Skanda Purana · Verses 5.18-2

// śrīśiva uvāca // //
devamaṣṭādaśaṃ viddhi khyātaṃ kalakaleśvaram //
yasya darśanamātreṇa kalaho naiva jāyate

sarvaduḥkhopaśamanaṃ sarvapāpa pramocanam//
vyādhisarpāgnicaurāṇāṃ śamanaṃ vāṃchitapradam

mama devi tvayā sārddhaṃ kalahaḥ samapadyata //
purā vistarato vacmi śṛṇvekāgramanāḥ śubhe

yadā tvaṃ himaśailasya duhitā varavarṇini //
tadā vivāhitaṃ kāṃte yathoktavidhinā mayā

vinivṛtte vivāhe ca tvayā sārddhaṃ varānane //
mahākālīti nāmnā vai varṇenāpi ca tādṛśī

nīlotpalanibhaprakhyā nīlakuṃcitamūrddhajā //
apyekasmiṃstadā tvaṃ hi mātṝṇāṃ maṃḍape śubhe //
madhye samupaviṣṭāsi kṛṣṇāṃjanasamaprabhā

kāli suṃdari matpārśve vallabhe tvamupāviśa //
śarīre mama tanvaṃgi site bhāsyasitadyutiḥ

bhujaṃgīvāsitā śubhre saṃśliṣṭā caṃdane tarau //
rajanīvāsite pakṣe dṛṣṭidoṣaharāsi me

ityuktāsi mayā devi girije cāruhāsini //
tadā proktaṃ tvayā vākyaṃ māmuddiśya sagadgadam

yadā tvayā madarthe hi preritā vedapāragāḥ //
saptarṣayo mahābhāgāḥ kiṃkṛte na tadāttha mām

tadā tvayā madarthe'pi prārthito janako mama //
himādrirājo yatnena kiṃ kālī na tadāttha mām

yadāpyuktaṃ tvayā dainyānmadarthe gaccha nārada //
prārthyatāṃ pārvatī śīghraṃ kiṃ kālī na tadāttha mām

satyeyaṃ laukikī gāthā na vṛthā parijāyate //
svakṛtena janaḥ sarvo jāḍyena pari bhūyate

avaśyamarthī prāpnoti khaṃḍanāṃ tuṃḍamuṃḍanām//
tapotidīrghacārairtayattvāṃ prārthitavatyaham

tasyā me niyatastveṣa hyavamānaḥ padepade //
naivāsmi kuṭilā raudrā viṣamā na ca dhūrjaṭe

nākulīnā vṛthācārā na duṣṭā na samatsarā //
saviṣastvaṃ yataḥ khyāto vyaktaṃ doṣā karāśrayaḥ

akulīno vṛthācāro mātsaryeṇāśritaḥ sadā //
nāhaṃ muṣṇāmi nayane tatra haṃtā tvameva ca

ādityastvāṃ vijānātu bhagavāndvādaśātmakaḥ //
mayā notpāṭitā daṃtāḥ kasyāpi nirapatrapa

pūṣādevo vijānāti dvādaśātmā divākaraḥ //
mūrdhni śūlaṃ tava yataḥ svaidoṣairmāmadhikṣipaḥ

yattu māmāha kṛṣṇeti mahākāleti viśrutaḥ//
ityathāpi pravādo'yaṃ pravaraḥ khyāmi te hara

nidarśanārthaṃ na dveṣācchrutvā taṃ kṣaṃtumarhasi//
virūpo yāvadādarśe nātmanaḥ paśyate mukham

manyate tāvadātmānamanyebhyo rūpavattamam //
yadā tu mukhamādarśe vikṛtaṃ so'bhivīkṣate

tadetaraṃ vijānāti hyātmānaṃ netaraṃ janam//
satyadharmacyutātpuṃsaḥ kṣudrādāśīviṣādiva

sa nāstikopyudvijate janaḥ kiṃ punarāstikaḥ //
ityukto'haṃ tvayā devi mayā kolāhalaḥ kṛtaḥ

anātmajñāsi girije mṛḍe paṃḍitamānini //
satyaṃ sarvairavayavaiḥ stuto'pi sadṛśaḥ pituḥ

kāṭhinyaṃ kaṣṭamabhyeti dhātubhyo bahughātitā //
kuṭilatvaṃ ca sarvebhyo'sevyatvaṃ ca himādiva

ityuktā'si mayā devi punaḥ proktaṃ tvayā vacaḥ //
tathāpi duṣṭasaṃsargātsaṃkrāṃtaṃ sarvameva hi

vyālebhyo'nekajihvatvaṃ bhasmataḥ snehavarjanam //
hṛtkāluṣyaṃ śaśāṃkādvai durbodhatvaṃ vṛṣādapi

śmaśānavāsādbhīrutvaṃ nagnatvaṃ ca na lajjayā //
nirghṛṇatvaṃ kapālācca dayā te vigatā ciram

evaṃ tadābhavadraudraḥ kalaho bhayakṛcchubhe //
evaṃ pravṛtte tu tadā kaṃpitaṃ bhuvanatrayam

bhītāśca devagaṃdharvā yakṣagaṃdharvarākṣasāḥ //
tasmātkolāhalo bhūmiṃ bhittvā liṃgamabhūttadā

liṃgamadhyātsamutpannā vāṇī sukhakarī śubhā //
āśvāsayaṃtī devānvai trailokyaṃ sacarācaram

nāmāsya cakrurdeveśāstadā kalakaleśvaram //
svaranāmāsau tato'bhūcchaṅkaro bhuvi viśrutaḥ

yastamarcayate bhaktyā devaṃ kalakaleśvaram//
na rākṣasāḥ piśācāśca na bhūtā na vināyakāḥ //
vipraṃ kuryurvarārohe kalaho na bhavedgṛhe

suśīlā gṛhiṇī tasya surūpā subhagā priye //
bahuputrā bahudhanā jāyate darśanāttathā

ye paśyaṃti caturddaśyāṃ devaṃ kalakaleśvaram //
na duḥkhaṃ na jarāvyādhirnākālamaraṇaṃ tathā

na ca śatrubhayaṃ teṣāṃ jāyate giriputrake //
loko'kṣayo bhaveddevi yāvadiṃdrāścaturddaśa

eṣa te kathito devi prabhāvaḥ pāpanāśanaḥ //
yasya śravaṇamātreṇa kṣemamatra paratra ca

iti śrīskāṃde mahāpurāṇe ekāśītisāhasryāṃ saṃhitāyāṃ pañcama āvaṃtyakhaṃḍe caturaśītiliṅgamāhātmye kalakaleśvaramāhātmyavarṇanaṃnāmāṣṭādaśo'dhyāyaḥ