Skanda Purana · Verses 5.1-2

//atha śrīskāṃde mahāpurāṇe pañcamaāvantyakhaṃḍe 'vaṃtīsthacaturaśītiliṅgamāhātmyaṃ dvitīyaṃ prārabhyate//(५-२)//
// śrīgaṇeśāya namaḥ //
śrīmahākālāya namaḥ //
// athāvantyakhaṇḍe'vantīsthacaturaśītiliṅgamāhātmyaṃ prārabhyate //
// umovāca // //
pṛthivyāṃ yāni tīrthāni puṇyāśca saritastathā //
kathyatāṃ tāni yatnena śrāddhaṃ yeṣu pradīyate

// īśvara uvāca // //
asti lokeṣu vikhyātā gaṃgā tripathagāminī //
sevitā devagaṃdharvairmunibhiśca niṣevitā

tapanasya sutā devī yamunā lokapāvanī //
pitṝṇāṃ vallabhā devi mahāpātaka hāriṇī

candrabhāgā vitastā ca narmadā'marakaṃṭake //
kurukṣetraṃ gayā devi prabhāsaṃ naimiṣaṃ tathā

kedāraṃ puṣkaraṃ caiva tathā kāyāvarohaṇam //
tathā puṇyatamaṃ devi mahākālavanaṃ śubham

yatrāste śrīmahākālaḥ pāpeṃdhanahutāśanaḥ //
kṣetraṃ yojanaparyaṃtaṃ brahmahatyāvināśanam

bhuktidaṃ muktidaṃ kṣetraṃ kalikalmaṣanāśanam //
pralaye'pyakṣayaṃ devi duṣprāpyaṃ tridaśairapi

// umovāca // //
prabhāvaḥ kathyatāṃ deva kṣetrasyāsya maheśvara

yāni tīrthāni vaṃdyāni yāni liṃgāni saṃti vai //
tānyahaṃ śrotumicchāmi paraṃ kautūhalaṃ hi me

// īśvara uvāca // //
śṛṇu devi prayatnena prabhāvaṃ pāpanāśanam //
kṣetramādyaṃ mahādevi mamātīva priyaṃ sadā

yatrāsti ca mahāpuṇyā sarvapāpaharā parā //
tathā gaṃdhavatī puṇyā divyā navanadīpriyā

nīlagaṃgā caturthī tu śreṣṭhā nadyaḥ prakīrtitāḥ //
āsāṃ tu saṃgame snātvā śrāddhaṃ yaḥ kurute naraḥ //

gaṃgāyāstriguṇaṃ devi caturvargaphalapradam //
kṣetraṃ yojanaparyaṃtamavaṃtyā viddhi suvrate

siddhaliṃgāni tiṣṭhaṃti bhuktimuktikarāṇi ca //
īśvarāścaturāśītistathāṣṭau saṃti bhairavāḥ

ekādaśa tathā rudrā ādityā dvādaśa smṛtāḥ //
ṣaḍvai vināyakāścātra caturviṃśatimātaraḥ

yadāhaṃ gatavāṃstatra mahākālavane śubhe //
brahmaviṣṇvādayaḥ sarve tatrājagmurmudānvitāḥ

ebhirvyāptaṃ kṣetramidaṃ devi yojanamāyatam //
daśa sthānagato viṣṇuḥ sarvapāpapraṇāśanaḥ

etannāmāni yo'dhīte prabhāte bhaktitaḥ pumān //
vimuktaḥ sarvapāpaistu rudralokaṃ sa gacchati

// umovāca // //
caturāśītiliṃgāni tvayoktānīha yāni tu//
tāni vistarato brūhi sarvapāpaharāṇi tu

// hara uvāca // //
śṛṇu devi pravakṣyāmi teṣāṃ nāmāni yāni ca //
khyātaṃ pṛthivyāṃ prathamamagastyeśvaramuttamam //
yasya darśanamātreṇa kṛtakṛtyo naro bhavet

//
// umovāca // //
agastyeśvaranāmeha kathaṃ labdhamanena vai//
kasminsthāne kathaṃ jātaṃ vistarādvaktumarhasi

// hara uvāca // //
śṛṇu devi mahābhāge kathāmasya purātanīm //
sarvapāpapraśamanīṃ samīhitaphalapradām

purā'surairjitā devā nirutsāhāśca te tataḥ//
bhāgāścaiṣāṃ hṛtāḥ sarve nirāśāḥ pitaraḥ kṛtā //
bhraṣṭaiśvaryyāstadā devi cerurdevā mahītale

tataḥ kadācitte dīnā dīptamādityavarcasam//
dadṛśustejasāyuktamagastyaṃ vipulavratam

abhivādya tato devā dṛṣṭvā taṃ tejasā vṛtam //
idamūcurmahātmānamagastyaṃ lokaviśrutam

dānavairnirjitā yuddhe sarve svargācca pātitāḥ //
tatastvaṃ no bhayāttīvrāttrāyasva munipuṃgava

ityuktaḥ sa tadā devairagastyaḥ kupito'bhavat //
prajajvāla ca tejasvī kālāgniriva saṃkṣaye

tadā dīptāṃśujālena nirdagdhā dānavāstathā //
aṃtarikṣānmahādevi patitāśca sahasraśaḥ

dahyamānāstato daityā stasyāgastyasya tejasā //
ṛṣeśca dānavāḥ sarve pātālaṃ vavrajurbhayāt

tato 'gastyo mahātmā vai tānhatvā śokamūrchitaḥ //
babhūvātiśayaṃ cāsau ciṃtayodvignamānasaḥ

kṛtaṃ ghoraṃ mahatpāpaṃ hatā yaddānavā mayā //
ahiṃsā paramo dharmo manunā kathyate yataḥ //
kiṃ karomi kva gacchāmi kathaṃ śudhyeya cāpyaham

evaṃ ciṃtayatastasya samāgacchatpitāmahaḥ //
provāca sa muniṃ tatra kasmāttvaṃ śokavihvalaḥ

lakṣyase muniśārdūla kāraṇaṃ kathyatāṃ tvaram //
sa brahmāṇaṃ namaskṛtya kathayāmāsa pṛcchataḥ

devadeva jagannātha dāhoṃtarmānasaṃ mama //
brahmahatyā samāyātā yanmayā dānavā hatāḥ

mamopāyaṃ samācakṣva prasādatsurasattama //
bahukālārjitaṃ deva gataṃ me saṃkṣayaṃ tapaḥ

provācedaṃ suraśreṣṭhaḥ śṛṇu tvaṃ yatnataḥ param//
upāyaṃ sarvapāpasya kṣayo yena bhaveddhruvam

mahākālavane divye yakṣagaṃdharvasevite//
uttare vaṭayakṣiṇyā yattalliṃgamanuttamam

piśācasyāpi tīrthasya bhāge dakṣiṇataḥ sthitam //
taṃ samārādhyataḥ sarvaṃ pāpaṃ nāśamavāpnuyāt

ārādhaya śubhaṃ liṃgaṃ sarvapāpapraṇā śanam //
bāḍhaṃ provāca dharmātmā mahākālavanaṃ yayau

tasminsa liṃge deveśi samārādhanatatparaḥ //
babhūvāharniśaṃ bhaktyā taddhyānaikarato muniḥ

ahaṃ tuṣṭastadā devi munestasya mahātmanaḥ

proktaṃ mayā mahābhāga mune śṛṇu samāhitaḥ //
varaṃ varaya vipreṃdra yatte manasi varttate

tuṣṭo'hamanayā bhaktyā tapasā duṣkareṇa tu //
liṃgasyāsya prabhāveṇa jātastvaṃ nirmalo'dhunā

praṇaṣṭā brahmahatyā te dānavotthā munīśvara //
madīyaṃ vacanaṃ śrutvā tenoktaṃ varavarṇini

yadi deva prasannastvaṃ śaraṇāgatavatsalaḥ //
tvadaṃghriyugale bhūyānmama bhaktirmaheśvara

tapasyatha tathā dharme na me vighno bhavediti //
tasya tadvacanaṃ śrutvā kuṃbhayonermahātmanaḥ //
mayā proktaṃ viśālākṣi mune evaṃ bhaviṣyati

yastvayā pūjito devo brahmahatyāvināśanaḥ //
tvannāmnā triṣu lokeṣu so'haṃ khyāto bhaviṣyati

agastyeśvaradevopi vikhyāto bhuvanatraye //
evamukto mayā devi sa viprastatra saṃsthitaḥ //
kṛpayā tasya liṃgasya paṃcamudrāvibhūṣitaḥ

ye narāstanmahāliṃgaṃ nirīkṣiṣyaṃti bhaktitaḥ //
sarvapāpavinirmuktāḥ sarvakāmairalaṃkṛtāḥ

bhaviṣyaṃti mahātmānaḥ putraiśvaryasamanvitāḥ //
aṃtakāle ca māṃ yāṃti vimānaiḥ sarvakāmadaiḥ

stutā gaṃdharvamukhyaiśca rudraloke ca śāśvate //
ye'rcayaṃti sadā devamagastveśvarasaṃjñakam

kṛtapuṇyā narā marttyāste yāṃti paramaṃ padam //
saṃsmṛte devade veśe narāṇāṃ koṭijanmajam

aśubhaṃ kṣayamāpnoti kastaṃ na praṇamecchivam//
yaḥ praṇamya naro bhaktyā devaṃ taṃ ca niṣevate

mucyate brahmahatyādipā takairnarakapradaiḥ

rājasūyaśatenaiva yatpuṇyaṃ ca bhaviṣyati //
tatpuṇyamadhikaṃ devi darśanācca bhaviṣyati

kiṃ tīrthairvividhaiḥ snānaiḥ kiṃ dānairvividhaiḥ kṛtaiḥ //
te prāpsyaṃti phalaṃ sarve matprasādānna saṃśayaḥ

aṣṭamyāṃ ca caturddaśyāṃ dine somasya śaktitaḥ //
yaḥ kariṣyati liṃgasya pūjā bhaktisamanvitaḥ //
kulānāṃ tārayatyeva mātṛkaṃ pitṛkaṃ śatam

ye ca paśyaṃti puruṣā bhāvahīnāḥ prasaṃgataḥ //
na te paśyaṃti saṃsāre narakaṃ vai kadā cana

etatte kathitaṃ devi liṃgamahātmyamuttamam //
prathamaṃ kathitaṃ loke dvitīyaṃ śṛṇu yatnataḥ

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṃgamāhātmye'gastyeśvaramāhātmyavarṇanaṃnāma prathamo'dhyāyaḥ