Skanda Purana · Chapter 5.15

// sanatkumāra uvāca // //
śṛṇu vyāsa mahātīrthaṃ nāmnā śaṃkaravāpikā //
krīḍamānena devena nirmitaṃ tīrthamuttamam

prakṣiptaṃ devadevena kapālakṣālanaṃ jalam //
vāpīgataṃ kṛtaṃ yasmādataḥ śaṃkaravāpikā

arkāṣṭamyāṃ naraḥ snātvā diśāsu vidiśāsu ca //
pūrvādikramato yāvadvāpīmadhye tathaiva ca

haviṣyānnayutānvyāsa dadyācca karakā nnavān//
śākamūlāṃśca viprebhyastasya puṇyaphalaṃ śṛṇu

paratra ceha ye lokāḥ sarvabhāvasamanvitāḥ //
tatratatra samāyāti bhunaktyaiśvaryamuttamam //

ye narā kīrtayiṣyaṃti māhātmyamatibhāvikāḥ //
rudraloke'pi te pūjyāstebhyo'pi satataṃ namaḥ

// sanatkumāra uvāca // //
tato vai devadeveśaḥ pinākī vṛṣabhadhvajaḥ //
tuṣṭāva prayato bhūtvā devadevaṃ divākaram

ājagāma divānāthaḥ saṃtuṣṭaḥ prāha śaṃkaram

//
// sūrya uvāca // //
varaṃ varaya bhūteśa varado'smi dadāmi te //
tamāha varadaścettvaṃ yācyamānaṃ kuruṣva me

aṃśena sthīyatāmatra hitārthaṃ sarvadehinām //
avatīrṇo ravistatra śrutvā māheśvaraṃ vacaḥ

tato devādhidevasya śaṃkarasya mahaujasaḥ //
vākyena bhāskarastatra yayau khyātiṃ mahādyutiḥ

śaṃkarādityanāmeti lokānugrahakārakaḥ //
devā daityāśca gaṃdharvā vismitāḥ saha kinnaraiḥ

aho dhanyamidaṃ sthānaṃ yatrāste tripurāṃtakaḥ //
bhāskaro'pi ca tatrasthastīrthamadhye ca vartate

tatastuṣṭāśca te sarve brahmādyāḥ surasattamāḥ //
deveśaṃ pūjayāmāsurādityaṃ śaṃkaraṃ tathā

mūrtimaṃtaśca te devā avatīrya ca śobhanam //
sthāpayitvā'bravīdvākyaṃ ye'tra snāsyaṃti mānavāḥ

na duḥkhaṃ jāyate teṣāṃ jarāmaraṇa śokajam //
sarvayajñeṣu yatpuṇyaṃ sarvadāneṣu yatphalam//
tasmāccaivādhikaṃ hyatra śaṃkarādityadarśanāt

vyādhayo nādhayaścaiva dāridryaṃ na kadācana //
aiśvaryaṃ cātulaṃ teṣāṃ jāyate bhuvi sarvadā

na rogo na ca dāridryaṃ viyogo na ca bandhubhiḥ //
jāyate muniśārdūla śaṃkarādityadarśanāt

ityevaṃ devadevena purā vai śūlapāṇinā //
śaṃkarādityanāmnā ca sthāpitaṃ paramaṃ padam

iti śrīskāṃde mahāpurāṇa ekāśītisāhasryāṃ saṃhitāyāṃ paṃcama āvaṃtyakhaṇḍe'vantīkṣetramāhātmye śaṃkarādityamāhātmyavarṇanaṃnāma pañcadaśo'dhyāyaḥ