સ્કંદ પુરાણ · અધ્યાય 4.90

અગસ્ત્ય ઉવાચ ॥ ॥
પાર્વતીહૃદયાનંદ પાર્વતીશ સમુદ્ભવમ્ ॥
કથયેહ યદુદ્દિષ્ટં ભવતા પ્રાગઘાપહમ્

॥ સ્કંદ ઉવાચ ॥
શૃણ્વગસ્તે યદા મેના હિમાચલપતિવ્રતા ॥
ગિરીંદ્રજાં સુતામાહ પુત્રિ તેસ્ય મહેશિતુઃ

કિં સ્થાનં વસતિર્વા કા કો બંધુર્વેત્સિ કિંચન ॥
પ્રાયો ગૃહં ન જામાતુરસ્ય કોપિ ચ કુત્રચિત્

નિશમ્યેતિ વચો માતુરતિહ્રીણા ગિરીંદ્રજા ॥
આસાદ્યાવસરં શંભું નત્વા ગૌરી વ્યજિજ્ઞપત્

મયા શ્વશ્રૂગૃહં કાંત ગમ્યમદ્ય વિનિશ્ચિતમ્ ॥
નાથાત્ર નૈવ વસ્તવ્યં નય માં સ્વં નિકેતનમ્

ગિરીંદ્રજાગિરં શ્રુત્વા ગિરીશ ઇતિ તત્ત્વવિત્ ॥
હિત્વા હિમગિરિં પ્રાપ્તો નિજમાનંદકાનનમ્

પ્રાપ્યાનંદવનં દેવી પરમાનંદકારણમ્॥
વિસ્મૃત્ય પિતૃસંવાસં જાતા ચાનંદરૂપિણી

અથ વિજ્ઞાપયાંચક્રે ગૌરી ગિરિશમેકદા ॥
અચ્છિન્નાનંદસંદોહઃ કુતઃ ક્ષેત્રેઽત્ર તદ્વદ

ઇતિ ગૌરીરિતં શ્રુત્વા પ્રત્યુવાચ પિનાકધૃક્ ॥
પંચક્રોશપરીમાણે ક્ષેત્રેસ્મિન્મુક્તિસદ્મનિ

તિલાંતરં ન દેવ્યસ્તિ વિના લિંગં હિ કુત્રચિત્ ॥
એકૈકં પરિતો લિંગં ક્રોશં ક્રોશં ચ યાવનિઃ

અન્યત્રાપિ હિ સા દેવિ ભવેદાનંદકારણમ્ ॥
અત્રાનંદવને દેવિ પરમાનંદજન્મનિ

પરમાનંદરૂપાણિ સંતિ લિંગાન્યનેકશઃ ॥
ચતુર્દશસુ લોકેષુ કૃતિનો યે વસંતિ હિ

તૈઃ સ્વનામ્નેહ લિંગાનિ કૃત્વાઽઽપિ કૃતકૃત્યતા ॥
અત્ર યેન મહાદેવિ લિંગં સંસ્થાપિતં મમ

વેત્તિ તચ્છ્રેયસઃ સંખ્યાં શેષોપિ ન વિશેષવિત્

પરિચ્છેદવ્યતીતસ્યાનંદસ્ય પરકારણમ્ ॥
અતસ્ત્વિદં પરં ક્ષેત્રં લિર્ગૈર્ભૂયોભિરદ્રિજે

નિશમ્યેતિ મહાદેવી પુનઃ પાદૌ પ્રણમ્ય ચ ॥
દેહ્યનુજ્ઞાં મહાદેવ લિંગસંસ્થાપનાય મે

પત્યુરાજ્ઞાં સમાસાદ્ય યચ્છેચ્છ્રેયઃ પતિવ્રતા ॥
ન તસ્યાઃ શ્રેયસો હાનિઃ સંવર્તેપિ કદાચન

ઇતિ પ્રસાદ્ય દેવેશમાજ્ઞાં પ્રાપ્ય મહેશિતુઃ ॥
લિંગં સંસ્થાપિતં ગૌર્યા મહાદેવ સમીપતઃ

તલ્લિંગદર્શનાત્પુંસાં બ્રહ્મહત્યાદિપાતકમ્ ॥
વિલીયેત ન સંદેહો દેહબંધોપિ નો પુનઃ

તત્ર લિંગે વરો દત્તો દેવદેવેન યઃ પુનઃ ॥
નિશામય મુને તં તુ ભક્તાનાં હિતકામ્યયા

લિંગં યઃ પાર્વતીશાખ્યં કાશ્યાં સંપૂજયિષ્યતિ ॥
તદ્દેહાવસિતિં પ્રાપ્ય કાશીલિંગં ભવિષ્યતિ

કાશીલિંગત્વમાસાદ્ય મામેવાનુપ્રવેક્ષ્યતિ ॥
ચૈત્રશુક્લતૃતીયાયાં પાર્વતીશસમર્ચનાત્

ઇહ સૌભાગ્યમાપ્નોતિ પરત્ર ચ શુભાં ગતિમ્ ॥
પાર્વતીશ્વરમારાધ્ય યોષિદ્વા પુરુષોપિ વા

ન ગર્ભમાવિશેદ્ભૂયો ભવેત્સૌભાગ્યભાજનમ્ ॥
પાર્વતીશસ્ય લિંગસ્ય નામાપિ પરિગૃહ્ણતઃ

અપિ જન્મસહસ્રસ્ય પાપં ક્ષયતિ તત્ક્ષણાત્ ॥
પાર્વતીશસ્ય માહાત્મ્યં યઃ શ્રોષ્યતિ નરોત્તમઃ ॥
ઐહિકામુષ્મિકાન્કામાન્સ પ્રાપ્સ્યતિ મહામતિઃ

॥
ઇતિ શ્રીસ્કાંદે મહાપુરાણ એકાશીતિ સાહસ્ર્યાં સંહિતાયાં ચતુર્થે કાશીખંડ ઉત્તરાર્ધે પાર્વતીશવર્ણનં નામ નવતિતમોઽધ્યાયઃ