Skanda Purana · Verses 5.35-2

// śrīmahādeva uvāca // //
paṃcatriṃśattamaṃ devarmidreśvaramanuttamam //
mahāsiddhipradaṃ devi brahmahatyāvināśanam

āsītprajāpatistvaṣṭā tasya putraḥ kuśadhvajaḥ //
svakarmanirato dāṃto vāsavena nipātitaḥ

tasya putraṃ hataṃ śrutvā tvaṣṭā kruddhaḥ prajāpatiḥ //
avalucya jaṭāmekāmidaṃ vacanamabravīt

adya paśyaṃtu me vīryaṃ trayo lokāḥ sadevatāḥ //
sa ca paśyatu durbuddhirbrahmahā pākaśāsanaḥ

svakarmanirato yena matsuto vinipātitaḥ //
ityuktvā koparaktākṣo jaṭāmagnau juhāva tām

tato vṛtraḥ samuttasthau jvālāmālāsamākulaḥ //
mahākāyo mahādaṃṣṭro bhinnāṃjanacayaprabhaḥ

iṃdraśatrurameyātmā tvaṣṭustejo'bhibṛṃhitaḥ //
ahanyahani so'varddhadiṣupātaṃ mahābalam

vadhāya cātmano dṛṣṭvā vṛtraṃ śakro mahāsuram//
ciṃtayāmāsa sahasā kiṃ kṛtaṃ sukṛtaṃ bhavet

etasminnaṃtare prāpto vṛtro balavatāṃ varaḥ //
dadarśa vāsavaṃ tatra devaiḥ sārddhaṃ varānane

daityo vṛtro mahākāyaścakre saṃgrāmamulbaṇam //
nānāśastrāstrasaṃkṣobhaṃ bhaṭasaṃghaṭṭasaṃkaṭam

chinnabhinnatanutrāṇakrodharaktadharātalam //
lūnānanābjaprakaraṃ karapallavadurgamam

kabaṃdhasaṃghaghaṭanaṃ ghaṭitāmarasainikam //
vikīrṇābharaṇasphītasphuradyodhāṃgabhūṣaṇam

kallolarudhirodgārapāṭalīkṛtadiṅmukham //
tasminraṇe mahābhīme devānbhittvā saguhyakān

vāsavaṃ baṃdhayitvā tu svargalokaṃ jagāma ha //
rājyaṃ cakāra niḥśaṃko nissapatnaṃ varānane

tatastu baddhe deveṃdre bṛhaspatirudāradhīḥ //
ājagāma tamuddeśaṃ yatra baddhaḥ śatakratuḥ

dṛṣṭvā tathāvidhaṃ śakramāśīrbhirabhinaṃdya ca //
baṃdhanānmocayitvā tu provācedaṃ vacastadā

anukūlo na kāloyaṃ sureśasya tavādhunā //
udyogaḥ sumahāndṛṣṭaḥ saṃghātaśca suradviṣām //
dṛṣṭā hi pravarāḥ sarve mayā tatra mahāsurāḥ

ekaikopi vijetuṃ tvāṃ śaktaḥ syāditi me matiḥ //
na tādṛksaṃgamaḥ śakra kadācitsuravidviṣām //
dṛṣṭo vāpi śruto vāpi yādṛśo hyavalokitaḥ

bṛhaspativacaḥ śrutvā śakraḥ saṃbhramamāgamata //
dhyātvā muhūrttaṃ provāca bṛhadbuddhe bṛhaspate

kimatra pratikarttavyaṃ vada tāvadbṛhaspate //
bahavo balavaṃtaśca dānavāḥ svalpakairdinaiḥ//
matsakāśaṃ sameṣyaṃti sa ca vṛtro mahā balaḥ

iti śakravacaḥ śrutvā bṛhaspatiruvāca tam //
upāyaḥ kriyatāṃ tūrṇaṃ gaccha śakra mamājñayā

mahākālavane ramye khaṃḍeśvarasya dakṣiṇe //
sarvasaṃpatkaraṃ liṃgaṃ vidyate tatra vāsava

tadārādhaya yatnena tatte kāmaṃ pradāsyati //
bṛhaspativacaḥ śrutvā śakraḥ śīghrataraṃ gataḥ

mahākālavane devi dṛṣṭvā liṃgamanuttamam //
stutiṃ cakāra sahasā bhaktinamrātmakaṃdharaḥ

namo devādhidevāya śaṃkarāya vṛṣāya ca //
kāmyāya bahurūpāya vyālayajñopavītine //
vareṇyāya namo nityaṃ namaste sarvakāmada

ādyaḥ prajā sṛṣṭikarastvameva kālaḥ prajāḥ saṃharasi tvameva //
apāṃpatirbhūtapatistvameva dhaneśvarastvaṃ dahanastvameva

caṃdraśca sūryaḥ pavana stvameva dhātā vidhātā paramaḥ purāṇaḥ //
jalāśayastvaṃ varuṇastvameva śailottamastvaṃ bhujageśvaraśca //
ḍiṃḍirmahākāla vṛṣastvameva vināyako guhyavarastvameva

itīritāṃ stutiṃ śrutvā liṃgenoktaḥ śatakratuḥ //
gaccha śakra mamādeśānmattejobṛṃhito raṇe //
haniṣyasi na saṃdeho vṛtraṃ ripuvidāraṇa

tasya liṃgasya māhātmyādapāṃ phenena pārvati //
jaghāna samare vṛtraṃ paśyatāṃ tridaśadviṣām

nihatya dānavānpaścāllīlayā raṇakarkaśaḥ //
uvācendrastadā devānhato vṛtro mahāraṇe

trailokyādhyakṣatāṃ prāptā bhavaṃto matparākramāt //
evamuktāstu śakreṇa te devā vismayānvitāḥ

asya devasya māhātmyāddhato vṛtro mahāsuraḥ //
śarīre ca sthitāḥ pāpā darśanātsaṃkṣayaṃ gatāḥ

indreṇārādhito yasmāddevadevo maheśvaraḥ //
tasmādiṃdreśvaronāma khyāto bhuvi bhaviṣyati

darśanādasya liṃgasya purīmiṃdrasya śobhanām //
pāpinopi gamiṣyaṃti sarvapātakavarjitāḥ

yaḥ paśyati naro nityaṃ śrīindreśvarasaṃjñakam //
sa muktaḥ pātakaiḥ sarvairdivi modiṣyate ciram

iṃdreṇārādhitaṃ liṃgaṃ bhaktyā yaḥ pūjayiṣyati //
sa yāti vai paraṃ sthānaṃ divyakalpacatuṣṭayam

yena ceṃdreśvaro devo bhaktyā samyakprapūjitaḥ //
tena viṣṇuprabhṛtayo vayaṃ sarve savāsavāḥ //
munayo lokapālāśca pūjitāḥ syurna saṃśayaḥ

ityuktaḥ sa suraiḥ śakro vaikuṇṭhādyaiḥ samaṃtataḥ //
taireva sahito devo jagāmātha triviṣṭapam

iṃdreśvarasya devasya prabhāvaḥ kathitastvayam //
mārkaṃḍeyeśvaraṃ devaṃ śṛṇu pārvati sāṃpratam

iti śrīskāṃde mahāpurāṇa ekāśītisāhasryāṃ saṃhitāyāṃ paṃcama āvantyakhaṇḍe caturaśītiliṃgamāhātmya indreśvaramāhātmyavarṇanaṃnāma paṃcatriṃśo'dhyāyaḥ