સ્કંદ પુરાણ · શ્લોક 5.36-3

માર્કણ્ડેય ઉવાચ -
તતો ગચ્છેચ્ચ રાજેન્દ્ર દારુતીર્થમનુત્તમમ્ ।
દારુકો યત્ર સંસિદ્ધ ઇન્દ્રસ્ય દયિતઃ પુરા

યુધિષ્ઠિર ઉવાચ -
દારુકેણ કથં તાત તપશ્ચીર્ણં પુરાનઘ ।
વિધાનં શ્રોતુમિચ્છામિ ત્વત્સકાશાદ્દ્વિજોત્તમ

શ્રીમાર્કણ્ડેય ઉવાચ -
હન્ત તે કથયિષ્યામિ વિચિત્રં યત્પુરાતનમ્ ।
વૃત્તં સ્વર્ગસભામધ્યે ઋષીણાં ભાવિતાત્મનામ્

સૂતો વજ્રધરસ્યેષ્ટો માતલિર્નામ નામતઃ ।
સ પુત્રં શપ્તવાન્પૂર્વં કસ્મિંશ્ચિત્કારણાન્તરે

શાપાહતો વેપમાન ઇન્દ્રસ્ય ચરણૌ શુભૌ ।
પ્રપીડ્ય મૂર્ધ્ના દેવેશં વિજ્ઞાપયતિ ભારત

તમુવાચાભિશપ્તં ચાપ્યનાથં ચ સુરેશ્વરઃ ।
કર્મણા કેન શાપસ્ય ઘોરસ્યાન્તો ભવિષ્યતિ

નર્મદાતટમાશ્રિત્ય તોષયન્વૈ મહેશ્વરમ્ ।
તિષ્ઠ યાવદ્યુગસ્યાન્તં પુનર્જન્મ હ્યવાપ્સ્યસિ

પુનર્ભૂત્વા તુ પૂતસ્ત્વં દારુકો નામ વિશ્રુતઃ ।
સંસેવ્ય પરમં દેવં શઙ્ખચક્રગદાધરમ્

માનુષં ભાવમાપન્નસ્તતઃ સિદ્ધિમવાપ્સ્યસિ ।
એવમુક્તસ્તુ દેવેન સહસ્રાક્ષેણ ધીમતા

પ્રણમ્ય શિરસા ભૂમિમાગતોઽસૌ હ્યચેતનઃ ।
નર્મદાતટમાશ્રિત્ય કર્ષયન્નિજવિગ્રહમ્

વ્રતોપવાસસંખિન્નો જપહોમરતઃ સદા ।
મહાદેવં મહાત્માનં વરદં શૂલપાણિનમ્

ભક્ત્યા તુ પરયા રાજન્યાવદાભૂતસમ્પ્લવમ્ ।
અંશાવતરણાદ્વિષ્ણોઃ સૂતો ભૂત્વા મહામતિઃ

તોષયન્ વૈ જગન્નાથં તતો યાતો હિ સદ્ગતિમ્

એષ તત્સમ્ભવસ્તાત દારુતીર્થસ્ય સુવ્રત ।
કથિતોઽયં મયા પૂર્વં યથા મે શઙ્કરોઽબ્રવીત્

તતો યુધિષ્ઠિરઃ શ્રુત્વા વિસ્મયં પરમં ગતઃ ।
ભ્રાત્ઃન્ વિલોકયામાસ હૃષ્ટરોમા મુહુર્મુહુઃ

શ્રીમાર્કણ્ડેય ઉવાચ -
તસ્મિંસ્તીર્થે નરઃ સ્નાત્વા વિધિપૂર્વં નરેશ્વર ।
ઉપાસ્ય સંધ્યાં દેવેશમર્ચયેદ્યશ્ચ શઙ્કરમ્

વેદાભ્યાસં તુ તત્રૈવ યઃ કરોતિ સમાહિતઃ ।
સોઽશ્વમેધફલં રાજંલ્લભતે નાત્ર સંશયઃ

તસ્મિંસ્તીર્થે તુ યો ભક્ત્યા ભોજયેદ્બ્રાહ્મણાઞ્છુચિઃ ।
સ તુ વિપ્રસહસ્રસ્ય લભતે ફલમુત્તમમ્

સ્નાનં દાનં જપો હોમઃ સ્વાધ્યાયો દેવતાર્ચનમ્ ।
યત્કૃતં શુદ્ધભાવેન તત્સર્વં સફલં ભવેત્

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે દારુકતીર્થમાહાત્મ્યવર્ણનં નામ ષટ્ત્રિંશોઽધ્યાયઃ ॥