Skanda Purana · Verses 5.15-2

// śrīmahādeva uvāca // //
iṃdradyumneśvaraṃ viddhi śivaṃ paṃcadaśaṃ priye //
yasya darśanamātreṇa yaśaḥ kīrtiśca jāyate

āsīdrājā purā devi iṃdradyumno mahīpatiḥ //
yeneyaṃ rakṣitā pṛthvī pitā putramivaurasam

dṛṣṭvā so'tha bahūnyajñānbhūmau pracuradakṣiṇān//
gataḥ svargaṃ mahātmā vai sarvakāmaphalapradam

sa cātha pratyutaḥ svargānnaṣṭakīrtiryadā kṣitau //
papāta bhūmau sahasā gatapuṇyo narā dhipaḥ //
patitaściṃtayāmāsa bhraśaṃ śokapariplutaḥ

kṛtasya karmaṇastvatra bhujyate yatphalaṃ divi //
na cānyatkriyate tadyadbhūtalasthena bhujyate

so'tra doṣo matastasyāmatastatpatanaṃ ca yat //
patanāttu mahadduḥkhaṃ paritāpaśca jāyate

svargabhājo bhavaṃtīha yāvatkīrtiśca jāyate //
divaṃ spṛśati bhūmiṃ ca śabdaḥ puṇyasya karmaṇaḥ//
yāvatsa śabdo bhavati tāvatpuruṣa ucyate

akīrtiḥ kīrttyate yasya loke bhūtasya kasyacit//
sa patatyadhamām̐llokānyāvacchabdo'sya kīrttitaḥ

tasmātkalyāṇavṛttaḥ syādanyathā patanaṃ bhuvi //
vidhāya vṛttaṃ pāpiṣṭhaṃ kīrtimevābhivarddhayet

atyaṃtaṃ ślāghayāmyatra kīrttiṃ svargakarāṃ parām //
devairapi hi sā kīrtiḥ kāṃkṣyate paramā yataḥ

yāvatkīrttirmanuṣyāṇāṃ varttate bhuvi cākṣayā //
tejaḥ puṃjena yuktāni śarīrāṇi bhavaṃti hi

na svedo na ca daurgaṃdhyaṃ purīṣaṃ mūtrameva vā //
teṣāṃ nirvacanaṃ rājā vidhātā ca triviṣṭape //
uhyaṃte te vimānaiśca nānābharaṇabhūṣitāḥ

evaṃ vimṛśya nṛpatiriṃdradyumno varānane //
svargakāmo jagāmātha himavaṃtaṃ nagottamam

yatra tepe tapastīvraṃ mārkaṇḍeyo mahāmuniḥ //
dṛṣṭvā praṇamya śirasā sāṣṭāṃgaṃ ca punaḥpunaḥ //
papraccha vinayopetastamṛṣiṃ śaṃsitavratam

viditāstava dharmajña devadānavarākṣasāḥ //
rājavaṃśāśca vividhā ṛṣivaṃśāśca śāśvatāḥ

na te'styaviditaṃ kiñcidasmim̐lloke dvijottama //
etadicchāmyahaṃ śrotuṃ tattvena kathyatāṃ tvayā //
kathaṃ kīrttirdhruvā loke jāyate kiṃ tapaḥphalāt

// mārkaṇḍeya uvāca // //
haṃta te kathayiṣyāmi yataḥ kīrtiṃ samīhase //
yāvatkīrtirbhūmisaṃsthā tāvadvasa suraiḥ saha //
tadgaccha śīghraṃ dharmajña mahākālavanottamam

kalkaleśvaradevasya samīpe vāma bhāgataḥ //
liṃgaṃ pāpaharaṃ tatra samārādhaya yatnataḥ

tasyābhyarcanamātreṇa lapsyase kīrtimuttamām //
svargaṃ sanātanaṃ caiva yatsurairapi durllabham //

gatvā sa pūjayāmāsa talliṃgaṃ kīrtitaṃ tvidam //
tato devāḥ sagandharvāḥ praśasya ca mudānvitāḥ

antarikṣe vimānasthā procurvācaṃ narādhipam //
tvatkīrttirnirmalā jātā liṃgasyāsya samarcanāt

adyaprabhṛti rājeṃdra liṃgaṃ tvannāma nāmataḥ //
khyātiṃ yāsyati loke'sminniṃdradyumneti niścitam

indradyumneśvaraṃ devaṃ pūjayiṣyaṃti ye narāḥ //
sarvapāpavinirmuktā vimānaiḥ sarvakāmikaiḥ

svargaṃ yāsyaṃti te hṛṣṭāḥ stūyamānāḥ surarṣibhiḥ//
kiṃcicca durlabhaṃ loke teṣāṃ naiva bhaviṣyati

darśanaṃ ye kariṣyaṃti lobhādvāpi prasaṃgataḥ//
teṣāṃ kīrtiryaśaḥ puṇyaṃ dharmaścaivaṃ bhaviṣyati

na svargātpatanaṃ teṣāṃ yāvadiṃdrāścaturddaśa //
ye ca pūjāṃ kariṣyaṃti caturdaśyāṃ viśeṣataḥ //
te kulaṃ tārayiṣyaṃti mātṛkaṃ paitṛkaṃ sadā

ityuktā tridaśāḥ sarve liṃgaṃ saṃpūjya yatnataḥ //
iṃdradyumnena sahitāḥ punaḥ svargaṃ gatāḥ priye

eṣa te kathito devi prabhāvaḥ pāpanāśanaḥ //
indradyumneśadevasya śrūyatāmaparaḥ priye

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṃgamāhātmya indradyumneśvaramāhātmyavarṇanaṃnāma paṃcadaśo'dhyāyaḥ