Skanda Purana · Verses 5.22-2

// śrīviśvanātha uvāca // //
dvāviṃśatitamaṃ viddhi karkaṭeśvarasaṃjñakam //
yasya darśanamātreṇa tiryagyonirna dṛśyate

āsītpurā bṛhatkalpe dharma mūrtirjanādhipaḥ //
suhṛcchakrasya nihatā yena daityāḥ sahasraśaḥ

somasūryādayo yasya tejasā niṣprabhāḥ kṛtāḥ //
prajāśca pālitā yena nihatya samare dviṣaḥ

yathecchārūpadhārī ca saṃgrāmeṣvaparājitaḥ //
tasya bhānumatīnāma bhāryā trailokyasuṃdarī

rājñastasyāgramahiṣī prāṇebhyo'pi garīyasī //
daśanārīsahasrāṇāṃ madhye śrīriva rājitā

nṛpo nṛpasahasreṇa na kadācitpramucyate //
kadācidekāṃtagataḥ papraccha svapurohitam //
vismayenāvṛtamanā vaśiṣṭhamṛṣisattamam

bhagavankena dharmeṇa mama lakṣmīranuttamā //
kasmācca vipulaṃ tejo duḥsahaṃ mama dṛśyate

//
// vaśiṣṭha uvāca // //
purā tvamavanīpā''sīḥ śūdrajātisamudbhavaḥ //
bahudoṣasamāviṣṭo duṣṭayā bhāryayā'nayā

nivasanduṣṭahṛdayo varṣāṇi subahūnyapi //
mahākrodhābhibhūtātmā sadā niṣṭhurajalpakaḥ

sadā brahmasvahārī tvaṃ sadā vedaviniṃdakaḥ //
sadā cāsūyako rājansadā viśvāsaghātakaḥ

atha paṃcatvamāpannaḥ kāle narakamāptavān //
tāmrabhrāṣṭre paraṃ dagdho daśavarṣāṇi paṃca ca

raurave kumbhipāke ca mahārauravasaṃjñake //
sūkṣmāṇi tilamātrāṇi kṛtvā khaṃḍānyanekaśaḥ

mūṣāyāṃ dhīmato rājannasipatre ca dāritaḥ //
śeṣapātakaśuddhyarthaṃ dharāyā mavatāritaḥ

vidhāya kārkaṭaṃ rūpaṃ yamena tvayi pārthiva //
śivasya saro vikhyātaṃ mahākālavanottame

dattaṃ japtaṃ kṛtaṃ yacca hutaṃ devārcanādi yat//
sarvaṃ tadakṣayaṃ karma tasminsarasi viśrutam

nikṣiptastvaṃ tadā tena bhāvipuṇyena karmaṇā//
tatra sthitastvaṃ bhūpāla varṣāṇāṃ paṃcakaṃ tathā

kadācittīrabhūmyāṃ tvaṃ gataḥ saṃkrīḍituṃ śanaiḥ //
samīkṣya tatra kākena dhṛtvā caṃcupuṭena ca

ākāśamārgaṃ coḍḍīnaḥ sa tvayā tāḍito bhṛśam//
tvattīkṣṇapātaiścaraṇaistāḍito vyathitastadā

muktastvaṃ caṃcupuṭato vāyasenākulena tu //
svargadvārasya pūrve tu devyagāre supuṇyade

śivasya kṣiptastvaṃ śīghraṃ cañcvākṣepaprapīḍitaḥ //
mṛto'si saṃnidhau tatra devasya parameṣṭhinaḥ

vimucya dehaṃ tajjīrṇaṃ yāvattaṃ kārkaṭaṃ purā//
tatkṣaṇāddivya dehaśca divyābharaṇabhūṣitaḥ

tasya liṃgasya māhātmyādbhūtvā vidyādhareśvaraḥ //
kāmagena vimānena pūjyamāno gaṇeśvaraiḥ

svarge vrajaṃstvaṃ saṃpṛṣṭaḥ surasaṃghaiśca sādaram//
koyaṃ mahātmā mudito yāti divyapathoṃ'barāt

tato rudragaṇaiḥ sarvaṃ surāṇāṃ kathitaṃ purā //
vṛttāṃtaṃ vistarātsarvaṃ kārkaṭatvavimocanūm

tasya liṃgasya deveśāḥ prabhāvo'yamupasthitaḥ //
devaiḥ proktaṃ ca sahasā liṃgasyāsya prabhāvataḥ

kārkaṭīyoni muktasya prāptaṃ svargasukhaṃ yataḥ //
karkaṭeśvaranāmāyamato loke bhaviṣyati

tadāprabhṛti devo'yaṃ karkaṭeśvarasaṃjñakaḥ //
tvayā svarge mahābhogā bhuktā rājanyathecchayā

āgato'si punarbhūmau labdhaṃ rājyamakaṃṭakam //
tasya liṃgasya māhātmyājjātaṃ sarvaṃ tavādhunā

tasmātpārthiva bhūyastvaṃ liṃgamārādhaya drutam //
jātismaratvamāpanno vaśiṣṭhavacanāttadā

pūrvaṃ karma smṛtaṃ tena svakīyaṃ pārthivena tu //
punargatvā ca talliṃgaṃ pūjayāmāsa yatnataḥ

tasmim̐lliṃge layaṃ prāptaḥ svaśarīreṇa pārvati//
ye'rcayaṃti sadā bhaktyā karkaṭeśvarasaṃjñakam//
bhuktvā bhogāṃściraṃ bhūmau te yāṃti paramāṃ gatim

niyamena prapaśyaṃti ye devaṃ karkaṭeśvaram//
aṣṭamyāṃ vā caturdaśyāṃ teṣāṃ puṇyaphalaṃ śṛṇu

sūryadīptipratīkāśairvimānaiḥ sārvakāmikaiḥ//
mṛtā mama puraṃ yāṃti trisaptakulasaṃyutāḥ//३३/
tatra divyairmahābhogaiḥ strīsahasrairmanoramaiḥ//
kalpakoṭiśatairdevi sevyamānā vasaṃti hi

tadaṃte viṣṇubhavane tāvatkālaṃ ca saṃti hi //
vaiṣṇavairvividhairbhogaiḥ strīsahasraistu sevitāḥ

viṣṇulokādbrahmalokaṃ saṃprāpya muditāḥ punaḥ //
bhogānnānāvidhānbhuktvā tato yāṃti paraṃ padam

daśāśvamaidhairyatpuṇyaṃ tatphalaṃ tīrthayātrayā //
karkaṭeśvaradevasya meghanādeśvaraṃ śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśītiliṅgamāhātmye karkaṭeśvaramāhātmyavarṇanaṃ nāma dvāviṃśo'dhyāyaḥ