Skanda Purana · Chapter 5.33

5.1.33
// sanatkumāra uvāca // //
nārāyaṇo'pi saṃsthāpya śaṃkhaṃ dadhmau prayatnataḥ //
tuṣṭāva prayato bhūtvā stotreṇā nena bhāskaram

// śrīkṛṣṇa uvāca // //
ādityaṃ bhāskaraṃ bhānuṃ raviṃ sūryaṃ divākaram //
divākaraṃ divānāthaṃ tapanaṃ tapatāṃ varam

vareṇyaṃ varadaṃ viṣṇumanaghaṃ vāsavānujam //
balavīryaṃ sahasrāṃśuṃ sahasrakiraṇadyutim

mayūkhamālinaṃ viśvaṃ mārtaṃḍaṃ caṃḍarociṣam //
sadātītaṃ subhāsvaṃtaṃ saptasaptiṃ sukhodayam

devadevamahirbudhnyaṃ dhāmnāṃ nidhimanuttamam //
tapobrahmamayālokaṃ lokapālamapāṃpatim

jagatprabodhajanakaṃ jagadbījaṃ jagatprabhum //
arkaṃ niḥśreyasaparaṃ kāraṇaṃ śreyasāṃ param

inaṃ prabhāviṇaṃ puṇyaṃ pataṃgaṃ pavageśvaram //
dātāraṃ vāṃchitārthānāṃ dṛṣṭādṛṣṭa- phalapradam

gṛhaṃ gṛhakaraṃ haṃsaṃ haridaśvaṃ hutāśanam //
maṃgalyaṃ maṃgalaṃ geyaṃ dhruvaṃ dharmaprabodhanam

bhavasaṃbhāvita bhāvaṃ bhūtabhavyabhavātmakam //
durgamaṃ durgatiharaṃ haranetraṃ trayīmayam

trailokyatilakaṃ tīrthaṃ taraṇiṃ sarvatomukham //
tejorāśisunirvāṇaṃ viśveśaṃ dhāma sāṃpratam

kalpaṃ kalpānalaṃ kālaṃ kālacakraṃ kratupriyam //
bhūṣaṇaṃ marutaṃ sūryaṃ maṇiratnaṃ sulocanam

tvaṣṭāraṃ viṣṭaraṃ viśvaṃ sadasatkarmasākṣikam //
savitāraṃ sahasrākṣaṃ prajāpālamadhokṣajam

brahmāṇaṃ vāsarāraṃbhe raktavarṇaṃ mahādyutim //
śuklaṃ madhyaṃdine rudraṃ śyāmaṃ viṣṇuṃ dinakṣaye

nāmnāmaṣṭaśataṃ divyaṃ viṣṇunā samudāhṛtam //
ya idaṃ prayato bhūtvā paṭhedbhaktyā samāhitaḥ

na tasya vipadaḥ kvāpi sarvatrāpi śubhā gatiḥ //
dhanadhānyasukhāvāptiḥ putralābhaśca jāyate

tejaḥ prajñāṃ paraṃ lābhaṃ jñānaṃ ca labhate gatim //
etacchrutvā jagannātho jagāmādarśanaṃ tataḥ

keśavārkamukhaṃ dṛṣṭvā padmarāgasamaprabham //
vimuktaḥ sarvapāpebhyaḥ sūryaloke mahīyate

keśavārkasamīpe tu reṇutīrthaṃ pracakṣate //
taddṛṣṭvā sarvapāpebhyo mucyate nātra saṃśayaḥ

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe' vantīkṣetramāhātmye keśavādityamāhātmyavarṇanaṃnāma trayastriṃśo'dhyāyaḥ