Skanda Purana · Chapter 4.99

// vyāsa uvāca //
śṛṇu sūta yathā proktaṃ kuṃbhaje śarajanmanā //
devadevasya caritaṃ viśveśasya parātmanaḥ

agastya uvāca //
senānīḥ kathaya tvaṃ me tato nirvāṇamaṃḍapāt //
nirgatya devo deveṃdraiḥ sahitaḥ kiṃ cakāra ha

skaṃda uvāca //
muktimaṃḍapataḥ śaṃbhurbrahmaviṣṇupurogamaḥ //
śṛṃgāramaṃḍapaṃ prāpya yaccakāra vadāmi tat

prāṅmukhastūpaviśyeśaḥ sahāsmābhiḥ saheśayā //
brahmaṇādhiṣṭhitaḥ savye vāmapārśvetha śārṅgiṇā

vījyamāno maheṃdreṇa ṛṣibhiḥ parito vṛtaḥ //
gaṇaiḥ pṛṣṭhapradeśasthairjoṣaṃ tiṣṭhadbhirādarāt

udāyudhaiḥ sevyamānaścāvasanmānabhūribhiḥ //
brahmaṇe viṣṇave śaṃbhuḥ pāṇimutkṣipya dakṣiṇam

darśayāmāsa deveśo liṃgaṃ paśyata paśyata //
idameva paraṃ jyotiridameva parātparam //

idameva hi me rūpaṃ sthāvaraṃ cāti siddhidam //
ete pāśupatā siddhā ābāla brahmacāriṇaḥ

jiteṃdriyāstaponiṣṭhāḥ paṃcārthajñānanirmalāḥ //
bhasmakūṭaśayā dātāḥ suśīlā ūrdhvaretasaḥ

liṃgārcanaratā nityamananyeṃdriyamānasāḥ //
sadaiva vāruṇāgneya snānadvaya sunirmalāḥ

kaṃdamūlaphalāhārāḥ paratattvārpitekṣaṇāḥ //
satyavaṃto jitakrodhā nirmohā niṣparigrahāḥ

nirīhā niṣprapaṃcāśca nirātaṃkā nirāmayāḥ //
nirbhagā nirupāyāśca niḥsaṃgā nirmalāśayāḥ

nistīrṇodagrasaṃsārā nirvikalpā nirenasaḥ //
nirdvaṃdvā niścitārthāśca nirahaṃkāravṛttayaḥ

sadaiva me mahāprītā matputrā matsvarūpiṇaḥ //
ete pūjyā namasyāśca madbuddhyāmatparāyaṇaiḥ

arciteṣveṣvahaṃ prīto bhaviṣyāmi na saṃśayaḥ //
asminvaiśveśvare kṣetre saṃbhojyāḥ śivayoginaḥ

koṭibhojyaphalaṃ samyagekaika parisaṃkhyayā //
ayaṃ viśveśvaraḥ sākṣātsthāvarātmā jagatprabhuḥ

sarveṣāṃ sarvasiddhīnāṃ kartā bhaktijuṣāmiha //
ahaṃ kadāciddṛśyaḥ syāmadṛśyaḥ syāṃ kadācana

ānaṃdakānane cātra svairaṃ tiṣṭhāmi devatāḥ //
anugrahāya sarveṣāṃ bhaktānāmiha sarvadā

sthāsyāmi liṃgarūpeṇa ciṃtitārthaphalapradaḥ //
svayaṃbhūnyasvayaṃbhūni yāni liṃgāni sarvataḥ //
tāni sarvāṇi cāyāṃti draṣṭuṃ liṃgamidaṃ sadā

ahaṃ sarveṣu liṃgeṣu tiṣṭhāmyeva na saṃśayaḥ //
paraṃ tviyaṃ parāmūrtirmama liṃgasvarūpiṇī

yena liṃgamidaṃ dṛṣṭaṃ śraddhayā śuddhacakṣuṣā //
sākṣātkāreṇa tenāhaṃ dṛṣṭa eva divaukasaḥ

śravaṇādasya liṃgasya pātakaṃ janmasaṃcitam //
kṣaṇātkṣayati śṛṇvaṃtu devā ṛṣigaṇaiḥ saha

smaraṇādasya liṃgasya pāpaṃ janmadvayārjitam //
avaśyaṃ naśyati kṣipraṃ mama vākyānna saṃśayaḥ

etalliṃgaṃ samuddiśya gṛhānniṣkramaṇakṣaṇāt //
vilīyate mahāpāpamapi janmatrayārjitam

darśanādasya liṃgasya hayamedhaśatodbhavam //
puṇyaṃ labheta niyataṃ mamānugrahatomarāḥ

svayaṃbhuvosya liṃgasya mama viśveśituḥ surāḥ //
rājasūyasahasrasya phalaṃ syātsparśamātrataḥ

puṣpamātra pradānācca culukodakapūvarkam //
śatasauvarṇikaṃ puṇyaṃ labhate bhaktiyogataḥ

pūjāmātraṃ vidhāyāsya liṃgarājasya bhaktitaḥ //
sahasrahemakamalapūjāphalamavāpyate

vidhāya mahatī pūjāṃ paṃcāmṛtapuraḥsarām //
asya liṃgasya labhate puruṣārthacatuṣṭayam

vastrapūtajalairliṃgaṃ snāpayitvā mamāmarāḥ //
lakṣāśvamedhajanitaṃ puṇyamāpnoti sattamaḥ

sugaṃdhacaṃdanarasairliṃgamālipya bhaktitaḥ //
ālipyate surastrībhiḥ sugaṃdhairyakṣakardamaiḥ

sāmoda dhūpadānaiśca divyagaṃdhāśrayo bhavet //
ghṛtadīpaprabodhaiśca jyotīrūpa vimānagaḥ

karpūravartidīpena sakṛddattena bhaktitaḥ//
karpūradehagauraśrīrbhavedbhālavilocanaḥ

dattvā naivedyamātraṃ tu sikthesikthe yugaṃyugam //
kailāsādrau vaseddhīmānmahābhogasamanvitaḥ

viśveśe paramānnaṃ yo dadyātsājya saśarkaram //
trailokyaṃ tarpitaṃ tena sadevapitṛmānavam

mukhavāsaṃ tu yo dadyāddarpaṇaṃ cārucāmaram //
ullocaṃ sukhaparyaṃkaṃ tasya puṇyaphalaṃ mahat

saṃkhyā sāgararatnānāṃ kathaṃcitkartumiṣyate //
mukhavāsādidānasya kaḥ saṃkhyāmatra kārayet

pūjopakaraṇadravyaṃ yo ghaṃṭā gaḍukādikam //
bhaktyā me bhavane dadyātsa vasedatra meṃtike

yo gītavādyanṛtyānāmekaṃ matprītaye vyadhāt //
tasyāgrato divārātraṃ bhavettauryatrikaṃ mahat

citralekhanakarmādi prāsāde me'tra kārayet //
yaḥ sacitrānmahābhogānbhuṃkte matpurataḥ sthitaḥ

sakṛdviśveśvaraṃ natvā madhye janmasudhīrnaraḥ //
trailokyavaṃditapado jāyate vasudhāpatiḥ//

yastu viśvevaraṃ dṛṣṭvā hyanyatrāpi vipadyate //
tasya janmāṃtare mokṣo bhavatyeva na saṃśayaḥ

viśveśākhyā tu jihvāgre viśvanāthakathāśrutau //
viśveśaśīlanaṃ citte yasya tasya janiḥ kutaḥ

liṃgaṃ me viśvanāthasya dṛṣṭvā yaścānumodate //
sa me gaṇeṣu gaṇyeta mahāpuṇyabalāśritaḥ

nityaṃ viśveśa viśveśa viśvanātheti yo japet //
trisaṃdhyaṃ taṃ sukṛtinaṃ japāmyahamapi dhruvam

mamāpīdaṃ mahāliṃgaṃ sadā pūjyatamaṃ surāḥ .//
tasmātsarvaprayatnena pūjyaṃ devarṣi mānavaiḥ

yairna viśveśvaro dṛṣṭo yairna viśveśvaraḥ smṛtaḥ //
kṛtāṃtadūtaiste dṛṣṭāstaiḥ smṛtā garbhavedanā

yairidaṃ praṇataṃ liṃgaṃ praṇatāste surāsuraiḥ //
yasyai kena praṇāmena dikpālapadamalpakam //
dikpālapadataḥ pātaḥ pātaḥ śivanaternahi

śṛṇvaṃtu devarṣigaṇāḥ samastāstathyaṃ bruve tacca paropakṛtyai //
na bhūrbhuvaḥ svargamaharjanāṃtarviśveśatulyaṃ kvacidasti liṃgam

na satyaloke na tapasyaho surā vaikuṃṭhakailāsarasātaleṣu //
tīrthaṃ kvacidvai maṇikarṇikāsamaṃ liṃgaṃ ca viśveśvaratulyamanyataḥ

na viśvanāthasya samaṃ hi liṃgaṃ na tīrthamanyanmaṇikarṇikātaḥ //
tapovanaṃ kutracidasti nānyacchubhaṃ mamānaṃdavanena tulyam

vārāṇasī tīrthamayī samastā yasyāstunāmāpi hi tīrthatīrtham //
tatrāpi kācinmama saukhyabhūmirmahāpavitrā maṇikarṇikāsau

sthānādamuṣmānmamarājasaudhātprācyāṃ manāgīśasamāśritāyām //
savyepasavye ca karāḥ krameṇa śatatrayī yāpi śatadvayī ca

hastāḥ śataṃ paṃca surāpagāyāmudīcyavācyormaṇikarṇikeyam //
sārastrilokyāḥ parakośabhūmiryaiḥ sevitā te mama hṛcchayā hi

asminmamānaṃdavane yadetalliṃgaṃ sudhādhāma sudhāmadhāma //
āsapta pātālatalātsvayaṃbhu samutthitaṃ bhaktakṛpāvaśena

yesmiñjanāḥ kṛtrimabhāvabuddhyā liṃgaṃ bhajiṣyaṃti ca hetuvādaiḥ //
teṣāṃ hi daṃḍaḥ para eṣa eva nagarbhavāsādviramaṃti te dhruvam

yadyaddhitaṃ svasya sadaiva tattalliṃgetra deyaṃ mama bhaktimadbhiḥ //
ihāpyamutrāpi na tasya saṃkṣayo yatheha pāpasya kṛtasya pāpibhiḥ

dūrasthitairapyadhibuddhibhiryairliṃgaṃ samārādhi mamedamatra //
mayaiva dattaiḥ śubhavastujātairniḥśreyasaḥ śrīrvasaṃ(?)yetsatastān

śṛṇuṣva viṣṇo śṛṇu sṛṣṭikartaḥ śṛṇvaṃtu devarṣigaṇāḥ samastāḥ //
idaṃ hi liṃgaṃ parasiddhidaṃ satāṃ bhedo manāgatra na matsakāśataḥ

asminhi liṃge'khilasiddhisādhane samarpitaṃ yaiḥ sukṛtārjitaṃ vasu //
tebhyotimātrākhilasaukhyasādhanaṃ dadāmi nirvāṇapadaṃ sunirbhayam

utkṣipya bāhuṃ tvasakṛdbravīmi trayīmaye'smiṃstrayameva sāram //
viśveśa liṃgaṃ maṇikarṇikāṃbu kāśīpurī satyamidaṃ trisatyam

utthāya devotha sa śaktirīśastasminhi liṃge kṛtacārupūjaḥ //
yayau layaṃ te ca surā jayeti jayeti coktvā nunuvustamīśam

skaṃda uvāca // //
kṣetrasya maitrāvaruṇe vimuktasya mahāmate //
prabhāvasyaikadeśoyaṃ kathitaḥ kalmaṣāpahaḥ

tavāgre tu yathābuddhi kāśīviśleṣatāpi naḥ //
acireṇaiva kālena kāśīṃ prāpsyasyanuttamām

astācalasya śikharaṃ prāptavāneṣa bhānumān //
tavāpi hi mamāpyeṣa maunasya samayo'bhavat

// vyāsa uvāca // //
śrutveti sa muniḥ sūta saṃdhyopāstyai vinirgataḥ//
praṇamyau meyamasakṛllopāmudrā samanvitaḥ

rahasyaṃ parivijñāya kṣetrasya śaśimaulinaḥ //
agastyo niścitamanāḥ śivadhyānaparobhavat

ānaṃdakānanasyeha mahimānaṃ mahattaram //
kotra varṇayituṃ śaktaḥ sūta varṣaśatairapi

yathā devyai samākhyāyi śivena paramātmanā //
tathā skaṃdena kathitaṃ māhātmyaṃ kuṃbhasaṃbhave

tavāgre ca samākhyātaṃ śukādīnāṃ ca sattama //
idānīṃ praṣṭukāmosi kiṃ tatpṛccha vadāmi te

śrutvādhyāyamimaṃ puṇyaṃ sarvakalmaṣanāśanam //
samastaciṃtitaphalapradaṃ martyo bhavetkṛtī

iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṃḍa uttarārdhe viśveśvaraliṃgamahimākhyo nāma navanavatitamo'dhyāyaḥ