Skanda Purana · Chapter 5.22

// śrīsanatkumāra uvāca // //
yameśvaraṃ tu yaḥ paśyetsnāpayitvā tilāṃbhasā //
kuṃkumena samālipya pūjayedutpalaistataḥ

dahetkṛṣṇāgaruṃ dhūpaṃ dāpayettilataṇḍulān //
ya evamarcayeddevamīśvaraṃ śūlahastakam

yatra kutra mṛtasyāpi yamaḥ pitṛsamo bhavet

// iti yameśvaramāhātmyam//
// sanatkumāra uvāca // //
kathayāmi paraṃ vyāsa tīrthaṃ tīrtheṣu cottamam //
nāmnā rudrasaraḥ proktaṃ triṣu lokeṣu viśrutam

tatra snātvā śucirbhūtvā paśyetkoṭeśvaraṃ śivam //
mucyate sarvapāpebhyo rudralokaṃ sa gacchati

śrāddhaṃ tatraiva kṛtvā tu śṛṇu yatphalamāpnuyāt //
daśānāmaśvamedhānāṃ vājapeyaśatasya ca

phalaṃ koṭiguṇaṃ vyāsa labhate nātra saṃśayaḥ//
pitṝnuddiśya yatkiṃcitkoṭitīrthe pradīyate

tatsarvaṃ koṭiguṇitaṃ jāyate nātra saṃśayaḥ//
koṭitīrthe naraḥ snātvā dhyāyedyaḥ paramākṣaram

mucyate sarvapāpebhyo nirmokena yathoragaḥ //
prātarutthāya yo vipra tatra snānaṃ karoti vai

dṛṣṭvā devaṃ mahākālaṃ gosahasraphalaṃ labhet//
koṭitīrthe naraḥ snātvā saptarātroṣitaḥ śuciḥ

cāṃdrāyaṇasahasrasya phalaṃ prāpnoti mānavaḥ //
jāgaraṃ tatra kuryādyo hyanaṃtaphalamaśnute

gandhapuṣpārcanaṃ kṛtvā mahāsnapanapūrvakam //
ya evaṃ nayate rātriṃ sopavāso jiteṃdriyaḥ

labhate sarvakāmitvaṃ yatsurairapi durlabham //
kārtikyāmatha vaiśākhyāṃ devaṃ tatra prapūjayet

gaṃdhapuṣpaiśca kālīnaistathā vastraiḥ suśobhanaiḥ //
karpūraṃ kuṃkumaṃ caiva śrīkhaṇḍamagaruṃ tathā

samabhāgāni kṛtvā tu śilāpṛṣṭhe ca peṣayet //
anulipya mahākālaṃ rudrasyānucaro bhavet

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe'vantīkṣetramāhātmye rudrasaromāhātmyavarṇanaṃnāma dvāviṃśo'dhyāyaḥ //