Skanda Purana · Chapter 4.90

agastya uvāca // //
pārvatīhṛdayānaṃda pārvatīśa samudbhavam //
kathayeha yaduddiṣṭaṃ bhavatā prāgaghāpaham

// skaṃda uvāca //
śṛṇvagaste yadā menā himācalapativratā //
girīṃdrajāṃ sutāmāha putri tesya maheśituḥ

kiṃ sthānaṃ vasatirvā kā ko baṃdhurvetsi kiṃcana //
prāyo gṛhaṃ na jāmāturasya kopi ca kutracit

niśamyeti vaco māturatihrīṇā girīṃdrajā //
āsādyāvasaraṃ śaṃbhuṃ natvā gaurī vyajijñapat

mayā śvaśrūgṛhaṃ kāṃta gamyamadya viniścitam //
nāthātra naiva vastavyaṃ naya māṃ svaṃ niketanam

girīṃdrajāgiraṃ śrutvā girīśa iti tattvavit //
hitvā himagiriṃ prāpto nijamānaṃdakānanam

prāpyānaṃdavanaṃ devī paramānaṃdakāraṇam//
vismṛtya pitṛsaṃvāsaṃ jātā cānaṃdarūpiṇī

atha vijñāpayāṃcakre gaurī giriśamekadā //
acchinnānaṃdasaṃdohaḥ kutaḥ kṣetre'tra tadvada

iti gaurīritaṃ śrutvā pratyuvāca pinākadhṛk //
paṃcakrośaparīmāṇe kṣetresminmuktisadmani

tilāṃtaraṃ na devyasti vinā liṃgaṃ hi kutracit //
ekaikaṃ parito liṃgaṃ krośaṃ krośaṃ ca yāvaniḥ

anyatrāpi hi sā devi bhavedānaṃdakāraṇam //
atrānaṃdavane devi paramānaṃdajanmani

paramānaṃdarūpāṇi saṃti liṃgānyanekaśaḥ //
caturdaśasu lokeṣu kṛtino ye vasaṃti hi

taiḥ svanāmneha liṃgāni kṛtvā''pi kṛtakṛtyatā //
atra yena mahādevi liṃgaṃ saṃsthāpitaṃ mama

vetti tacchreyasaḥ saṃkhyāṃ śeṣopi na viśeṣavit

paricchedavyatītasyānaṃdasya parakāraṇam //
atastvidaṃ paraṃ kṣetraṃ lirgairbhūyobhiradrije

niśamyeti mahādevī punaḥ pādau praṇamya ca //
dehyanujñāṃ mahādeva liṃgasaṃsthāpanāya me

patyurājñāṃ samāsādya yacchecchreyaḥ pativratā //
na tasyāḥ śreyaso hāniḥ saṃvartepi kadācana

iti prasādya deveśamājñāṃ prāpya maheśituḥ //
liṃgaṃ saṃsthāpitaṃ gauryā mahādeva samīpataḥ

talliṃgadarśanātpuṃsāṃ brahmahatyādipātakam //
vilīyeta na saṃdeho dehabaṃdhopi no punaḥ

tatra liṃge varo datto devadevena yaḥ punaḥ //
niśāmaya mune taṃ tu bhaktānāṃ hitakāmyayā

liṃgaṃ yaḥ pārvatīśākhyaṃ kāśyāṃ saṃpūjayiṣyati //
taddehāvasitiṃ prāpya kāśīliṃgaṃ bhaviṣyati

kāśīliṃgatvamāsādya māmevānupravekṣyati //
caitraśuklatṛtīyāyāṃ pārvatīśasamarcanāt

iha saubhāgyamāpnoti paratra ca śubhāṃ gatim //
pārvatīśvaramārādhya yoṣidvā puruṣopi vā

na garbhamāviśedbhūyo bhavetsaubhāgyabhājanam //
pārvatīśasya liṃgasya nāmāpi parigṛhṇataḥ

api janmasahasrasya pāpaṃ kṣayati tatkṣaṇāt //
pārvatīśasya māhātmyaṃ yaḥ śroṣyati narottamaḥ //
aihikāmuṣmikānkāmānsa prāpsyati mahāmatiḥ

//
iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṃḍa uttarārdhe pārvatīśavarṇanaṃ nāma navatitamo'dhyāyaḥ