સ્કંદ પુરાણ · શ્લોક 5.12-2

॥ શ્રીહર ઉવાચ ॥
દ્વાદશં વિદ્ધિ દેવેશિ લોકપાલેશ્વરં શિવમ્ ॥
યસ્ય દર્શનમાત્રેણ સર્વપાપૈઃ પ્રમુચ્યતે

પુરા દૈત્યગણા દેવિ પ્રાદુર્ભૂતાઃ સહસ્રશઃ ॥
હિરણ્યકશિપોર્વક્ષઃસ્થલાદતિપરાક્રમાઃ

તૈરિયં વસુધા વ્યાપ્તા સશૈલવનકાનના ॥
વિધ્વસ્તાઃ સ્વાશ્રમાઃ સર્વે યજ્ઞા વિધ્વંસિતાસ્તથા

બ્રાહ્મણા ભક્ષિતાશ્ચૈવ વેદ વેદાંગપારગાઃ ॥
પૂરિતાન્યગ્નિકુણ્ડાનિ પાંસુના મધુના તથા

વિધ્વસ્તાઃ કલશાઃ સર્વે મૃદ્ભાંડાદિ ચ ચૂર્ણિતમ્ ॥
નિઃસ્વાધ્યાયવષટ્કારા સ્વધાસ્વાહાવિવર્જિતા

કૃતા ચ ધરણી દેવિ નષ્ટયજ્ઞોત્સવાભવત્ ॥
લોકપાલાસ્તતો ભીતા માધવં શરણં ગતાઃ

ઊચુઃ પ્રાંજલયઃ સર્વે ક્ષુધાર્તા દુઃખિતાઃ કૃતાઃ ॥
વયં ગ્લાનિં ગતા દેવ યજ્ઞભાગં વિના કૃતાઃ

વયં ત્રાતાસ્ત્વયા પૂર્વં નમુચેર્વૃષપર્વણઃ ॥
હિરણ્યકશિપો રૌદ્રાન્નરકાચ્ચ મુરોસ્તથા

તથા રક્ષ સુરશ્રેષ્ઠ ભયં નઃ સમુપસ્થિતમ્

તેષાં તદ્વચનં શ્રુત્વા શંખચક્રગદાધરઃ ॥
જગામ સ તતો દૈત્યાઃ પ્રવિષ્ટા વરુણાલયમ્ ॥5.2.12.૧ ૦॥
તે નિષ્ક્રમ્ય તતો રાત્રૌ નિઘ્નંતિ દ્વિજસત્તમાન્ ॥
તાપસાન્દીક્ષિતાન્દેવિ ધર્મવ્રતપરાયણાન્

અથ સ્વર્ગં ગતાઃ કાંતે જિતઃ શક્રો મરુત્પતિઃ ॥
તથૈવ દક્ષિણામાશાં ધર્મરાજો જિતસ્તતઃ

ગત્વાથ પશ્ચિમામાશાં જલરાજો વિનિર્જિતઃ ॥
ઉત્તરે ધનદો દેવિ તૈર્દૈત્યૈઃ સ વિનિર્જિતઃ

તતસ્તે વ્યાકુલા જાતા વિષ્ણું શરણમાગતાઃ ॥
ઉપાયઃ કથિતો દેવિ દેવેભ્યો વિષ્ણુના તદા

મહાકાલવનં ગત્વા દેવા ભક્ત્યા સમાહિતાઃ॥
આરાધયત સર્વેશં શંકરં લોકશંકરમ્

ભવતાં ભવિતા સિદ્ધિસ્તત્ર તસ્ય પ્રસાદતઃ

ઇતિ તસ્ય વચઃ શ્રુત્વા કૃષ્ણસ્યામિતતેજસઃ ॥
પ્રસ્થિતા લોકપાલાસ્તે મહાકાલવને શુભે

તાવત્તત્રૈવ સંરુદ્ધા દૈત્યૈઃ શસ્ત્રધરૈસ્તદા॥
ભૂયો નષ્ટાશ્ચ સંપ્રાપ્તા યત્ર દેવો જનાર્દનઃ

કથયામાસુરત્યુગ્રં યથા રુદ્ધં જગત્ત્રયમ્ ॥
નારાયણેન તે પ્રોક્તા લોકપાલાઃ પુનઃ પુનઃ

યૂયં વ્રતધરા ભૂત્વા કપાલૈશ્ચ વિભૂષિતાઃ ॥
ખટ્વાંગધારિણઃ શાંતાઃ પંચમુદ્રાવિભૂષિતાઃ

ભસ્મભૂષિતસર્વાંગાઃ ક્ષુદ્રઘંટાવિરાજિતાઃ ॥
મહાવ્રતધરા ભૂત્વા મહાકાલવનો ત્તમમ્ ॥
ગચ્છધ્વં બ્રહ્મણા સાર્દ્ધં પાદબદ્ધૈશ્ચ નૂપુરૈઃ

અથ તે લોકપાલાશ્ચ શ્રુત્વા કૃષ્ણસ્ય ભાષિતમ્ ॥
સમાયાતા મહાદેવિ કૃત્વા કાપાલિકં વપુઃ

તત્ર દૃષ્ટં મહલ્લિંગં તેજસાં રાશિમદ્ભુતમ્ ॥
સ્તુતં ચ વિવિધૈઃ સ્તોત્રૈર્લોકપાલૈઃ પુનઃપુનઃ

તતસ્તુ તસ્ય લિંગસ્ય વહ્નિજ્વાલા વિનિઃસૃતા ॥
યયા તે દાનવાઃ સર્વે દગ્ધા ભસ્મત્વમાગતાઃ

જ્ઞાત્વા લિંગસ્ય માહાત્મ્યં નામ ચક્રુઃ સમાહિતાઃ ॥
સેવિતં લોકપાલૈસ્તુ લિંગં તેજોમયં પરમ્

લોકપાલેશ્વરોનામ ખ્યાતિં યાસ્યતિ ભૂતલે ॥
ઇત્યુક્ત્વા ત્રિદશાઃ સર્વે લોકપાલૈઃ સમાવૃતાઃ ॥
સ્વસ્વસ્થાનં ગતા દિવ્યં યથાપૂર્વં મુદાન્વિતાઃ

યે પશ્યંતિ નરા દેવિ લોકપાલેશ્વરં શિવમ્ ॥
સમૃદ્ધિભિઃ સુસંપન્ના ભવેયુર્જન્મજન્મસુ ॥

ન દારિદ્ર્યં ન ચ વ્યાધિર્નાકાલમરણં તથા ॥
ઐશ્વર્યં ચાતુલં તેષાં જાયતે દર્શનાત્સદા

યો યમુદ્દિશ્ય વૈ કામં દર્શનં તુ કરિષ્યતિ ॥
તસ્ય તજ્જાયતે સર્વં મૃતસ્ય પરમા ગતિઃ

અશ્વમેધસ્ય યજ્ઞસ્ય સમ્યગિષ્ટસ્ય યત્ફલમ્ ॥
તત્ફલં લભતે દેવિ લોકપાલે શ્વરાર્ચનાત્

પ્રસંગેનાપિ યઃ પશ્યેલ્લોકપાલેશ્વરં શિવમ્ ॥
મોદતે સ્વર્ગલોકે સ લોકપાલૈઃ સમં સદા

સંક્રાંતૌ સોમવારે ચ ચતુર્દશ્યાં વિશેષતઃ ॥
યે પશ્યંતિ નરા ભક્ત્યા હ્યષ્ટમ્યામયનદ્વયે

તે દુર્દ્ધર્ષા ભવંતીહ શત્રૂણાં સંગરે તથા ॥
મૃતા યાંતિ વિમાનેન શક્રલોકં સુદુર્લભમ્

ક્રમેણ વારુણં લોકં ધનદસ્ય યથાસુખમ્ ॥
પુનઃ પૈતામહં યાંતિ લોકં દેવૈઃ સુદુર્લભમ્

એષ તે કથિતો દેવિ પ્રભાવઃ પાપનાશનઃ ॥
દુર્લભઃ પરમો ગુહ્યં કામેશ્વરમથો શૃણુ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે ચતુરશીતિલિઙ્ગમાહાત્મ્યે લોકપાલેશ્વરમાહાત્મ્યવર્ણનંનામ દ્વાદશોઽધ્યાયઃ