Skanda Purana · Verses 5.18-3

śrīmārkaṇḍeya uvāca -
nirdagdhe'smiṃstato loke sūryairīśvarasambhavaiḥ /
saptabhiścārṇavaiḥ śuṣkairdvīpaiḥ saptabhireva ca

tato mukhāttasya ghanā maholbaṇā niścerurindrāyudhatulyarūpāḥ /
ghorāḥ payodā jagadandhakāraṃ kurvanta īśānavaraprayuktāḥ

nīlotpalābhāḥ kvacidaṃjanābhā gokṣīrakundendunibhāśca kecit /
mayūracandrākṛtayastathā'nye kecidvidhūmānalasaprabhāśca

kecinmahāparvatakalparūpāḥ kecinmahāmīnakulopamāśca /
kecidgajendrākṛtayaḥ surūpāḥ kecinmahākūṭanibhāḥ payodāḥ

calattaraṅgormisamānarūpā mahāpurodhānanibhāśca kecit /
sagopurāṭṭālakasaṃnikāśāḥ savidyudulkāśanimaṇḍitāntāḥ

samāvṛtāṅgaḥ sa babhūva devaḥ saṃvartakonāma gaṇaḥ sa raudraḥ /
pravarṣamāṇo jagadapramāṇamekārṇavaṃ sarvamidaṃ cakāra

tato mahāmeghavivardhamānamīśānamindrāśanibhirvṛtāṅgam /
dadarśa nāhaṃ bhayavihvalāṅgo gaṅgājalaughaiśca samāvṛtāṅgaḥ

gajāḥ punaścaiva punaḥ pibanto jagatsamantātparidahyamānam /
āpūritaṃ caiva jagatsamantātsarvaiśca tairjagmuradarśanaṃ ca te

mahārṇavāḥ sapta sarāṃsi dvīpā nadyo'tha sarvā atha bhūrbhuvaśca /
āpūryamāṇāḥ salilaughajālairekārṇavaṃ sarvamidaṃ babhūva

na dṛśyate kiṃcidaho carācaraṃ niragnicandrārkamaye'pi loke /
praṇaṣṭanakṣatratamo'ndhakāre praśāntavātāstamitaikanīḍeḥ

mahājalaughe'sya viśuddhasattvā stutirmayā bhūpa kṛtā tadānīm /
tato'hamityeva vicintayānaḥ śaraṇyamekaṃ kva nu yāmi śāntam

smarāmi devaṃ hṛdi cintayitvā prabhuṃ śaraṇyaṃ jalasaṃniviṣṭaḥ /
namāmi devaṃ śaraṇaṃ prapadye dhyānaṃ ca tasyeti kṛtaṃ mayā ca

dhyātvā tato'haṃ salilaṃ tatāra tasya prasādādavimūḍhacetāḥ /
glāniḥ śramaścaiva mama praṇaṣṭau devyāḥ prasādena narendraputra

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe narmadāmāhātmyavarṇanaṃ nāmāṣṭādaśo'dhyāyaḥ //