Skanda Purana · Verses 5.12-2

// śrīhara uvāca //
dvādaśaṃ viddhi deveśi lokapāleśvaraṃ śivam //
yasya darśanamātreṇa sarvapāpaiḥ pramucyate

purā daityagaṇā devi prādurbhūtāḥ sahasraśaḥ //
hiraṇyakaśiporvakṣaḥsthalādatiparākramāḥ

tairiyaṃ vasudhā vyāptā saśailavanakānanā //
vidhvastāḥ svāśramāḥ sarve yajñā vidhvaṃsitāstathā

brāhmaṇā bhakṣitāścaiva veda vedāṃgapāragāḥ //
pūritānyagnikuṇḍāni pāṃsunā madhunā tathā

vidhvastāḥ kalaśāḥ sarve mṛdbhāṃḍādi ca cūrṇitam //
niḥsvādhyāyavaṣaṭkārā svadhāsvāhāvivarjitā

kṛtā ca dharaṇī devi naṣṭayajñotsavābhavat //
lokapālāstato bhītā mādhavaṃ śaraṇaṃ gatāḥ

ūcuḥ prāṃjalayaḥ sarve kṣudhārtā duḥkhitāḥ kṛtāḥ //
vayaṃ glāniṃ gatā deva yajñabhāgaṃ vinā kṛtāḥ

vayaṃ trātāstvayā pūrvaṃ namucervṛṣaparvaṇaḥ //
hiraṇyakaśipo raudrānnarakācca murostathā

tathā rakṣa suraśreṣṭha bhayaṃ naḥ samupasthitam

teṣāṃ tadvacanaṃ śrutvā śaṃkhacakragadādharaḥ //
jagāma sa tato daityāḥ praviṣṭā varuṇālayam //5.2.12.१ ०//
te niṣkramya tato rātrau nighnaṃti dvijasattamān //
tāpasāndīkṣitāndevi dharmavrataparāyaṇān

atha svargaṃ gatāḥ kāṃte jitaḥ śakro marutpatiḥ //
tathaiva dakṣiṇāmāśāṃ dharmarājo jitastataḥ

gatvātha paścimāmāśāṃ jalarājo vinirjitaḥ //
uttare dhanado devi tairdaityaiḥ sa vinirjitaḥ

tataste vyākulā jātā viṣṇuṃ śaraṇamāgatāḥ //
upāyaḥ kathito devi devebhyo viṣṇunā tadā

mahākālavanaṃ gatvā devā bhaktyā samāhitāḥ//
ārādhayata sarveśaṃ śaṃkaraṃ lokaśaṃkaram

bhavatāṃ bhavitā siddhistatra tasya prasādataḥ

iti tasya vacaḥ śrutvā kṛṣṇasyāmitatejasaḥ //
prasthitā lokapālāste mahākālavane śubhe

tāvattatraiva saṃruddhā daityaiḥ śastradharaistadā//
bhūyo naṣṭāśca saṃprāptā yatra devo janārdanaḥ

kathayāmāsuratyugraṃ yathā ruddhaṃ jagattrayam //
nārāyaṇena te proktā lokapālāḥ punaḥ punaḥ

yūyaṃ vratadharā bhūtvā kapālaiśca vibhūṣitāḥ //
khaṭvāṃgadhāriṇaḥ śāṃtāḥ paṃcamudrāvibhūṣitāḥ

bhasmabhūṣitasarvāṃgāḥ kṣudraghaṃṭāvirājitāḥ //
mahāvratadharā bhūtvā mahākālavano ttamam //
gacchadhvaṃ brahmaṇā sārddhaṃ pādabaddhaiśca nūpuraiḥ

atha te lokapālāśca śrutvā kṛṣṇasya bhāṣitam //
samāyātā mahādevi kṛtvā kāpālikaṃ vapuḥ

tatra dṛṣṭaṃ mahalliṃgaṃ tejasāṃ rāśimadbhutam //
stutaṃ ca vividhaiḥ stotrairlokapālaiḥ punaḥpunaḥ

tatastu tasya liṃgasya vahnijvālā viniḥsṛtā //
yayā te dānavāḥ sarve dagdhā bhasmatvamāgatāḥ

jñātvā liṃgasya māhātmyaṃ nāma cakruḥ samāhitāḥ //
sevitaṃ lokapālaistu liṃgaṃ tejomayaṃ param

lokapāleśvaronāma khyātiṃ yāsyati bhūtale //
ityuktvā tridaśāḥ sarve lokapālaiḥ samāvṛtāḥ //
svasvasthānaṃ gatā divyaṃ yathāpūrvaṃ mudānvitāḥ

ye paśyaṃti narā devi lokapāleśvaraṃ śivam //
samṛddhibhiḥ susaṃpannā bhaveyurjanmajanmasu //

na dāridryaṃ na ca vyādhirnākālamaraṇaṃ tathā //
aiśvaryaṃ cātulaṃ teṣāṃ jāyate darśanātsadā

yo yamuddiśya vai kāmaṃ darśanaṃ tu kariṣyati //
tasya tajjāyate sarvaṃ mṛtasya paramā gatiḥ

aśvamedhasya yajñasya samyagiṣṭasya yatphalam //
tatphalaṃ labhate devi lokapāle śvarārcanāt

prasaṃgenāpi yaḥ paśyellokapāleśvaraṃ śivam //
modate svargaloke sa lokapālaiḥ samaṃ sadā

saṃkrāṃtau somavāre ca caturdaśyāṃ viśeṣataḥ //
ye paśyaṃti narā bhaktyā hyaṣṭamyāmayanadvaye

te durddharṣā bhavaṃtīha śatrūṇāṃ saṃgare tathā //
mṛtā yāṃti vimānena śakralokaṃ sudurlabham

krameṇa vāruṇaṃ lokaṃ dhanadasya yathāsukham //
punaḥ paitāmahaṃ yāṃti lokaṃ devaiḥ sudurlabham

eṣa te kathito devi prabhāvaḥ pāpanāśanaḥ //
durlabhaḥ paramo guhyaṃ kāmeśvaramatho śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmye lokapāleśvaramāhātmyavarṇanaṃnāma dvādaśo'dhyāyaḥ