સ્કંદ પુરાણ · અધ્યાય 5.19

॥ સનત્કુમાર ઉવાચ ॥ ॥
અથાતઃ સંપ્રવક્ષ્યામિ હરસિદ્ધિં સુસિદ્ધિદામ્ ॥
પાર્વત્યા હરણે યત્ર સિદ્ધિઃ પ્રાપ્તા હરેણ ચ

બલિનૌ દાનવૌ જાતૌ નામ્ના ચણ્ડપ્રચંડકૌ ॥
ઉત્ખાય ત્રિદિવં સર્વં ગિરિં કૈલાસમાગતૌ

દૃષ્ટ્વા તત્ર ગિરીશં તુ ઉદ્યતાક્ષાક્ષહસ્તકમ્ ॥
નાગેશં શશિખટ્વાંગં ગૃહીત્વા દક્ષિણે કરે

દેવિદેવીતિ જલ્પંતં દાસસ્તેઽસ્મીતિ વાદિનમ્ ॥
યાવદેકં તુ ફલકં તાવદ્દ્યૂતં પ્રવર્તતામ્

રાગીભૂતે તદા દેવે તૌ પ્રાપ્તૌ દેવકંટકૌ ॥
ઉત્સાદિતાઃ શિવગણા નંદિના પ્રતિષેધિતૌ

તતસ્તાભ્યાં તદા નંદી શૂલાભ્યાં પ્રવિદારિતઃ ॥
સમં સવ્યદક્ષિણં વૈ સુસ્રાવ રુધિરં બહુ

નંદિનં તાડિતં દૃષ્ટ્વા તદા શિલાદનંદનમ્ ॥
ધ્યાતા હરેણ સા દેવી પ્રણતા સાઽગ્રતઃ સ્થિતા

વધ્યતાં તૌ મહાદૈત્યૌ વધામીતિ વચોઽબ્રવીત્ ॥
ગૃહીત્વા મુદ્ગરં ઘોરમતિક્રોધાદતાડયત્

યદા તયા હતૌ દૃષ્ટૌ દાનવૌ બલગવિતૌ ॥
હરસ્તામાહ હે ચંડિ સંહૃતૌ દુષ્ટદાનવૌ

હરસિદ્ધિરતો લોકે નામ્ના ખ્યાતિં ગમિષ્યસિ ॥
તતઃ પ્રભૃતિ સા દેવી હરસિદ્ધિ પ્રદાયિની ॥
હરસિદ્ધિરિતિ ખ્યાતા મહાકાલે બભૂવ હ

યઃ પશ્યેત્પરયા ભક્ત્યા હરસિદ્ધિં નરોત્તમઃ ॥
સોઽક્ષયાઁલ્લભતે કામાન્મૃતઃ શિવપુરં વ્રજેત્

આદિસિદ્ધિં મહાદેવીં નિત્યાં વ્યોમસ્વરૂપિણીમ્ ॥
હરસિદ્ધિં પ્રપશ્યેદ્યઃ સોઽભીષ્ટં લભતે ફલમ્

યઃ સ્મરેદ્ધરસિદ્ધીતિ મંત્રં ચ ચતુરક્ષરમ્ ॥
ન વૈરિણો ભયં તસ્ય દારિદ્ર્યં નૈવ જાયતે

નરો મહાનવમ્યાં યો હરસિદ્ધિં પ્રપૂજયેત્ ॥
મહિષં ચ બલિં દદ્યાત્સ ભવેદ્ભૂપતિર્ભુવિ

નવમ્યાં પૂજિતા દેવી હરસિદ્ધિર્હરપ્રિયા ॥
તુષ્ટા નૃણાં સદા વ્યાસ દદાત્યનવમં ફલમ્

સા પુણ્યા સા પવિત્રા ચ સર્વત્ર સુખદાયિની ॥
સ્મૃતા સંપૂજિતા દૃષ્ટા ધનપુત્રસુખપ્રદા

મહાનવમ્યાં યે વ્યાસ હન્યંતે મહિષાદયઃ ॥
સર્વે તે સ્વર્ગતિં યાંતિ ઘ્નતાં પાપં ન વિદ્યતે

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં પઞ્ચમ આવત્યખંડેઽવન્તીક્ષેત્રમાહાત્મ્યે હરસિદ્ધિમાહાત્મ્ય વર્ણનંનામૈકોનવિંશોઽધ્યાયઃ