Skanda Purana · Verses 5.33-2

// śrīhara uvāca // //
trayastriṃśattamaṃ devamānaṃdeśvaramīśvaram //
viddhi pāpaharaṃ puṇyaṃ sarvasaṃpatkaraṃ sadā

purā rāthaṃtare kalpe babhūva pṛthivīpatiḥ //
anamitra iti khyātaḥ sārvabhaumo mahītale

dharmātmā mahātmā ca parākramadhano nṛpaḥ //
atītya sarvabhūtāni babhau bhānurivāvyayaḥ

samaḥ śatrau ca putre ca mitre ca paradharmmavit //
giribhadrā gireḥ putrī tenoḍhā varavarṇinī

atīva vallabhā sā ca prāṇebhyo'pi garīyasī //
ānaṃda iti putro'bhūttasya jñānarataḥ sudhīḥ

jātamātro nijotsaṃge sthiramullāpya vai punaḥ //
pariṣvajati hārdena ullāpayati punaḥpunaḥ

sa jātismaraṇo jāto māturutsaṃgamāsthitaḥ //
jahāsa ca tadā mātā saṃkṣubdhā vākyamavravīt

bhītāsmi kimidaṃ vatsa hāso yadvadane tava //
akālabodhaḥ saṃjātaḥ kiṃsvitpaśyasi śobhanam

ityukto mātaraṃ prāha sarvo'pi svārthamīhate //
māṃ netumicchati puro mārjārī kiṃ na paśyasi //
aṃtardhānagatā ceyaṃ dvitīyā jātahāriṇī

putraprītyā ca mātastvamataḥ svārthaṃ samīhase //
ullāpyollāpya bahuśaḥ pariṣvajasi māṃ bata

udbhūte bālake snehātsaṃbhramātstrījano'pyayam //
tatoyamāgato hāsaḥ śṛṇu cāpyatra kāraṇam //

svārthe prasaktā mārjārī lolupā māmavekṣate //
tathāṃtarddhānagā ceyaṃ dvitīyā jātahāriṇī

tvaṃ tu krameṇopabhogyaṃ mattaḥ phalamabhīpsasi //
na māṃ jānāsi ko'pyevaṃ na vai copakṛtaṃ mayā

saṃgatirnāti bālānāṃ paṃcasaptadinātmakam //
tathāpi snihyasi prītyā pariṣva jasi saṃtatam

tateti vatsa bho bhadra ityalīkaṃ bravīṣi mām //
putrasya vacanaṃ śrutvā kruddhā mātā'bravīdidam

nāhaṃ tvāmupakārārthaṃ vatsa prītyā pariṣvaje //
svārtho mayā parityakto yastvatto me bhaviṣyati

ityuktvā sā tamutsṛjya niṣkrāṃtā sūtikāgṛhāt //
jahāra tatparityaktaṃ sā tadā jātahāriṇī

sā hṛtvā taṃ tadā bālaṃ pūrvajātismaraṃ priye //
haiminyāḥ śayane nyasyadvikrāṃtasya mahībhṛtaḥ

matvā svakīyaṃ putraṃ tu vikrāṃtena mahībhṛtā //
kṛtaṃ vai nāmakaraṇamānaṃda iti viśrutam

vikrāṃtasya suto nīto bodhasya ca dvijanmanaḥ //
caitranāmā kṛtastena saṃskṛto vedamaṃtrakaiḥ

tṛtīyaṃ bhakṣayāmāsa bodhaputraṃ niśācarī//
jātismaro'pyathānaṃdaḥ kṛtopanayanastadā

guruṇā samanujñātaṃ kriyatāmabhivādanam //
jananyāḥ prāgupasthānamityukto vākyamabravīt

vaṃdyā me katamā mātā janitrī pālinī ca vā //
ānaṃdasya vacaḥ śrutvā gururvacanamabravīt

nanviyaṃ te mahābhāga janitrī janakātmajā //
vikrāṃtasyāgramahiṣī haiminīnāma nāmataḥ

// // ānaṃda uvāca // //
caitrasya prasavitrīyaṃ caitro'yaṃ dvijaveśmani //
saṃskṛto brāhmaṇairmaṃtrairgiribhadrāsutastvaham

gururāha tataḥ kastvaṃ caitraḥ ko vā tvayocyate //
tataḥ sa kathayāmāsa pūrvavṛttāṃtamāditaḥ

// gururuvāca // //
atīva gahanaṃ vatsa saṃkaṭaṃ mahadāgatam //
na vedmi kiṃcinmohena bhramaṃti mama buddhayaḥ

// ānaṃda uvāca // //
mohasyāvasaraḥ ko'tra jagatyevaṃ vyavasthitaḥ //
kaḥ kasya putro viprarṣe ko vā kasya na bāṃdhavaḥ

ataḥ saṃsāratā haṃti saṃsāraṃ prāṇināmiha //
mahāmohahataṃ cetaścitramatra kathaṃ guro

brahmaputrasya duṣṭasya duḥsahasya sutā bhuvi //
jātahāriṇikānāma parivarttayate sutān

mātṛdvayaṃ mayā prāptamasminneva hi janmani //
mātṛdvayamatho prāptaṃ jātiṃ saṃsmaratā satā

so'haṃ tapaḥ kariṣyāmi caitra ānīyatāmiti //
tataḥ suvismito rājā sabhāryaḥ saha baṃdhubhiḥ

tasmānnivarttya mamatā manumene ca taṃ prati //
caitramānīya tanayaṃ rājyayogyaṃ cakāra saḥ

sanmānya brāhmaṇaṃ yena putrabuddhyā sa pālitaḥ //
so'pyānaṃdastapastepe mahākālavane śubhe

iṃdreśvarasya devasya paścime liṃgamuttamam //
bhaktyā hyārādhayāmāsa tapasā duṣkareṇa tu

tapasyaṃtaṃ tatastaṃ tu devaḥ prāha śucismite //
kimarthaṃ tapyase vatsa tapastīvraṃ bravīmi te

manunā bhavatā bhāvyaṃ ṣaṣṭhena vraja tatkuru //
alaṃ te tapasā tasmiṃstato muktimavāpsyasi

ityukto devadevena tathetyāha mahāmatiḥ //
babhūva sa manurdevi brahmatulyo mahāyaśāḥ

putrānutpādayāmāsa liṃgasyāsya samarcanāt //
kṛtaṃ nāma tadā devairānaṃdeśvaramuttamam

ānaṃdena yataḥ prāptā siddhirdevi sudurllabhā //
ato nāma suvikhyātamānaṃdeśvaramīkṣyatām

ye paśyaṃti viśālākṣi ānaṃdeśvaramīśvaram //
te putrapautrasaṃpannā bhaviṣyaṃti mahītale

yeṣāṃ kṣīṇaṃ nṛṇāṃ pāpaṃ koṭijanmaśatodbhavam //
teṣāṃ bhavati sā bhaktirānaṃdeśvaradarśanāt

tadaiva puruṣo mukto janmamṛtyujarādibhiḥ //
yadā paśyati deveśamānaṃdeśvarasaṃjñakam

mayoktaṃ muktidaṃ nṛṇāmānandeśvaradarśanam //
svargāpavargadaṃ devamānaṃdaṃ liṃgamuttamam //
atra devairviśālākṣi pūjitaṃ liṃgamuttamam //

eṣa te kathito devi prabhāvaḥ pāpanāśanaḥ //
ānaṃdeśvaradevasya śṛṇu tvaṃ kaṃthaḍeśvaram

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmya ānaṃdeśvaramāhātmyavarṇanaṃnāma trayastriṃśo'dhyāyaḥ