Scripture Library

Skanda Purana · Verses 5.15-3

5.15-3.15.1

śrīmārkaṇḍeya uvāca -
tato mātṛsahasraiśca raudraiśca parivāritā /
kālarātrirjagatsarvaṃ harate dīptalocanā

5.15-3.15.2

tatastā mātaro ghorā brahmaviṣṇuśivātmikāḥ /
vāyvindrānalakauberā yamatoyeśaśaktayaḥ

5.15-3.15.3

skandakroḍanṛsiṃhānāṃ vicarantyo bhayānakāḥ /
cakraśūlagadākhaḍgavajraśaktyṛṣṭipaṭṭiśaiḥ

5.15-3.15.4

khaṭvāṅgairulmukairdīptairvyacaranmātaraḥ kṣaye /
umāsaṃnoditā sarvāḥ pradhāvantyo diśo daśa

5.15-3.15.5

tāsāṃ caraṇavikṣepairhuṅkārodgāranisvanaiḥ /
trailokyametatsakalaṃ vipradagdhaṃ samantataḥ

5.15-3.15.6

hāhāravākranditanisvanaiśca prabhinnarathyāgṛhagopuraiśca /
babhūva ghorā dharaṇī samantātkapālakośākulakarburāṅgī

5.15-3.15.7

yadetacchatasāhasraṃ jambūdvīpaṃ nigadyate /
sarvameva taducchannaṃ samādhṛṣya nṛpottama

5.15-3.15.8

jambuṃ śākaṃ kuśaṃ krauñcaṃ gomedaṃ śālmalistathā /
puṣkaradvīpasahitā ye ca parvatavāsinaḥ

5.15-3.15.9

te grastā mṛtyunā sarve bhūtairmātṛgaṇaistathā /
mahāsurakapālaiśca māṃsamedovasotkaṭaiḥ

5.15-3.15.10

rudhirodgāraśoṇāṅgī mahāmāyā subhīṣaṇā /
pibantī rudhiraṃ tatra mahāmāṃsavasāpriyā

5.15-3.15.11

kapālahastā vikaṭā bhakṣayantī surāsurān /
nṛtyantī ca hasantī ca viparītā mahāravā

5.15-3.15.12

trailokyasaṃtrāsakarī vidyutsaṃsphoṭahāsinī /
saptadvīpasamudrāntāṃ bhakṣayitvā ca medinīm

5.15-3.15.13

tataḥ svasthānamagamadyatra devo maheśvaraḥ /
narmadātīramāśrityāvasanmātṛgaṇaiḥ saha

5.15-3.15.14

amarāṇāṃ kaṭe tuṅge nṛtyantī hasitānanā /
amarā devatāḥ proktāḥ śarīraṃ kaṭamucyate

5.15-3.15.15

taiḥ kaṭairāvṛto yasmātparvato'yaṃ nṛpottama /
chinnabhinnāsthinikarairvasāmedo'sraviplutaiḥ

5.15-3.15.16

amaraṃkaṭa ityevaṃ tena prokto manīṣibhiḥ /
mahāpavitro lokeṣu śambhunā sa vinirmitaḥ

5.15-3.15.17

nityaṃ saṃnihitastatra śaṅkaro hyumayā saha /
tato'haṃ niyatastatra tasya pādāgrasaṃsthitaḥ

5.15-3.15.18

prahvaḥ praṇatabhāvena staumi taṃ nīlalohitam /
tatastālakasampātairgaṇairmātṛgaṇaiḥ saha

5.15-3.15.19

saṃpranṛtyati saṃhṛṣṭo mṛtyunā saha śaṅkaraḥ /
khaṭvāṅgairulmukaiścaiva paṭṭiśaiḥ parighaistathā

5.15-3.15.20

māṃsamedovasāhastā hṛṣṭā nṛtyanti saṃghaśaḥ /
vāmanā jaṭilā muṇḍā lambagrīvoṣṭhamūrddhajāḥ

5.15-3.15.21

mahāśiśnodarabhujā nṛtyanti ca hasanti ca /
vikṛtairānanairghorairarbhujolbaṇamukhādibhiḥ

5.15-3.15.22

amaraṃ kaṇṭakaṃ cakruḥ prāpte kālaviparyaye /
teṣāṃ madhye mahāghoraṃ jagatsantrāsakāraṇam

5.15-3.15.23

mṛtyuṃ paśyāmi nṛtyantaṃ taḍitpiṅgalamūrddhajam /
tasya pārśve sthitāṃ devīṃ vimalāmbarabhūṣitām

5.15-3.15.24

kuṇḍalodghuṣṭagaṇḍāṃ tāṃ nāgayajñopavītinīm /
vicitrairupahāraiśca pūjayantīṃ maheśvaram

5.15-3.15.25

apaśyaṃ narmadāṃ tatra mātaraṃ viśvavanditām /
nānātaraṅgāṃ sāvartāṃ suvelārṇavasaṃnibhām

5.15-3.15.26

mahāsaraḥsaritpātairadṛśyāṃ dṛśyarūpiṇīm /
vandyamānāṃ suraiḥ siddhairmunisaṅghaiśca bhārata

5.15-3.15.27

etasminnantare ghorāṃ saptasaptakasaṃjñitām /
mahāvīcyaughaphenāḍhyāṃ kurvantīṃ sajalaṃ jagat

5.15-3.15.28

dṛṣṭavānnarmadāṃ devīṃ mṛgakṛṣṇāmbarāṃ punaḥ /
sadhūmāśaninirhrādairvahantīṃ saptadhā tadā

5.15-3.15.29

iti saṃhāramatulaṃ dṛṣṭavānrājasattama /
naṣṭacandrārkakiraṇamabhūdetaccarācaram

5.15-3.15.30

mahotpātasamudbhūtaṃ naṣṭanakṣatramaṇḍalam /
alātacakravattūrṇamaśeṣaṃ bhrāmayaṃstataḥ

5.15-3.15.31

vimānakoṭisaṃkīrṇaḥ sa kiṃnaramahoragaḥ /
mahāvātaḥ sanirghāto yenākampaccarācaram

5.15-3.15.32

rudravaktrātsamudbhūtaḥ saṃvarto nāma viśrutaḥ /
vāyuḥ saṃśoṣayāmāsa vitatan saptasāgarān

5.15-3.15.33

uddhūlitāṅgaḥ kapilākṣamūrddhajo jaṭākalāpairavabaddhamūrddhajaḥ /
mahāravo dīptaviśālaśūladhṛksa pātu yuṣmāṃśca dine dine haraḥ

5.15-3.15.34

śūlī dhanuṣmānkavacī kirīṭī śmaśānabhasmokṣitasarvagātraḥ /
kapālamālākulakaṇṭhanālo mahāhisūtrairavabaddhamauliḥ

5.15-3.15.35

sa gonasaughaiḥ pariveṣṭitāṅgo viṣāgnicandrāmarasindhumauliḥ /
pinākakhaṇṭūvāṅgakarālapāṇiḥ sa kṛttivāsā ḍamarupraṇādaḥ

5.15-3.15.36

sa saptalokāntaraniḥsṛtātmā mahabhujāveṣṭitasarvagātraḥ /
netreṇa sūryodayasannibhena pravālakāṅkūranibhodareṇa

5.15-3.15.37

sandhyābhraraktotpalapadmarāgasindūravidyutprakarāruṇena /
tatena liṅgena ca locanena cikrīḍamānaḥ sa yugāntakāle

5.15-3.15.38

hiraṇmayenaiva samutsṛjan sa daṇḍena yadvadbhagavān sameruḥ /
pādāgravikṣepaviśīrṇaśailaḥ kurvañjagatso'pi jagāma tatra

5.15-3.15.39

saṃhartukāmastridivaṃ tvaśeṣaṃ pramuñcamāno vikṛtāṭṭahāsam /
jahāra sarvaṃ tridivaṃ mahātmā saṃkṣobhayanvai jagadīśa ekaḥ

5.15-3.15.40

taṃ devamīśānamajaṃ vareṇyaṃ dṛṣṭvā jagatsaṃharaṇaṃ maheśam /
sā kālarātriḥ saha mātṛbhiśca gaṇāśca sarve śivamarcayanti

5.15-3.15.41

nandī ca bhṛṅgī ca gaṇādayaśca taṃ sarvabhūtaṃ praṇamanti devam /
jāgadvaraṃ sarvajanasya kāraṇaṃ haraṃ smarārātimaharniśaṃ te

// iti śrīskānde mahāpurāṇa ekāśītisāhasryāṃ pañcama āvantyakhaṇḍe revākhaṇḍe narmadāmāhātmye sṛṣṭisaṃharaṇasaṃrambhavarṇanaṃ nāma pañcadaśo'dhyāyaḥ //

Original text: skandapurāṇam · Sanskrit Wikisource contributors · Sanskrit Wikisource · CC BY-SA 4.0