Skanda Purana · Verses 5.29-2

// śrīhara uvāca // //
ekonatriṃśataṃ viddhi devaṃ rāmeśvaraṃ priye //
yasya darśanamātreṇa mucyate brahmahatyayā

purā tretāyuge devi rāmaḥ śastrabhṛtāṃ varaḥ //
śūraḥ sarvaguṇopetaḥ pitṛbhakto babhūva ha

reṇukāgarbhasaṃbhūtaḥ svayaṃ rāmo babhūva ha //
viṣṇurevāvatīrṇo'sau bhṛgoḥ śāpātsudustarāt

sa kadācinniyukto'sau muninā jamadagninā //
śiraśchindhītyuvācedaṃ mātuste vipulaṃ suta

sa piturvacanaṃ śrutvā bhrātṝṇāṃ mātureva ca //
śirāṃsi cicchide rāmo jamadagnirvaraṃ dadau

sarveṣāṃ pṛthivīśānāṃ tvamajeyo bhaviṣyasi //
sarvakṣayakaro bhāvī na cirādeva bhārgava

gṛhāṇa paraśuṃ putra vahnijvālodbhavaṃ dṛḍham//
anena śitaśastreṇa tataḥ khyāto bhavi ṣyati

atha kenāpi kālena kārttavīryārjuno nṛpaḥ //
haihayānāṃ kule jātaḥ sahasrabāhuviśrutaḥ

jaghāna jamadagniṃ tu kāmadhenukṛte kudhīḥ //
pitaraṃ nihataṃ dṛṣṭvā rāmaḥ kuddho'bravīdidam

atha paśyaṃtu me vīryaṃ trayo lokāḥ sanātanam //
sa ca paśyatu durbuddhirbrahmahā kṛtavīryajaḥ

matpitā nihato yena satkarmanirataḥ sadā //
tasya bāhusahasraṃ tu chetsyāmīha na saṃśayaḥ

ityuktvā krodharaktākṣaḥ kārttavī ryārjunaṃ bhuvi //
dharṣayitvā yathākāmaṃ krośamānaṃ punaḥpunaḥ

kṛtsnaṃ bāhusahasraṃ ca ciccheda bhṛgunaṃdanaḥ //
paraśvadhena tīkṣṇena jñātibhiḥ sahitaṃ tadā

rathasthaṃ pātayāmāsa jaghāna nṛpatiṃ priye //
triḥsaptakṛtvaḥ pṛthivī tena niḥkṣatriyā kṛtā

kṛtvā niḥkṣatriyāṃ caiva bhārgavaḥ sa mahābalaḥ //
sarvapāpavināśāya vājimedhena ceṣṭavān

tasminyajñe mahādāne dakṣiṇāṃ bhṛgunaṃdanaḥ //
mārīcāya dadau prītaḥ kaśyapāya vasundharām

vāruṇāṃsturagāñchubhrānrathaṃ ca rathināṃ varaḥ //
hiraṇyamakṣayaṃ dhenūrgajeṃdrāśca mahāmatiḥ

tadā tasminmahāyajñe vājimedhe mahāyaśāḥ //
tathāpi na gatā hatyā hyanekaprāṇisaṃbhavā

evaṃ kila purāṇeṣu sarvāgamabhidādiṣu //
viśvastaghātināṃ caiva niṣkṛtiḥ śrūyate yathā

aśvamedhena yajñena brahmahatyā vinaśyati //
athavā dvādaśābdena yadyekā''syā kṛtā bhuvi

mayā punarnṛśaṃsena bahavaḥ prāṇino hatāḥ //
viśvastāśca pramattāśca garbhasthāśca punaḥpunaḥ

striyo vṛddhāśca bālāśca mātā caiva viśeṣataḥ //
iti duḥkhānvito rāmo viṣādaṃ paramaṃ gataḥ

ciṃtayitvā muhūrtaṃ tu gato raivatakaṃ girim //
tathā tapo 'tapaddhoraṃ bahūnvarṣagaṇānpriye

tathāpi na gatā hatyā hyanekaprāṇisaṃbhavā //
atha rāmo jagāmātha mahendre malaye tathā

sahye himālaye ramye puṇye badarikāśrame //
caritvā parvatānsarvānsnānārthaṃ narmadāṃ yayau

yamunāṃ caṃdrabhāgāṃ ca gaṃgāṃ tripathagāminīm //
irāvatīṃ vitastāṃ ca parāṃ carmaṇvatīṃ śubhām

viśālāṃ kapilāṃ durgāṃ gaṃbhīrāṃ gomatīṃ śivām //
godāvarīṃ daśārṇāṃ ca puṇyāṃ bhīmarathīṃ tathā

gayāṃ caiva kurukṣetraṃ naimiṣaṃ puṣkaraṃ tathā //
aṭṭahāsaṃ prabhāsaṃ ca kedāramamareśvaram

kṛtayātro'pi duḥkhārttaściṃtayāmāsa bhārgavaḥ //
na nūnaṃ tīrthamāhātmyaṃ dṛśyate bhuvi sāṃpratam

na gatā brahmahatyā me kṛto dharmo nirarthakaḥ //
mithyā tatkathyate śāstre tīrthadānādibhiḥ śubhaiḥ //
yadi syātsatyametacca naṣṭaṃ jātaṃ kathaṃ mama

etasminneva kāle tu nārado munipuṃgavaḥ //
ājagāma tamuddeśaṃ yatra rāmo vyavasthitaḥ //

viṣaṇṇavadano dīnaściṃtayānaḥ punaḥpunaḥ //
dṛṣṭvā tathāvidho rāmaḥ pratyuvācātha nāradam

bhobho nārada devarṣe śṛṇu me paramaṃ vacaḥ //
jananī nihatā pūrvaṃ piturvākyāhijottama

pituḥ parābhavādbhūmau bhṛmipālā mayā hatāḥ //
garbhā vidāritāḥ strīṇāṃ bālā vṛddhāśca yoṣitaḥ

niraṃtarā hatā lokā viśokenādayālunā //
paścāddhṛṇā samutpannā paralokaṃ mamekṣataḥ

yajñaḥ kṛto'śvamedhaśca dattaṃ dānamanekadhā//
snātohaṃ sarvatīrtheṣu sarvaprasravaṇeṣu ca

parvateṣu tapastaptaṃ hutaṃ japtaṃ niraṃtaram//
brahmahatyāvināśārthaṃṃ kiṃ kiṃ nātra mayā kṛtam

paraṃ naiva gatā hatyā tasmātsarvaṃ nirarthakam

iti tasya vacaḥ śrutvā nārado bhagavānṛṣiḥ //
pratyuvāca hitaṃ satyaṃ ciraṃ dhyātvā vacastadā //
bhobho rāma kimātmānaṃ na smarasyadhunā harim

tvayaiva kathitaṃ pūrvaṃ brahmahatyāvināśanam //
mahākālavane kṣetre kṣetrāṇāmuttamaṃ param //
tasminkṣetre mahāliṃgaṃ brahmahatyāvināśanam

jaṭeśvaro mahābhāga vidyate sarvasiddhidam //
kṛtāvatāra rāma tvaṃ tatra gacchāvilaṃbitama //
nāradasya vacaḥ śrutvā smṛtvā kṣetramanuttamam

jagāma tvaritaṃ devi mahākālavane tataḥ //
liṃgamārādhayāmāsa tato hatyā gatā kṣayam //
liṃgamadhyādahaṃ devi prasanno nirgatastadā

jāmadagnyo mayā proktaḥ kāṃtakāmaṃ dadāmyaham //
sa provāca tato rāmo bhaktinamrātmakaṃdharaḥ //

tvatpādapaṃkaje bhūyādbhaktirme vipulā sadā //
varametaṃ prayacchādya yadi tuṣṭo maheśvara

ityukto'haṃ tadā tena yathā tuṣṭena pārvati //
tasmai dattā mayābhīṣṭā varā kīrttikarā sthitiḥ

adyaprabhṛti te nāmnā devaḥ khyāto bhaviṣyati //
tadā rāmeśvara iti triṣu lokeṣu gīyate

bhaktyā ye pūjayiṣyaṃti devaṃ rāmeśvaraṃ param //
ājanmaprabhavaṃ pāpaṃ teṣāṃ na३yati tatkṣaṇāt

sa eva puṇyavānpūjya iha loke paratra ca //
yaḥ paśyati naro bhaktyā devaṃ rāmeśvaraṃ śivam

ye'numodaṃti devasya darśanaṃ yajanaṃ tathā //
te'pi pāpavinirmuktāḥ prayāṃti mama maṃdiram //

yaccāpi pātakaṃ ghoraṃ brahmahatyāsahasrakam //
tatpāpaṃ vilayaṃ yāti rāmeśvarasamarcanāt

duṣprāpyaṃ yatphalaṃ viprairvājapeyādibhirmakhaiḥ //
prāpyate tatsukhenaiva śrīrāmeśvaradarśanāt

ye hatābhimukhāḥ śūrā goviprārthe raṇājire//
gatirabhyadhikā tebhyo dṛṣṭvā rāmeśvaraṃ śivam //

jitāstena sadā lokā rāmeṇeva jagattrayam //
dṛṣṭaṃ yena sadā bhaktyā liṃgaṃ rāmeśvaraṃ śivam

eṣa te kathito devi prabhāvaḥ pāpanāśanaḥ //
rāmeśvarasya devasya śṛṇu tvaṃ cyavaneśvaram

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtya khaṇḍe caturaśītiliṃgamāhātmye rāmeśvaramāhātmyavarṇanaṃ nāmaikonatriṃśodhyāyaḥ