Skanda Purana · Verses 5.16-2

// īśvara uvāca // //
īśāneśvarasaṃjñaṃ tu ṣoḍaśaṃ viddhi pārvati //
yasya darśanamātreṇa aiśvaryaṃ jāyate nṛṇām

tuhuṃḍena purā devi sarve hyupadrutāḥ surāḥ //
ṛṣayaśca mahābhāgā yakṣagandharvaki nnarāḥ

naṃdanākhyaṃ vanaṃ sarvaṃ tadadhīnamabhūtkila //
airāvaṇaṃ dvipendraṃ ca jitvā dvāri samādadhat

uccaiḥśravasasaṃjñaṃ tu hṛtavāndānaveśvaraḥ //
devāṃganānāṃ sarvāsāṃ vidhvaṃsaṃ kartumudyataḥ

svargamārgaḥ khilībhūtastadbhayena hyabhūtsati //
hṛtādhikārā devāśca maṃtraṃ samupacakramuḥ

tasminkāle ca kālajño nārado'tha mahāmuniḥ //
ājagāma mahātejā bhramamāṇaśca maṃtribhiḥ

devairnamaskṛtaḥ so'tha pūjitaśca yathāvidhi //
niveditaṃ yathāvṛttaṃ tuhuṇḍasya viceṣṭitam

papracchuratha te maṃtraṃ nāradaṃ munisattamam //
kathayasva mahābuddhe sarvaṃ jānāsi sarvvataḥ

īdṛkkāle samāyāte kiṃ karttavyaṃ mahāmune //
nājñātaṃ triṣu lokeṣu kiṃciddevarṣisattama

muhūrtaṃ dhyānamālaṃbya kiṃcinmīlya ca locane //
upāyaṃ kathayāmāsa sarvaduḥkhavināśanam

mahākālavane ramye śīghraṃ gacchaṃtu vihvalāḥ //
indradyumneśvarasyaiva paścādbhāge vyavasthitāḥ //
sevadhvaṃ paramaṃ liṃgamīśāneśvarasaṃjñakam

purā ceśānakalpe tu īśānena sukhena hi //
muninā śrotriyeṇaiva vedābhyāsaratena vai //
uttamāṃgapadaṃ labdhaṃ śaṃkarasya ca mūrddhani

tasyārādhanamātreṇa mano'bhīṣṭaṃ hi labhyate

nāradasya vacaḥ śrutvā devā muditamānasāḥ //
jagmuryatra mahalliṃgaṃ stutiṃ sarve'pyakurvata

īśāneśāna īśāna tatpuruṣa namo'stu te //
namo vāma mahāghora sadyomukha namonamaḥ //

tryakṣa bharga mahādeva umākāṃta namonamaḥ //
namaḥ śiva namo bhīma namaḥ sarva namonamaḥ

namaḥ śaṃbho namo rudra virūpākṣa namonamaḥ //
tvayā deva prajāḥ sarvāḥ sadevāsuramānuṣāḥ

sthāvarāṇi ca bhūtāni jaṃgamāni carāṇi ca //
brahma vedāśca vedyaṃ ca tvayā sṛṣṭaṃ maheśvara

śiraste gaganaṃ devā netre śaśidivākarau //
niḥśvāsaḥ pavanaścāpi tejo'gniśca tavācyutaḥ

bāhavaste diśaḥ sarvāḥ kukṣiścaiva mahārṇavaḥ //
urū te parvatā deva caraṇau pṛthivī matā

iṃdrasomāgnivaruṇā devāsuramahoragāḥ //
prahvāstvāmanutiṣṭhaṃti stuvaṃto vividhaiḥ stavaiḥ

tvayā vyāptāni bhūtāni sarvāṇi bhuvaneśvara //
tvayi tuṣṭe jagattuṣṭaṃ tvayi kruddhe mahadbhayam

bhayānāmapanetāsi tvamekaḥ śatrusūdanaḥ //
asurāṇāṃ samarthānāṃ vināśaśca tvayā kṛtaḥ

na ca vikramaṇairdeva nirvāṇamagamatparam //
tvaṃ hi karttā vikarttā ca bhūtānāmiha sarvaśaḥ

ārādhayitvā sarve te namasyaṃti ca sarvaśaḥ //
etasminnaṃtare devi liṃgamadhyātsamutthitā

dhūmāvṛtā mahā jvālā yayā dagdhaḥ sa dānavaḥ //
tuhuṇḍo muṃḍaputrastu sasainyaparivāritaḥ

svādhikārāṃśca saṃprāpurliṃgasyāsya prabhāvataḥ //
suraiścākhyā samādiṣṭā liṃgasyāsyaiva harṣitaḥ

aiśvaryaśīlamasyāstītyasmākaṃ ca viniścitam //
īśāna iti vikhyātastrailokye ca bhaviṣyati

īśāneśvarasaṃjñaṃ tu ye samārādhayaṃti ca //
kīrtirlakṣmīrdhruvā teṣāṃ siddhiḥ prītirbhaviṣyati

pūjyamānaḥ sadā devairgaṃdharvāpsarasāṃgaṇaiḥ //
svargalokaṃ gamiṣyaṃti vimānairujjvalairmudā

brāhmaṇāḥ kṣatriyā vaiśyāḥ śūdrāḥ striyaḥ kumārikāḥ //
yathābhilaṣitānkāmānāpnuvaṃti na saṃśayaḥ

yaḥ karoti naraḥ samyagdarśanaṃ niyamasthitaḥ //
na kutra tasya hāniḥ syādyāvajanmaśataṃ bhavet

sarvadā sarvakāryeṣu te samarthā yaśasvini //
īśāneśvarasaṃjñaṃ tu ye paśyaṃti dinedine

evaṃ te kathito devi prabhāvaḥ pāpanāśanaḥ //
īśāneśvaradevasya śrūyatāmapsareśvaraḥ

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmya īśāneśvaramāhātmyavarṇanaṃnāma ṣoḍaśo'dhyāyaḥ