Skanda Purana · Chapter 5.19

// sanatkumāra uvāca // //
athātaḥ saṃpravakṣyāmi harasiddhiṃ susiddhidām //
pārvatyā haraṇe yatra siddhiḥ prāptā hareṇa ca

balinau dānavau jātau nāmnā caṇḍapracaṃḍakau //
utkhāya tridivaṃ sarvaṃ giriṃ kailāsamāgatau

dṛṣṭvā tatra girīśaṃ tu udyatākṣākṣahastakam //
nāgeśaṃ śaśikhaṭvāṃgaṃ gṛhītvā dakṣiṇe kare

devidevīti jalpaṃtaṃ dāsaste'smīti vādinam //
yāvadekaṃ tu phalakaṃ tāvaddyūtaṃ pravartatām

rāgībhūte tadā deve tau prāptau devakaṃṭakau //
utsāditāḥ śivagaṇā naṃdinā pratiṣedhitau

tatastābhyāṃ tadā naṃdī śūlābhyāṃ pravidāritaḥ //
samaṃ savyadakṣiṇaṃ vai susrāva rudhiraṃ bahu

naṃdinaṃ tāḍitaṃ dṛṣṭvā tadā śilādanaṃdanam //
dhyātā hareṇa sā devī praṇatā sā'grataḥ sthitā

vadhyatāṃ tau mahādaityau vadhāmīti vaco'bravīt //
gṛhītvā mudgaraṃ ghoramatikrodhādatāḍayat

yadā tayā hatau dṛṣṭau dānavau balagavitau //
harastāmāha he caṃḍi saṃhṛtau duṣṭadānavau

harasiddhirato loke nāmnā khyātiṃ gamiṣyasi //
tataḥ prabhṛti sā devī harasiddhi pradāyinī //
harasiddhiriti khyātā mahākāle babhūva ha

yaḥ paśyetparayā bhaktyā harasiddhiṃ narottamaḥ //
so'kṣayām̐llabhate kāmānmṛtaḥ śivapuraṃ vrajet

ādisiddhiṃ mahādevīṃ nityāṃ vyomasvarūpiṇīm //
harasiddhiṃ prapaśyedyaḥ so'bhīṣṭaṃ labhate phalam

yaḥ smareddharasiddhīti maṃtraṃ ca caturakṣaram //
na vairiṇo bhayaṃ tasya dāridryaṃ naiva jāyate

naro mahānavamyāṃ yo harasiddhiṃ prapūjayet //
mahiṣaṃ ca baliṃ dadyātsa bhavedbhūpatirbhuvi

navamyāṃ pūjitā devī harasiddhirharapriyā //
tuṣṭā nṛṇāṃ sadā vyāsa dadātyanavamaṃ phalam

sā puṇyā sā pavitrā ca sarvatra sukhadāyinī //
smṛtā saṃpūjitā dṛṣṭā dhanaputrasukhapradā

mahānavamyāṃ ye vyāsa hanyaṃte mahiṣādayaḥ //
sarve te svargatiṃ yāṃti ghnatāṃ pāpaṃ na vidyate

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvatyakhaṃḍe'vantīkṣetramāhātmye harasiddhimāhātmya varṇanaṃnāmaikonaviṃśo'dhyāyaḥ