Skanda Purana · Verses 5.26-2

īśvara uvāca //
viddhi ṣaḍviṃśakaṃ devi devaṃ someśvaraṃ param//
yasya darśanamātreṇa niṣkalaṃko naro bhavet

atrirnāma mahābhāgo brahmaṇo mānasaḥ sutaḥ//
prajāpatirabhūddevi kalpe vārāhasaṃjñake

tasya putro'bhavatsomo dakṣotha mātṛbhāgataḥ//
saptaviṃśatiryāḥ kanyā dākṣāyaṇyaḥ prakīrtitāḥ

somapatnyo hi maṃtavyāstāsāṃ śreṣṭhā tu rohiṇī//
tāmeva bhajate somo netarāṃ iti śuśruma//

itarāḥ procurāgatya dakṣasyāgre yathātatham //
dakṣo'tha sa tadāgatya tamuvāca sa nākarot

yadā na vāritastasthau dakṣaḥ kuddhastadā priye //
śaśāpa somaṃ saṃkruddhaḥ śīghramaṃtarhito bhava

evaṃ śaptastu somo vai tadā hyaṃtarhito'bhavat //
śaśāpa somo dakṣaṃ tu bhavānapi bhaviṣyati //

anekatvaṃ vihāyaitajjaladehaṃ sanātanam //
ataḥ prācetaso dakṣo brahmaputro'pi gīyate

evamaṃtarhitaḥ somo gato vai dakṣaśāpataḥ //
devāśca nāgā yakṣāśca gaṃdharvāḥ pitṛbhiḥ saha //
vairājaṃ brahmasadanaṃ brahmāṇaṃ samupasthitāḥ

tasyāgre kathayāmāsurnamaskṛtya punaḥpunaḥ //
bhagavansarvabhūtānāmādikarttā svayaṃbhuvaḥ

sraṣṭā ca havyakavyānāṃ pāhi naḥ śaraṇāgatān//
devānāṃ vacanaṃ śrutvā jñātvā devaḥ prajāpatiḥ

āśvāsayāmāsa surānsuśliṣṭairvacanāṃbubhiḥ //
avaśyaṃ tridaśāstena prāptavyaṃ karmaṇaḥ phalam

śāpāṃtaṃ bhagavāndevo viṣṇureva kariṣyati //
etacchrutvā tato devā vākyaṃ paṃkajajanmanaḥ //
śaraṇyaṃ śaraṇaṃ viṣṇumupatasthurgatavyathāḥ

brahmaṇā sahitā devi stutiṃ cakruḥ samāhitāḥ //
namaste devadeveśa namaste viśvabhāvana //
namaste'stu hṛṣīkeśa mahāpuruṣapūrvaja

nārāyaṇa jagannātha devāstvāṃ śaraṇaṃ gatāḥ //
tvaṃ hi naḥ paramo dhyeya stvaṃ hi naḥ paramo guruḥ

tvaṃ hi naḥ paramo devo brahmādīnāṃ surottama //
aṃtardhānaṃ gataḥ somo dakṣaśāpājjanārddana

vinā somena cauṣadhyo naṣṭā deva mahītale //
teṣāṃ tadvacanaṃ śrutvā viṣṇurvacanamavravīt

bhayaṃ tyajadhvamamarā abhayaṃ vo dadāmyaham //
naṣṭaṃ caṃdramasaṃ śīghraṃ mānayiṣyāmyasaṃśayam

evamuktvā tu bhagavānvisṛjya tridaśeśvarān //
somaṃ sasmāra sahasā śaṃkhacakragadādharaḥ

yadā smṛto na cābhyeti tadā kruddho janārdanaḥ //
purāṇapuruṣo devo brahmāṇamidamavravīt

devairasurasaṃghaiśca mathyatāṃ kalaśodadhiḥ //
bhaviṣyati punaścaṃdro mathyamāne mahodadhau

amṛtaṃ tatra lapsyadhvaṃ ratnāni vividhāni ca //
tasya tadvacanaṃ śrutvā vāsudevasya pārvati

maṃthānaṃ maṃdaraṃ kṛtvā netraṃ kṛtvā ca vāsukim //
devā mathitumārabdhāḥ samudraṃ nidhimaṃbhasām

somārthe ca purā devi tathaivāsuradānavāḥ //
etairmukhamupāśliṣṭau nāga rājo maherṣyayā

vibudhāḥ sahitāḥ sarve yataḥ pucchaṃ tataḥ sthitāḥ //
ato vai bhagavāndevo yato nārāyaṇastataḥ

śirasyudyamya nāga sya punaḥ punaravākṣipat //
udadhau mathyamāne vai mahāñchabdo babhūva ha

tatra nānājalacarā viniṣpiṣṭā mahādriṇā //
vilayaṃ samupājagmuḥ śataśotha sahasraśaḥ

tasmiṃstu mathite devi prayatnātkeśavasya ca //
prasannātmā samutpannaḥ somaḥ śītāṃśurujvalaḥ

tameva devā manujāḥ pitaraśca yaśasvini //
upajīvaṃti vṛkṣāśca tathaivauṣadhayo vidhum

samutpannamatho dṛṣṭvā bhagavānprāha keśavaḥ //
pālayemāḥ prajāścaṃdra tvaṃ jyeṣṭho jagato bhava

ityukto vāsudevena prajāḥ pālayituṃ śaśī //
pūrvaṃ somopi yo naṣṭaḥ praviṣṭo gahanaṃ vanam

tasyāgre nāradaḥ sarvaṃ kathayāmāsa satvaram //
devarṣervacanaṃ śrutvā nāradasya mahātmanaḥ

pīḍito dakṣaśāpena somo'pyaṃtarhitastadā //
jagāma śaraṇaṃ devi brahmāṇaṃ parameṣṭhinam

tatra gatvā yathāśāpaṃ kathayāmāsa gadgadaḥ //
pūrvacaṃdravacaḥ śrutvā brahmā vacanamabravīt

ayaṃ me prathamaḥ putraḥ pīḍitaḥ śaśinā bhṛśam //
navenodadhijātena kiṃ mayā kriyate punaḥ

viṣṇunā ca balaṃ dattamasmai caṃdramase dṛḍham //
tasmādyāsyāmi tatrāhaṃ yatra devo janārdanaḥ

taṃ dṛṣṭvā madhuhaṃtāraṃ brahmā viṣṇumuvāca ha //
tvadādeśājagannātha eṣa caṃdraḥ kṛto mayā

sa cāyaṃ pīḍito deva śaśāṃkena navena vai //
ityukto brahmaṇā devi vāsudevo jagatpatiḥ //
vṛttāṃtaṃ kathayāmāsa brahmāgre ca punaḥpuna.

brahmāpi pūrvacaṃdrārthe viṣṇuṃ lokanamaskṛtam //
tuṣṭāva praṇato bhūtvā prāṃjaliḥ praṇataḥ sthitaḥ

namaḥ kṛṣṇa namo viṣṇo namo jiṣṇo namonamaḥ //
namo vāmana goviṃda namo'naṃta namo'cyuta

jayasva goviṃda mahānubhāva jayasva viśṇo jaya padmanābha //
jayasva sarvādya gadādhareśa jayasva viśveśvara viśvamūrtte

evaṃ stutastadā devi brahmaṇā lokakāriṇā //
samīpasthaṃ samālokya somaṃ vacanama bravīt

gaccha soma mamādeśānmahākālavanottame //
uttare muktiliṃgasya liṃgaṃ kātikaraṃ param //
tamārādhaya yatnena sa te dehaṃ pradāsyati //

ityukto vāsudevena brahmaṇā ca punaḥ punaḥ //
ājagāma mahādevi mahākālavanottame //
liṃgaṃ dṛṣṭvā ca tuṣṭāva stotreṇānena suvrate

//
// caṃdra uvāca // //
namo devādhidevāya trinetrāya mahātmane //
raktapiṃgalanetrāya jaṭāmukuṭadhāriṇe

bhūtavetālajuṣṭāya mahādevāya śūline //
bhīmāṭṭahāsayuktāya kapardisthāṇave namaḥ

pūṣṇo daṃtavināśāya tathāṃdhakavināśine //
kailāsavaravāsāya sarvadevāyate namaḥ //

vikarālorddhvakeśāya bhairavāya namonamaḥ //
agnijvālākarālāya kalidharmavivāsine

tathā dāruvanadhvaṃsakāriṇe tigmaśūline //
kṛtakaṃkaṇabhogīṃdrakaṃṭhasūtrāya śūline

pracaṃḍadaṃḍahastāya vaḍavāgnimukhāya ca //
vedāṃtavedyāya namo yajñamūrte namonamaḥ

dakṣayajñavināśāya jagadbhayakarāya ca //
viśveśvarāya devāya sthūlasūkṣmāya śaṃbhave //
kapardine karālāya sarvadevāya te namaḥ

evaṃ stutastadā devi caṃdreṇāṃtarhitena ca //
liṃgarūpī mahādevastuṣṭo vākyamathābravīt

stotreṇānena tuṣṭo'smi brūhi soma kimicchasi //
yattebhilaṣitaṃ sarvaṃ tatkarttāsmi na saṃśayaḥ

// soma uvāca // //
yadi tvahamanugrāhyo yadi tuṣṭo'si me prabho //
kāṃtyā dīptyā tathā mūrtyā tathā rūpeṇa ca prabho//

svapadaṃ karttumicchāmi tvatprasādānmaheśvara //
evamastviti liṃgena tatkṣaṇādrajanīcara

dvijarājena tatprāptaṃ liṃgasyāsya prasādataḥ //
somenārādhito yasmāddevadevo maheśvari

tena someśvaronāma vikhyāto bhuvanatraye //
ye'rcayaṃti mahādevi devaṃ someśvaraṃparam

kṛta puṇyā narā martyāste yāṃti paramaṃ padam //
yaḥ paśyati naro bhaktyā liṃgaṃ someśvaraṃ priye

vimukto janmaduḥkhādyairlīyate mayi mānavaḥ //
te narāḥ paśavo loke kiṃ teṣāṃ jīvite phalam

yaiśca someśvaro devo na dṛṣṭo na ca pūjitaḥ //
saṃsāre'sminmahāghore janmarogabhayākule

ekaḥ someśvaraḥ pūjyaḥ kuṣṭharogavināśanaḥ //
sa eva sukṛtī loke kulaṃ tenābhyalaṃkṛtam

ādhāraḥ sarvalokānāṃ yena someśvaro 'rcitaḥ //
sakṛdabhyarcya someśaṃ bilvapatreṇa mānavaḥ //
mukto bhogī nirātaṃko mama loke vasecciram

kāṃcanaiḥ kusumairdevi liṃgaṃ someśvaraṃ priye //
pūjayaṃti narā bhaktyā te yāṃti paramāṃ gatim

eṣa te kathito devi prabhāvaḥ pāpanāśanaḥ //
someśvarasya devasya śṛṇuṣvānarakeśvaram

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśītiliṅgamāhātmye someśvaramāhātmyavarṇanaṃ nāma ṣaḍviṃśo'dhyāyaḥ