Skanda Purana · Chapter 5.18

// sanatkumāra uvāca // //
ekānaṃśāṃ namaskṛtya devīṃ trailokyaviśrutām //
pūjāṃ kṛtvā vidhānena sarvasiddhiphalaṃ labhet

aṇimādiguṇānsarvānguṭikāsiddhimaṃjanam //
khaḍgaṃ ca pāduke caiva vilavāsaṃ rasāyanam //
sarvaṃ tuṣṭā prayaccheta nātra kāryā vicāraṇā

surāmāṃsopahāraiśca bhakṣyabhojyaiśca pūjitā //
sarvānkāmānnṛṇāṃ devī tuṣṭā dadyācca sarvadā

mahānavamyāṃ yo devīṃ mahiṣeṇa prapūjayet //
meṣeṇa vā yathālābhaṃ sarvānkāmānavāpnuyā t

// vyāsa uvāca // //
kathaṃ devī samutpannā ekānaṃśeti viśrutā //
tatsarvaṃ śrotumicchāmi sarvapāpapraṇāśinī

//
// sanatkumāra uvāca // //
purā kṛtayugasyādau brahmā lokapitāmahaḥ //
niśāṃ sasmāra bhagavānsvāṃ tanūṃ pūrvasaṃbhavām

tato bhagavatī rātrirupatasthe pitāmaham //
tāṃ vivikte samālokya brahmovāca vibhāvarīm

// brahmovāca // //
vibhāvarī mahāmāye vibudhānāmupasthitam //
yatkartavyaṃ tvayā devi śṛṇu cārthasya niścayam

tārakonāma daityeṃdraḥ suraśatruranirjitaḥ //
tasya bhayena vai devāstrastāḥ sarve divaukasaḥ

tasmādbhadre maheśo vai janayiṣyati cedvaram //
sutaṃ sa bhavitā tasya tārakasyāṃtakaḥ kila

śaṃkaramyābhavatpatnī satī dakṣasutā tu yā //
sā pituḥ kupitā bhadre kasmiṃścitkāraṇāṃtare

bhavitrī himaśailasya duhitā lokapāvanī //
viraheṇa harastasyā matvā śūnyaṃjagattrayam

atapaddhimaśailasya kaṃdare siddhasevite //
pratīkṣamāṇastajjanma kiṃcitkālaṃ vasiṣyati

tasmātsutaptatapasorbhavitā yo mahāprabhuḥ //
sa bhaviṣyati daityasya tārakasya nivārakaḥ

jātamātrā tu sā devī svalpasaṃjñaiva bhāminī //
virahotkaṃṭhitā gāḍhaṃ harasaṃgamalālasā

tayoḥ sutaptatapasoḥ saṃyogaḥ syātsuyuktayoḥ //
pārvatīharayostasmātsurataṃ śaktikāraṇam

bhavettatra surāṇāṃ ca kāryārthe vipramācara //
vighnaṃ tvayā vidhātavyaṃ yathā tābhyāṃ tathā śṛṇu

garbhasthāne'tha tāṃ mātaḥ svena rūpeṇa raṃjaya //
tato rahasi śarvastāṃ bibhradānaṃdapūrvakam

hāsayiṣyati kālīti tataḥ sā kupitā satī //
prayāsyati tapaḥ kartuṃ tataḥ sā tapasā yutā

janayiṣyati yaṃ śarvādiṃduvajjyotimaṃḍa lam //
sa bhaviṣyati haṃtā vai surārīṇāṃ na saṃśayaḥ

tvayāpi dānavā devi haṃtavyā lokadurjayāḥ //
yāvacca na satī dehe saṃkrāṃtaguṇasaṃcayā

tatsaṃgamena tāvattvaṃ daityānhaṃtuṃ bhaviṣyasi //
evaṃ kṛte tvayā devi tapaḥ kālī kariṣyati

samāptaniyamā sā ca yadā gaurī bhaviṣyati //
tadā tavāpi sārūpyaṃ śailajā saṃpradāsyati

tatastavāpi sahajā saikānaṃśā bhaviṣyati //
rūpāṃśena ca saṃyuktā tvamumākhyā bhaviṣyasi

ekānaṃśeti lokastvāṃ varade pūjayiṣyati //
bhedairbahuvidhākāraiḥ sarvagāṃ kāmasādhanīm २५ //
ॐkāravaktrā gāyatrī tvameva brahmavādinī //
ākrāṃtarucirākārā rājñāṃ cāhavaśālinī

viśāṃ tvaṃ kamalādevī śūdrāṇāṃ jananī svayam //
jñānināṃ jñeyarūpā tvaṃ tvaṃ gatiḥ sarvadehinām

tvaṃ ca kīrtimatāṃ kīrtistvaṃ bhūtiḥ sarvadehinām //
ratidā raktacittānāṃ prītistvaṃ snehavartinām

tvaṃ kāṃtiḥ kṛtabhūṣā ṇāṃ tvaṃ śāṃtirhṛṣṭakarmaṇām //
tvaṃ ca bhrāṃtirabodhānāṃ tvaṃ kīrtiḥ kramayājinām

mahāvelā samudrāṇāṃ vilāsastvaṃ vilāsinām //
saṃbhūtistvaṃ padārthānāṃ sthitistvaṃ lokaśālinām

ityanekavidhairdevi rūpairlokeṣu carcitā //
ye tvāṃ paśyaṃti varade pūjayiṣyaṃti cāpi ye //
kāmā nāpsyaṃti te sarve niyataṃ nātra saṃśayaḥ

ityevaṃ sā samutpannā brahmaṇā saṃstutā satī //
ekānaṃśā mahādevī dhyātavyā sāpi bhaktitaḥ

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe'vantīkṣetramāhātmya ekānaṃśāmāhātmyavarṇanaṃnāmāṣṭādaśo 'dhyāyaḥ