Skanda Purana · Verses 5.12-3

śrīmārkaṇḍeya uvāca -
etacchrutvā vaco rājansaṃhṛṣṭā ṛṣayo'bhavan /
narmadāṃ stotumārabdhāḥ kṛtāñjalipuṭā dvijāḥ

namo'stu te puṇyajale namo makaragāmini /
namaste pāpamocinyai namo devi varānane

namo'stu te puṇyajalāśraye śubhe viśuddhasattvaṃ surasiddhasevite /
namo'stu te tīrthagaṇairniṣevite namo'stu rudrāṅgasamudbhave vare

namo'stu te devi samudragāmini namo'stu te devi varaprade śive /
namo'stu lokadvayasaukhyadāyini hyanekabhūtaughasamāśrite'naghe

saridvare pāpahare vicitrite gandharvayakṣoragasevitāṅge /
sanātani prāṇigaṇānukampini mokṣaprade devi vidhehi śaṃ naḥ

mahāgajairghamahiṣairvarāhaiḥ saṃsevite devi mahormimāle /
natāḥ sma sarve varade sukhaprade vimocayāsmānpaśupāśabandhāt

pāpairanekairaśubhairvibaddhā bhramanti tāvannarakeṣu martyāḥ /
mahānilodbhūtataraṅgabhūtaṃ yāvattavāmbho hi na saṃspṛśanti

anekaduḥkhaughabhayārditānāṃ pāpairanekairabhiveṣṭitānām /
gatistvamambhojasamānavakre dvandvairanekairapi saṃvṛtānām

nadyaśca pūtā vimalā bhavanti tvāṃ devi samprāpya na saṃśayo'tra /
duḥkhāturāṇāmabhayaṃ dadāsi śiṣṭairanekairabhipūjitāsi

spṛṣṭaṃ karaiścandramaso raveśca tadaiva dadyātparamaṃ padaṃ tu /
yatropalāḥ puṇyajalāplutāste śivatvamāyānti kimatra citram

bhramanti tāvannarakeṣu martyā duḥkhāturāḥ pāpaparītadehāḥ /
mahānilodbhūtataraṅgabhaṅgaṃ yāvattavāmbho na hi saṃśrayanti

mlecchāḥ pulindāstvatha yātudhānāḥ pibanti ye'mbhastava devi puṇyam /
muktā bhavantīha bhayāttu ghorānniḥsaṃśayaṃ te'pi kimatra citram

sarāṃsi nadyaḥ kṣayamabhyupetā ghore yuge'smin hi kalau pradūṣite /
tvaṃ bhrājase devi jalaughapūrṇā divīva nakṣatrapathe ca gaṅgā

tava prasādādvarade variṣṭhe kālaṃ yathemaṃ paripālayitvā /
yāmo'tha rudraṃ tava suprasādādvayaṃ tathā tvaṃ kuru vai prasādam

gatistvamambeva piteva putrāṃstvaṃ pāhi no yāvadimaṃ yugāntam /
kālaṃ tvanāvṛṣṭihataṃ sughoraṃ yāvattarāmastava suprasādāt

paṭhanti ye stotramidaṃ dvijendrāḥ śṛṇvanti ye cāpi narāḥ praśāntāḥ /
te yānti rudraṃ vṛṣasaṃyutena yānena divyāmbarabhūṣitāśca

ye stotrametatsatataṃ paṭhanti snātvā tu toye khalu narmadāyāḥ /
ante hi teṣāṃ sariduttameyaṃ gatiṃ viśuddhāmacirāddadāti

prātaḥ samutthāya tathā śayāno yaḥ kīrtayetānudinaṃ stavaṃ ca /
sa muktapāpaḥ suviśuddhadehaḥ samāśrayaṃ yāti maheśvarasya

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śrīnarmadāmāhātmye narmadāstotrakathanaṃ nāma dvādaśo'dhyāyaḥ //