsitā

hetuḥ svāmī maheśāno dayālurbhaktavatsalaḥ //
sarveśvara stuto'bhīṣṭaṃ kiṃ na viprāya dīyate

tapasā kṣīṇapāpasya brahmatve bhāvitātmanaḥ //
asya putrapradānaṃ tvaṃ kuru madvacanācchiva

mayā tvaṃ varṇitā devi snehākṣarapadaiḥ śubhaiḥ //
lolapaṃkajapatrākṣi gauri bhūdharagātraje

skaṃdamātaḥ kalāpūrṇacaṃdrabimbanibhānane //
kṛśodari viniḥspṛṣṭacāmīkaranibhadyute

tvayoktaṃ prakariṣyāmi vākyaṃ dviradagāmini //
tvaṃ siddhiḥ sādhakā sādhyaṃ tvaṃ kriyā prakramāśrayā

tvaṃ māyā śrīrdyutiḥ śrīmacchraddhārucirasaṃtatiḥ //
kṛtvā mānaṃ bahuvidhaṃ mayaiva saha sundari

bhrājase vividhākārā mohayitvākhilaṃ jagat //
tvayāpyuktaṃ punardevi kriyatāṃ tu vaco mama

munaye'smai tapaḥkṣīṇasarvagātrāya sāṃpratam //
varaḥ pradīyatāmasmai brāhmaṇāya maheśvara

mayāpyuktaṃ viśālākṣi śrūyatāṃ vacanaṃ mama //
asau gacchatu vipreṃdro mahākālavanottame

pattaneśvarapūrve tu tatrāste liṃgamuttamam //
putrapradaṃ viśālākṣi mahāpātakanāśanam

madīyaṃ vacanaṃ śrutvā tvayāpyukto dvijottamaḥ //
mahākālavanaṃ gaccha putrārthamṛṣi sattama //
tatra liṃgaṃ samārādhya lapsyase putramuttamam

tvayā saṃprerito viprastatheti kṛtaniścayaḥ //
āśayā parayā yuktaḥ putrakāmo jagāma saḥ

tatra dṛṣṭvā mahāliṃgaṃ putradaṃ pāpanāśanam //
bhaktyā saṃsevayāmāsa tapasā duṣkareṇa tu

atha kenāpi kālena niḥsṛto'haṃ tvayā saha//
liṃgamadhyādvarārohe sa ca prokto dvijottamaḥ

śarvo'hamiti jānīhi brūhi kiṃ karavāṇi te //
āvāṃ purā prasannau te jñātaṃ tava viceṣṭitam

yamicchasi varaṃ brahmaṃstadadya pradadāmi te //
mayā proktaḥ prasannena muniḥ paramavismitaḥ

prahvaḥ prāha suhṛdaye sa hṛṣṭo muni sattamaḥ //
apatyahetordeveśau kimalabhyaṃ bhavenmama

mayā proktastadā devi mṛkaṇḍo munisattamaḥ //
ayonijaste tanayo mānuṣo vai bhavi ṣyati //
aiśvaryajñānasaṃpanno dīrghāyuḥ sarvavitsudhīḥ

etasminnaṃtare devi prādurbhūto mahātapāḥ //
putraḥ paramadharmātmā mārkaṇḍeyo mahāmuniḥ //

sa jātamātro dharmātmā tatraiva tapasi sthitaḥ //
devamārādhayāmāsa sa tuṣṭo'tha varaṃ dadau

tvayāhaṃ jātamātreṇa tapasā toṣito yataḥ //
tasmātkhyātiṃ gamiṣyāmi tvannāmnā dvijasattama

ye māṃ paśyaṃti vipreṃdra bhaktyā paramayā yutāḥ //
prāpnuvaṃti gatiṃ nityaṃ te sadānaṃda dāyinīm

prasaṃgādye gamiṣyaṃti te sadā duḥkhavarjitāḥ //
devadevaṃ samārādhya modiṣyaṃti hi te narāḥ

tryakṣā gaṇeśvarāḥ siddhāḥ siddhagaṃdharvasevitāḥ //
te bhaviṣyaṃti satataṃ mama bhaktāśca ye narāḥ

ye māṃ saṃpūjayiṣyaṃti hṛdyaiḥ puṣpaiḥ sugaṃdhibhiḥ //
dīrghāyuṣo bhaviṣyaṃti sadā duḥkhavivarjitāḥ

ityukte tena liṃgena mārkaṇḍeyo mahātapāḥ //
tapaścacāra tatraiva mahākālavane sthitaḥ

prabhāvaḥ kathito devi mārkaṃḍeyeśvarasya ca //
śiveśvarasya devasya māhātmyaṃ śṛṇu sāṃpratam

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṅgamāhātmye mārkaṃḍeyeśvaramāhātmyavarṇanaṃnāma ṣaṭtriśo'dhyāyaḥ