Skanda Purana · Chapter 5.16

// sanatkumāra uvāca // //
athānyatsaṃ pravakṣyāmi tīrthānāṃ tīrthamuttamam //
sthāpitaṃ paramaṃ tīrthaṃ svanāmnā munisattama

ekadā samaye vyāsa kapālakṣālanāya vai //
śīrṣodakaṃ gṛhītvā tu kapālena maheśvaraḥ

prakṣālya cākṣipadbhūmau tatra tīrthamanuttamam //
nāmnā gandhavatī puṇyā nadī trailokyaviśrutā

brahmaṇo rudhireṇāśu pari pūrṇābhavatkṣaṇāt //
tasyāṃ snānaṃ sadā śastaṃ svayaṃ devena bhāṣitam

śrāddhaṃ ca tarpaṇaṃ kṛtvā tatsarvaṃ cākṣayaṃ bhavet //
vāyubhūtāstu pitarastasyāstī re tu dakṣiṇe

tiṣṭhaṃti muniśārdūla ciṃtayaṃti svagotrajam //
āgamiṣyati putro'dya naptā vā saṃtatāviha

saṃyāvaṃ pāyasaṃ vāpi śyāmākaṃ sanivārakam //
sakṛtkṣaudratilairyuktaṃ piṇḍaṃ dāsyati vai kadā

tena piṃḍapradānena tṛptirbhavati cākṣayā //
yastu snātvā ca vai piṃḍaṃ dadyādvai caṃdraṃ parvaṇi

pitarau dvādaśābdāni tṛptiṃ yāsyaṃti tasya vai //
ye'trāgatya suvidvāṃso mānavā vā tathā dvijāḥ

pitṝnsaṃtarpayiṣyaṃti svargasteṣāṃ sadā'kṣayaḥ //
tatra yaddīyate dānaṃ truṭimātraṃ tu kāṃcanam

akṣayaṃ tasya tatproktaṃ brahmaṇā vai svayaṃbhuvā //
gaṃgādvāre prayāge ca kurukṣetre'tha puṣkare

vārāṇasyāṃ gayāyāṃ ca sā na tṛptirbhaviṣyati //
tuṣṭāśca pitaro nṛṇāṃ dāsyaṃti kāṃkṣitānvarān

yo yamuddiśya vaikāmamiha śrāddhaṃ kariṣyati //
tasya tajjāyate sarvaṃ mṛtasya paramā gatiḥ

navamī aṣṭamī caiva amāvāsyātha pūrṇimā //
sarvāṇyetāni vai vyāsa raveḥ saṃkrama eva ca

brahmeṃdra rudradevāṃśca sūryāgnibrahmadaivatān //
viśvedevānsagandharvānyakṣāśca manujānpaśūn

sarīsṛpānpitṛgaṇānyaccānyadbhuvi saṃsthitam //
śrāddhaṃ vai śraddhayā kurvanprīṇayatyakhilaṃ jagat

māsimāsyasite pakṣe paṃcadaśyāṃ dvijottama //
indukṣaye yadā maitraṃ viśākhāṃ caiva rohiṇīm

śrāddhe pitṛgaṇāstṛptiṃ prayāṃti pitaro'rjitām //
vāsavājaikapādarkṣe pitṝṇāṃ tṛptimicchatā

bhaktyā śrāddhaṃ prakartavyaṃ pita rastena tarpitāḥ //
api dhanyāḥ kule jātā asmākaṃ matiśālinaḥ

ye kurvaṃti ca vai śrāddhaṃ piṃḍānye nirvapaṃti ca //
tena piṃḍapradānena tṛptirno bhavitā'kṣayā

ihaitya vai puṇyajaleṣu samyaksnātvā narastāṃstu labheta kāmān //
yānprāpya ca pretagaṇaiḥ sametaḥ sa modate devavṛ to'tha siddhaḥ

cittaṃ ca vittaṃ ca nṛṇāṃ ca śuddhaṃ śastaśca kālaḥ kathito vidhiśca //
pātraṃ yathoktaṃ paramā ca bhaktirnṛṇāṃ prayacchaṃti hi vāṃchitāni

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe'vantīkṣetramāhātmye nīlagandhavatīprabhāvavarṇanaṃnāma ṣoḍaśo'dhyāyaḥ