સ્કંદ પુરાણ · અધ્યાય 5.22

॥ શ્રીસનત્કુમાર ઉવાચ ॥ ॥
યમેશ્વરં તુ યઃ પશ્યેત્સ્નાપયિત્વા તિલાંભસા ॥
કુંકુમેન સમાલિપ્ય પૂજયેદુત્પલૈસ્તતઃ

દહેત્કૃષ્ણાગરું ધૂપં દાપયેત્તિલતણ્ડુલાન્ ॥
ય એવમર્ચયેદ્દેવમીશ્વરં શૂલહસ્તકમ્

યત્ર કુત્ર મૃતસ્યાપિ યમઃ પિતૃસમો ભવેત્

॥ ઇતિ યમેશ્વરમાહાત્મ્યમ્॥
॥ સનત્કુમાર ઉવાચ ॥ ॥
કથયામિ પરં વ્યાસ તીર્થં તીર્થેષુ ચોત્તમમ્ ॥
નામ્ના રુદ્રસરઃ પ્રોક્તં ત્રિષુ લોકેષુ વિશ્રુતમ્

તત્ર સ્નાત્વા શુચિર્ભૂત્વા પશ્યેત્કોટેશ્વરં શિવમ્ ॥
મુચ્યતે સર્વપાપેભ્યો રુદ્રલોકં સ ગચ્છતિ

શ્રાદ્ધં તત્રૈવ કૃત્વા તુ શૃણુ યત્ફલમાપ્નુયાત્ ॥
દશાનામશ્વમેધાનાં વાજપેયશતસ્ય ચ

ફલં કોટિગુણં વ્યાસ લભતે નાત્ર સંશયઃ॥
પિતૄનુદ્દિશ્ય યત્કિંચિત્કોટિતીર્થે પ્રદીયતે

તત્સર્વં કોટિગુણિતં જાયતે નાત્ર સંશયઃ॥
કોટિતીર્થે નરઃ સ્નાત્વા ધ્યાયેદ્યઃ પરમાક્ષરમ્

મુચ્યતે સર્વપાપેભ્યો નિર્મોકેન યથોરગઃ ॥
પ્રાતરુત્થાય યો વિપ્ર તત્ર સ્નાનં કરોતિ વૈ

દૃષ્ટ્વા દેવં મહાકાલં ગોસહસ્રફલં લભેત્॥
કોટિતીર્થે નરઃ સ્નાત્વા સપ્તરાત્રોષિતઃ શુચિઃ

ચાંદ્રાયણસહસ્રસ્ય ફલં પ્રાપ્નોતિ માનવઃ ॥
જાગરં તત્ર કુર્યાદ્યો હ્યનંતફલમશ્નુતે

ગન્ધપુષ્પાર્ચનં કૃત્વા મહાસ્નપનપૂર્વકમ્ ॥
ય એવં નયતે રાત્રિં સોપવાસો જિતેંદ્રિયઃ

લભતે સર્વકામિત્વં યત્સુરૈરપિ દુર્લભમ્ ॥
કાર્તિક્યામથ વૈશાખ્યાં દેવં તત્ર પ્રપૂજયેત્

ગંધપુષ્પૈશ્ચ કાલીનૈસ્તથા વસ્ત્રૈઃ સુશોભનૈઃ ॥
કર્પૂરં કુંકુમં ચૈવ શ્રીખણ્ડમગરું તથા

સમભાગાનિ કૃત્વા તુ શિલાપૃષ્ઠે ચ પેષયેત્ ॥
અનુલિપ્ય મહાકાલં રુદ્રસ્યાનુચરો ભવેત્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં પઞ્ચમ આવંત્યખણ્ડેઽવન્તીક્ષેત્રમાહાત્મ્યે રુદ્રસરોમાહાત્મ્યવર્ણનંનામ દ્વાવિંશોઽધ્યાયઃ ॥