Skanda Purana · Verses 5.19-2

// īśvara uvāca // //
ekonaviṃśatitamaṃ nāgacaṃḍeśvaraṃ priye //
nirmālyalaṃghanāptapāpānmucyate yasya darśanāta

tasya prabhāvaṃ subhagaṃ kathayāmyatha vistarāt//
śṛṇvekāgramanā devi sarvapāpapraṇāśanam

purā devarṣigaṃdharvāścāraṇā guhyakāstathā //
upaviṣṭāḥ sudharmāyāṃ kathayaṃtaḥ śubhāṃ kathām

etasminnaṃtare śakro devarṣiṃ nāradaṃ munim //
papraccha sādaraṃ devi samāyātaṃ śucivratam

dṛṣṭvā vinayasaṃpannaṃ brahmacaryaparāyaṇam //
mekhalājinakaupīnaṃ vīṇādaṇḍavibhūṣitam

tvayā dṛṣṭamidaṃ sarvaṃ trailokyaṃ bhūrbhuvādikam//
utpādyamānamutpannaṃ pralayacca sahasraśaḥ

tvattulyo nāsti loke'sminmu ktvaikaṃ parameṣṭhinam//
jagatkāraṇamavyaktaṃ nityaṃ sadasadātmakam

yogena tapasā bhaktyā yattvayā paritoṣitaḥ //
trailokyamabhijānāsi tatsarvaṃ sarvataḥ sphuṭam

ato'haṃ praṣṭumicchāmi kathyatāṃ mama niścayam //
pṛthivyāṃ pravaraṃ kṣetraṃ pāvanaṃ bhuktimuktidam

evaṃ śrutvā tadā dhyātvā ciṃtayāmāsa nāradaḥ //
ciṃtayitvā ciraṃ kālamidaṃ vacanamabravīt

devarāja smṛtaṃ puṇyaṃ kṣetrarājamanuttamam //
kṣetrāṇāmuttamaṃ kṣetraṃ prayāgaṃ ca praśa syate

tasmāddaśaguṇaṃ kṣetraṃ mahākālasya kathyate //
bhuktidaṃ muktidaṃ tacca darśanādapi vāsava

etacchrutvā sahasrākṣo varṇayitvā ca taṃ munim//
sarvairdevagaṇaiḥ sārddhaṃ vimānasthastvarānvitaḥ

aṃtarikṣasthito jiṣṇuradrākṣīcca suraiḥ saha //
kṣetraṃ liṃgaiḥ samākīrṇamaṃgulasyāṃtaraṃ na hi

ṣaṣṭikoṭisahasrāṇi ṣaṣṭikoṭiśatāni ca //
mahākālavane ramye nirmālyaṃ laṃghyate katham

nirmālyalaṃghanāddoṣo mahānbhavati niścitam//
ityālocya punardevi jagmuḥ svarge manoramāḥ

nirmālyadoṣabhītāste kṣetre na viviśuḥ surāḥ //
etasminnaṃtare devi vimānasthā gaṇottamāḥ

gaṇairnānāvidhaiḥ geyairgīyamānaśca kiṃnaraiḥ //
cāraṇaiḥ stūyamānastu svargalokaṃ vrajansuraiḥ

praphullanayanairdṛṣṭaḥ ko'yaṃ dhanyo mahātapāḥ //
tejasā dīpyamānoyampasarobhiśca sevyate

papracchuramarāḥ sarve ko'yaṃ rudranibho gaṇaḥ //
yāti kutra mahābāho hṛṣṭātmā prahasanmukhaḥ

pṛṣṭastadā suraiḥ sarvairvismayāviṣṭamānasaiḥ //
kastvaṃ puruṣaśārdūla kiṃ tvayā sukṛtaṃ kṛtam

devānāṃ purato devi niḥśeṣaṃ kathitaṃ tadā //
mahākālo mahādevaḥ pūjito bhaktitaḥ stutaḥ

hṛṣṭena tena me dattaṃ gaṇatvaṃ yatsudurlabham //
nāma dattaṃ ca subhagaṃ nāgacaṃḍa iti dhruvam

papracchuramarāstacca sādaraṃ gaṇasattama //
nāgacaṃḍa tvayā tatra nirmālyaṃ patitaṃ tvatha

mahākālavane puṇye laṃghitaṃ caratā tvayā //
saṃcāro nāsti tatraiva liṃgasaṃkīrṇatā yataḥ

upāyastena kathito devānāṃ puratastadā //
tatra tiṣṭhati deveśā liṃgaṃ sarvaphalapradam

īśāneśvaradevasya tiṣṭhatīśānabhāgataḥ //
tasya darśanamātreṇa na sa gacchati duṣkṛtam

nirmālyalaṃghanodbhūtaṃ yatpāpaṃ jāyate mahat //
tatsarvaṃ nāśamāyāti tasya liṃgasya darśanāt

tato devagaṇāḥ sarve mahākālavane punaḥ //
samāyātā mahābhāgā mahākālaśca pūjitaḥ

yathā liṃgaṃ ca taddṛṣṭaṃ sarvadoṣakṣayaṃkaram //
tasya darśanamātreṇa nirmālyalaṃghanādibhiḥ //
doṣo naṣṭaḥ surāṇāṃ ca tato nāmāsya cakrire

asmākaṃ tena kathitaṃ nāgacaṃḍena dhīmatā //
nāgacaṃḍeśvarākhyānamato loke bhaviṣyati //

kṛtvāsya nāma te devā jagmuḥ svargehamuttamam //
pūjayiṣyaṃti ye kecinnāgacaṃḍeśvaraṃ śivam //
nirmālyalaṃghanodbhūtaṃ teṣāṃ naśyati pātakam//

nāgacaṃḍeśvaraṃ devaṃ ye paśyaṃti dinedine //
ajñānājjñānataḥ pāpaṃ teṣāṃ naśyati nānyathā

āhlādaṃ nirvṛtiṃ svāsthyamārogyaṃ cārurūpatām //
sapta janmānyavāpnoti darśanena na saṃśayaḥ

prāpnotyabhimatānkāmāndevānāmapi durlabhān //
kīrttanānnātra saṃdeho nāgacaṃḍeśvarasya ca

eṣa te kathito devi prabhāvaḥ pāpanāśanaḥ //
nāgacaṃḍeśvarasyaiva pratīhāreśvaraṃ śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṅgamāhātmye nāgacaṃḍeśvaramāhātmyavarṇanaṃnāmaikonaviṃśo'dhyāyaḥ