Skanda Purana · Chapter 4.91

// skaṃda uvāca // //
pārvatīśasya mahimā kathitaste mayānagha //
mune niśāmayedānīṃ gaṃgeśvarasamudbhavam

yaṃ śrutvā yatrakutrāpi gaṃgāsnānaphalaṃ labhet //
cakrapuṣkariṇītīrthaṃ yadā gaṃgā samāgatā //

tena dailīpinā sārdhamasminnānaṃdakānane //
kṣetraprabhāvamatulaṃ jñātvā śaṃbhuparigrahāt

smṛtvā liṃgapratiṣṭhāyāḥ kāśyāṃ lokottaraṃ phalam //
gaṃgayā sthāpitaṃ liṃgaṃ viśveśātpūrvataḥ śubham

gaṃgeśvarasya liṃgasya kāśyāṃ dṛṣṭiḥ sudurlabhā //
tithau daśaharāyāṃ ca yo gaṃgeśaṃ samarcayet

tasya janmasahasrasya pāpaṃ saṃkṣīyate kṣaṇāt //
kalau gaṃgeśvaraṃ liṃgaṃ guptaprāyaṃ bhaviṣyati

tasya saṃdarśanaṃ puṃsāṃ jāyate puṇyahetave //
dṛṣṭaṃ gaṃgeśvaraṃ liṃgaṃ yena kāśyāṃ sudurlabham

pratyakṣarūpiṇī gaṃgā tena dṛṣṭā na saṃśayaḥ //
kalau sudurlabhā gaṃgā sarvakalmaṣahāriṇī

bhaviṣyati na saṃdeho mitrāvaruṇanaṃdana//
tatopi tiṣye saṃprāpte kāśyatyaṃtaṃ sudurlabhā

tatopi durlabhaṃ kāśyāṃ liṃgaṃ gaṃgeśvarābhidham //
yasya saṃdarśanaṃ puṃsāṃ bhavetpāpakṣayāya vai

śrutvā gaṃgeśa māhātmyaṃ na naro nirayī bhavet //
labhecca puṇyasaṃbhāraṃ ciṃtitaṃ cādhigacchati

iti śrīskāṃde mahāpurāṇa ekāśīti sāhasryāṃ saṃhitāyāṃ catutheṃ kāśīkhaṃḍa uttarārdhe gaṃgeśvaramahimākhyānaṃ nāmaikanavatitamo'dhyāyaḥ