Skanda Purana · Verses 5.2-2

śrīrudrauvāca // //
śṛṇu guheśvaraṃ liṃgaṃ dvitīyaṃ pāpanāśanam //
yasya darśanamātreṇa jāyate siddhiruttamā

purā rāthaṃtare kalpe devadāruvane śubhe //
ṛṣirmaṃkaṇakonāma vedavedāṃgapāragaḥ //
yogābhyāsarato nityaṃ śāṃtidāṃtisamāsthitiḥ

siddhikāmastapastepe kathaṃ siddho bhavāmyaham //
raktamayavikāroyaṃ kathaṃ yāsyati saṃkṣayam

iti saṃciṃtya hṛdaye prārabdhaṃ tapa uttamam //
bahūnyabdasahasrāṇi tasyātītāni pārvati

kasmiṃścidatha kāle tu viddhasya parvatātmaje //
karācchākaraso jātaḥ kuśāgreṇa tadaiva hi

sa ca dṛṣṭvā tadāścaryaṃ vismayaṃ paramaṃ gataḥ //
mene siddhiṃ parāṃ prāptāṃ sagarvo vākyamabravīt

aho tapaḥprabhāvo'yaṃ prāptā siddhirmayādya vai //
mattulyo nāsti vai vipro yena siddhiḥ samāgatā

śarīraṃ kutsitaṃ cedaṃ malamūtreṇa saṃyutam //
mantrasnāyuvasāpṛktamāṃsaśoṇitapūritam //
harṣeṇa mahatā yuktaḥ sa nanartta dvijastathā

etasminnṛtyati vipre jagatsthāvara jaṃgamam //
anṛtyadrāgasaṃyuktaṃ prabhāvāttasya vai muneḥ

na svādhyāyo vaṣaṭkāraḥ karmakāṃḍo na ca kvacit

etasminnaṃtare devā brahmaviṣṇu puraḥsarāḥ //
māmūcurvismitāḥ sarve nātha nṛtyaṃ tadā kuru

ṛṣau maṃkaṇake deva nṛtyati nṛtyati sarvataḥ //
sadevāsuramānuṣyaṃ sarvaṃ lokatrayaṃ vibho

calitāḥ parvatāḥ sthānātkṣubhitā meghapaṃktayaḥ //
śikharāṇi viśīryaṃte dharaṇī pīḍitā bhṛśam

srotomātrā mahānadyo grahā unmārgataḥ sthitāḥ

trailokyaṃ vyākulībhūtaṃ yāvannāyāti saṃkṣayam //
tāvannivārayasvainaṃ nānyaḥ śakto vinā tvayā

teṣāṃ tadvacanaṃ śrutvā tridaśānāṃ yaśasvini //
pratijñātaṃ mayātyarthaṃ gatvā tasya samīpataḥ

dvijarūpaṃ samāsthāya mayā pṛṣṭo dvijottamaḥ //
kimarthaṃ nṛtyasi brahmankasmātte harṣa āgataḥ

viruddhamṛṣidharmāṇāṃ kāmarāgeṇa narttanam //
gītaṃ ca narttanaṃ caiva yuvatījanavallabham

brāhmaṇasya tapo bhraṃśaḥ sadācārasya sattama //
iti matvā dvijaśreṣṭha kimarthaṃ nṛtyase bhṛśam

// ṛṣiruvāca // //
kiṃ na paśyasi bho brahmankarācchākarasaṃ cyutam //
ataeva hi me nṛtyaṃ siddho'haṃ nātra saṃśayaḥ

tasya tadvacanaṃ śrutvā hāso'tīva mayā kṛtaḥ //
aṃguṣṭhastāḍitaḥ svīyoṃgulyagreṇa ca pārvati

tato vinirgataṃ bhasma tatkṣaṇāddhimapāṃḍuram //
hāsenokto viśālākṣi sagarvo brāhmaṇo mayā

paśya meṃ'guṣṭhato brahmanbhūri bhasma vinirgatam //
na nṛtyehaṃ na me harṣastathāpi munissama

taddṛṣṭvā mahadāścaryaṃ lajjito dvijasattamaḥ //
dhairyaṃ ca tādṛśaṃ dṛṣṭvā vismayaṃ paramaṃ gataḥ

abravītprāṃjalirbhūtvā vismitenāṃtarātmanā //
nānyaṃ devamahaṃ manye tvāṃ muktvā vṛṣabhadhvajam

nānyasya vidyate śakti rīdṛśī bhuvanatraye //
tasmātkṣamasva deveśa mayājñānādanuṣṭhitam

tapaḥkṣayakaraṃ karma viruddhaṃ narttanaṃ satām//
bahukālārjitaṃ puṇyaṃ tapasā duṣka reṇa tu //
tadgataṃ sahasā deva madīyaṃ narttanena su

tasya tadvacanaṃ śrutvā mayokto dvijasattamaḥ //
varaṃ varaya bhadraṃ te tuṣṭo'haṃ dvijasattama

jñānenānena vipreṃdra kaṃ te kāmaṃ karomyaham

ṛṣiruvāca // //
yadi deva prasannastvaṃ śaraṇāgatavatsala //
yathā na syāttapohānistathā nītirvidhīyatām

mayā proktaṃ prasannena tasya viprasya pārvati //
tapaste varddhatāṃ vipra mahākālavanaṃ vraja

tatrāste sarvadā puṇyā saptakalpodbhavā guhā//
piśāceśvaradevasya uttareṇa vyavasthitā

tatra drakṣyasi yalliṃgaṃ saptakalpodbhavaṃ śubham//
tasya darśanamātreṇa tapaste vṛddhimeṣyati

kāma krodhodbhavaṃ pāpaṃ lobhamohasamanvitam //
īrṣyāmatsarajaṃ caiva nāśaṃ yāti ca kilbiṣam

madīyaṃ vacanaṃ śrutvā sa vipro vedapāragaḥ //
śrutvā ca niyamaṃ devi maduktaṃ sa tato dvijaḥ

niḥsṛto niyato bhūtvā namaskṛtya punaḥpunaḥ //
ājagāma guhā yatra mahākālavanottame

dadarśa tatra talliṃgaṃ tapaso varddhanaṃ param //
dvādaśādityasaṃkāśo jāto vai liṃgadarśanāt

etasminnaṃtare devi devairuktaṃ nabhastale //
gopyaṃ liṃgaṃ guhotthaṃ tu dṛṣṭaṃ maṃkaṇakena tu

siddhiḥ prāptā dvijenaiva darśanena sudurlabhā //
tasmādguheśvaro devi bhaviṣyati mahītale

bhaktyā paramayopetā ye drakṣyaṃti guheśvaram //
na teṣāṃ jāyate vighno dharmasya tapasastathā

aṣṭamyāṃ vā caturdaśyāṃ darśanaṃ yaḥ kariṣyati //
brahmalokaṃ gamiṣyaṃti pitarastasya dehinaḥ

atrāgatya prayatnena darśanaṃ yaḥ kariṣyati //
uddhariṣyati cātmānaṃ puruṣānekaviṃśatim

kṛtvā pāpasahasrāṇi darśanaṃ yaḥ kariṣyati //
sa yāti paramaṃ sthānaṃ yatra devo maheśvaraḥ

brahmahatyā surāpānaṃ steyaṃ gurvaṃganāgamaḥ //
darśanāttasyaliṃgasya sarvaṃ yāsyati saṃkṣayam

yatkiṃcidaśubhaṃ karma janmakoṭiśatārjitam //
kṣayaṃ yāsyati tatsarvaṃ sparśamātreṇa nānyathā

mahāpātakayuktā hi dehino ye mahītale //
te'pi liṃgaṃ samāsādya mucyaṃte sarvapātakaiḥ

ityuktvā sa dvijo devi divyo maṃkaṇako muniḥ //
kṛtvāśramapadaṃ puṇyaṃ tatraiva tapasi sthitaḥ

eṣa vai kathito devi prabhāvaḥ pāpanāśanaḥ //
śravaṇātkīrttanādvāpi sarvapāpaiḥ pramucyate

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśītiliṅgamāhātmye guheśvaramāhātmyavarṇanaṃnāma dvitīyo'dhyāyaḥ