Skanda Purana · Chapter 4.88

agastya uvāca // //
śivalokaṃ samāsādya muninā brahmasūnunā //
kiṃ cakre brūhi ṣaḍvaktra kathāṃ kautukaśālinīm

skaṃda uvāca // //
śṛṇu kuṃbhaja vakṣyāmi nāradena mahātmanā //
yatkṛtaṃ tatra gatvāśu kailāsaṃ śaṃkarālayam

munirgaganamārgeṇa prāpya taddhāma śāṃbhavam//
dṛṣṭvā śivau praṇamyātha śivena vihitādaraḥ

taduddiṣṭāsanaṃ bheje paśyaṃstatkrīḍanaṃ param//
krīḍaṃtau tau tu cākṣābhyāṃ yadā na ca virametuḥ

tadautsukyena sa muniḥ preryamāṇa uvāca ha //
// nārada uvāca // //
devadeva tava krīḍākhilaṃ brahmāṃḍagolakam //
māsā dvādaśa ye nātha te sāriphalake gṛhāḥ

kṛṣṇāḥ kṛṣṇetarā yā vai tithayastāśca sārikāḥ //
dvipaṃcadaśamāse yāstvakṣayugmaṃ tathāyane

sṛṣṭipralaya saṃjñau dvau glahau jayaparājayau //
devījaye bhavetsṛṣṭirasṛṣṭirdhūrjaṭerjaye

bhavatoḥ khelasamayo yaḥ sā sthitirudāhṛtā//
itthaṃ krīḍaiva sakalametadbrahmāṃḍamīśayoḥ

na devī jeṣyati patiṃ neśaḥ śaktiṃ vijeṣyati //
kiṃcidvijñaptukāmosmi tanmātaravadhāryatām

devaḥ sarvajñanāthopi na kiṃcidavabudhyati //
mānāpamānayoryasmādasau dūre vyavasthitaḥ

līlātmā guṇavāneṣa vicārādatinirguṇaḥ //
kurvannapi hi karmāṇi bādhyate naiva karmabhiḥ

madhyasthopi hi sarvasya mādhyasthyamavalaṃbatai //
sarvatrāyaṃ maheśāno mitrā'mitrasamānadṛk

tvaṃ śaktirasya devasya sarveṣāṃ mānyabhūḥ parā //
dakṣasyāpi tvayā māno datto patyanimittakaḥ

paraṃ tvaṃ sarvajagatāṃ janayitryekikā dhruvam //
tvatta āvirbhavaṃtyeva dhātṛkeśavavāsavāḥ//

tvamātmānaṃ na jānāsi tryakṣamāyāvimohitā //
ataeva hi me cittaṃ dunotyatitarāṃ sati

anyā api hi yāḥ satyaḥ pātivratyaparāyaṇāḥ //
tā bhartṛcaraṇau hitvā kiṃcidanyanna manvate

athavāstāmiyaṃ vārtā prastutaṃ prabravīmyaham //
adya nīlagirestasmāddharidvārasamīpataḥ

apūrvamiva saṃvīkṣya pariprāptastavāṃtikam //
atyāścaryaviṣādābhyāṃ kicidvaktumihotsukaḥ

āścaryaheturevāyaṃ yatpuṃjātaṃ trayītale //
taddṛṣṭaṃ sakalatraṃ ca dakṣasyādhvaramaṃḍape

sālaṃkāraṃ samānaṃ ca sānaṃdamukhapaṃkajam //
vismṛtākhilakāryaṃ ca dakṣayajñapravartakam

viṣāde kāraṇaṃ caitadyato jātamidaṃ jagat //
yasminpravartate yatra layameṣyati ca dhruvam

tadeva tatra no dṛṣṭaṃ bhavadvaṃdvaṃ bhavāpaham //
prāyo viṣādajanakaṃ bhavatoryadadarśanam

tadeva nābhavattatra samabhūdanyadeva hi //
tacca vaktuṃ na śakyeta tadvaktā dakṣa eva saḥ

tāni vākyāni cākarṇya druhiṇena yayetataḥ //
maharṣiṇā dadhīcena dhikkṛto nitarāṃ hi saḥ

śaptaśca vīkṣamāṇānāṃ devarṣīṇāṃ prajāpatiḥ //
mayā ca karṇau pihitau śrutvā tadgarhaṇā giraḥ

dadhīcinā samaṃ keciddurvāsaḥ pramukhā dvijāḥ //
bhavaniṃdāṃ samākarṇya kiyatopi viniryayuḥ

prāvartata mahāyāgo hṛṣṭapuṣṭamahājanaḥ //
tathā draṣṭuṃ na śaknomi tata āgatavāniha

bhaginyopi ca yā devi tava tatra sabhartṛkāḥ //
tāsāṃ gauravamālokya na kiṃcidvaktumutsahe

iti devī samākarṇya satī dakṣakumārikā //
karādakṣau samutsṛjya dadhyau kiṃcitkṣaṇaṃ hṛdi

uvāca ca bhavatvevaṃ śaraṇaṃ bhava eva me //
saṃpradhāryeti manasi satī dākṣāyaṇī tataḥ

drutameva samuttasthau praṇanāma ca śaṃkaram //
maulāvaṃjalimādhāya devī devaṃ vyajijñapat

// devyuvāca // //
vijayasvāṃdhakadhvaṃsiṃ tryaṃbaka tripurāṃtaka //
caraṇau śaraṇaṃ te me dehyanujñā sadāśiva

mā niṣedhīḥ prārthayāmi yāsyami pituraṃtikam //
uktveti maulimadadhādaṃdhakāri padāṃbuje

athoktā śaṃbhunā devī mṛḍānyuttiṣṭha bhāmini //
kimapūrṇaṃ tavāstyatra vadasau bhāgyasuṃdari

lakṣmyā api ca saubhāgyaṃ brahmāṇyai kāṃtiruttamā //
śacyai nityanavīnatvaṃ bhavatyā dattamīśvari

tvayā ca śaktimānasmi mahadaiśvaryarakṣaṇe //
tvāṃ ca śaktiṃ samāsādya svalīlārūpadhāriṇīm

etatsṛjāmi pāmyadmi tvallīlāpreritoṃgane //
kuto māṃ hātumicchestvaṃ mama vāmārdhadhāriṇi

śivā śivoditaṃ ceti śrutvāpyāha maheśvaram //
jīviteśa vihāya tvāṃ na kvāpi pariyāmyaham

mano me caraṇadvaṃdve tava sthāsyati niścalam //
kratuṃ draṣṭuṃ pituryāmi naikṣi yajño mayā kvacit

śaṃbhuḥ kātyāyanīvākyāmiti śrutvā tadābravīt //
kratustvayā nekṣitaścedāharāmi tataḥ kratum

macchakti dhāriṇī tvaṃ vā sṛjaivānyāṃ kratukriyām //
anyo yajñapumānastu saṃtvanye lokapālakāḥ

anyānāśu vidhehi tvamṛṣīnārtvijyakarmaṇi //
punarjagāda devīti śrutvā śaṃbhorudīritam

pituryajñotsavo nātha draṣṭavyo'tra mayā dhruvam //
dehyanujñāṃ gamiṣyāmi mā me kārṣīrvaconyathā

kaḥ pratīpayituṃ śaktaśceto vā jalameva vā //
nimnāyābhyudyataṃ nātha mādya māṃ pratiṣedhaya

niśamyeti punaḥ prāha sarvajño bhūtanāyakaḥ //
mā yāhi devi māṃ hitvā gatā ca na miliṣyasi

adya prācīṃ yiyāsuṃ tvāṃ vārayetpaṃguvāsaraḥ //
nakṣatraṃ ca tathā jyeṣṭhā tithiśca navamī priye

adya saptadaśo yogo viyogodya tano'śubhaḥ //
dhaniṣṭhārdha samutpanne tava tārādya paṃcamī //

mā gā devi gatādya tvaṃ nahi drakṣyasi māṃ punaḥ //
punardevī babhāṣe sā yadi nāmnāpyahaṃ satī

tadā tanvaṃtareṇāpi kariṣye tava dāsatām //
tato bhavaḥ punaḥ prāha ko vā vārayituṃ prabhuḥ

parikṣubdhamanovṛttiṃ striyaṃ vā puruṣaṃ tu vā //
punarna darśanaṃ devi mayā satyaṃ bravīmyaham

paraṃ na devi gaṃtavyaṃ mahāmānadhanecchubhiḥ //
anāhūta tayā kāṃte mātāpitṛgṛhānapi

yathā siṃdhugatā siṃdhurna punaḥ parivartate //
tathādya gaṃtryā no jātu tavāgamanamiṣyate

// devyuvāca // //
avaśyaṃ yadyahaṃ raktā tava pādābuṃjadvaye //
tathā tvameva me nātho bhaviṣyasi bhavāṃtare

ityuktvā niryayau devī kopāṃdhīkṛtalocanā //
yiyāsubhiśca kāryārthaṃ yatkartavyaṃ na tatkṛtam

na nanāma mahādevaṃ na ca cakre pradakṣiṇam //
ataeva hi sā devī na gatā punarāgatā

apraṇamya maheśānamakṛtvāpi pradakṣiṇam //
adyāpi na nivartaṃte gatāḥ prāgvāsarā iva

tayā caraṇacāriṇyā rājñyā tribhuvaneśituḥ //
api tatpāvanaṃ vartma meneti kaṭhinaṃ bahu

devopi tāṃ satīṃ yāṃtīṃ dṛṣṭvā caraṇacāriṇīm //
atīva vivyathe citte gaṇāṃścātha samāhvayat

gaṇā vimānaṃ nayata manaḥpavanacakriṇam //
paṃcāsyāyutasaṃyuktaṃ ratnasānudhvajocchritam

mahāvātapatākaṃ ca mahābuddhyakṣalakṣitam //
narmadālakanaṃdā ca yatreṣādaṃḍatāṃgate

[http://vedastudy.tripod.com/pur_index25/ratha.htm rathopari ṭippaṇī]
chatrībhūtau ca yatrastaḥ sūryācaṃdramasāvapi //
yasminmakaratuṃḍaṃ ca vārāhīśaktiruttamā

dhūḥ svayaṃ cāpi gāyatrī rajjavastakṣakādayaḥ //
sārathiḥ praṇavo yatra kreṃkāraḥ praṇavadhvaniḥ

aṃgāni rakṣakā yatra varūthaśchaṃdasāṃ gaṇaḥ //
ityājñaptā gaṇāstūrṇaṃ rathaṃ ninyurharājñayā

devyā sanāthaṃ taṃ kṛtvā vimānaṃ pārṣadā divi //
anujagmurmahādevīṃ divyāṃ tejovijṛṃbhiṇīm

sā kṣaṇaṃ tryakṣaramaṇī vīkṣya dakṣasabhāṃgaṇam//
nabhoṃ'gaṇādvimānasthānato vegādavātarat

aviśad yajñavāṭaṃ ca cakitaṃrakṣi vīkṣitā //
kṛtamaṃgalanepathyāṃ prasūṃ dṛṣṭvā kirīṭinīm

sabhartṛkāśca bhaginīrnavālaṃkṛtiśālinīḥ //
sāścaryāśca sagarvāśca sānaṃdāśca sasādhvasāḥ

aciṃtitā tvanāhūtā vimānāddharavallabhā //
kathameṣā pariprāptā kṣaṇamitthaṃ prapaśyatīḥ//

asaṃbhāṣyā pitāḥ sarvā gatā dakṣāṃtikaṃ satī //
pitrā pṛṣṭā tu mātrāpi bhadraṃ jātaṃ tvadāgame

// satyuvāca // //
yadi bhadraṃ janetarme samāgamanato bhavet //
kathaṃ nāhaṃ samāhūtā yathaitā me sahodarāḥ

// dakṣa uvāca // //
ayi kanye mahādhanye hyananye sarvamaṃgale //
ayaṃ te na manāgdoṣo doṣa eṣa mamaiva hi

tādṛgvidhāya yatpatye mayā dattājñabuddhinā //
yadahaṃ taṃ samājñāsyamīśvarosau nirīśvaraḥ

tadā kathamadāsyaṃ tvāṃ tasmai māyāsvarūpiṇaṃ //
ahaṃ śivākhyayā tuṣṭo na jāne śivarūpiṇam

pitāmahena bahudhā varṇitosau mamāgrataḥ //
śaṃkaroyamayaṃ śabhurasau paśupatiḥ śivaḥ

śrīkaṃṭhosau maheśo'sau sarvajñosau vṛṣadhvajaḥ //
asmai kanyāṃ prayaccha tvaṃ mahādevāya dhanvine

vākyācchatadhṛtestasmāttasmai dattā mayānaghe //
na jāne taṃ virūpākṣamukṣagaṃ viṣabhakṣiṇam

pitṛkānanasaṃvāsaṃ śūlinaṃ ca kapālinam //
dvijihvasaṃgasubhagaṃ jalādhāraṃ kapardinam

kalaṃkikṛtamauliṃ ca dhūlidhūsaracarcitam //
kvacitkaupīnavasanaṃ nagnaṃ vātūlavatkvacit

kvacicca carmavasanaṃ kvacidbhikṣāṭanapriyam //
viṭaṃkabhūtānucaraṃ sthāṇumugraṃ tamoguṇam//

rudraṃ raudraparīvāraṃ mahākālavapurdharam //
nṛkaroṭīparikaraṃ jātigotravivarjitam

na samyagvetti taṃ kaścijjānānopi pratāritaḥ //
kiṃ bahūktena tanaye samasta nayaśālini

kva pāṃsulapaṭacchanno mahāśaṃkhavibhūṣaṇaḥ //
prabaddhasarpakeyūraḥ pralaṃbita jaṭāsaṭaḥ

ḍamaḍḍamarukavyagra hastāgraḥ khaṃḍacaṃdrabhṛt //
tāṃḍavāḍaṃbararuciḥ sarvāmaṃgala ceṣṭitaḥ

mṛḍāni saharaḥ kvā'yamadhvaro maṃgalālayaḥ //
ataeva samāhūtā neha tvaṃ sarvamaṃgale

dukūlānyanukūlāni ratnālaṃkṛtayaḥ śubhāḥ //
prāgeva dhāritāstetra paśyāgatya gṛhāṇa ca

iha maṃgalaveśeṣu deveṃdreṣu sa śūladhṛk //
kathamarho bhavecceti maṃgale viṣamekṣaṇaḥ

ityākarṇya satī sādhvī janeturuditaṃ tadā //
atyaṃtadūnahṛdayā vaktuṃ samupacakrame

satyuvāca // //
nākarṇitaṃ mayā kiṃcittvayi prabruvati prabho //
padadvayīṃ samākarṇya tāṃ ca te kathayāmyaham

na samyagvetti taṃ kaścijjānānopi pratāritaḥ //
etatsamyaktvayākhyāyi kastaṃ vetti sadāśivam

tvaṃ tu pratāritaḥ pūrvamadhunāpi pratāritaḥ //
kṛtvā tena ca saṃbaṃdhamasaṃbaddhapralāpabhāk

yādṛśaṃ vakṣitaṃ śaṃbhuṃ tādṛśaṃ yadyamanyathāḥ //
kuto māmadadāstasmai yaṃ ca kaśca na veda na

athavā tena saṃbaṃdhe na heturbhavato matiḥ //
tatra heturabhūttāta mama puṇyaikagauravam//

athoktvaivaṃ bahutaraṃ tvaṃ janetāsya varṣmaṇaḥ //
śrutānena ca dehena patyuḥ parivigarhaṇā

puraścaraṇamevaitadyadasyaiva visarjanam //
suślāghyajanmayā tāvatprāṇitavyaṃ suyoṣitā //
yāvajjīvitanāthasyāśravaṇīyā vigarhaṇā

ityuktvā krodhadīptāgnau mahādevasvarūpiṇi //
juhāva dehasamidhaṃ prāṇarodhavidhānataḥ

tato vivarṇatāṃ prāptāḥ sarve devāḥ savāsavāḥ //
nāgnirjajvāla ca tathā yathājyāhutibhiḥ purā

maṃtrāḥ kuṃṭhitasāmarthyāstatkṣaṇādeva cābhavan //
aho mahāniṣṭataraṃ kimetatsamupasthitam

kecidūcurdvijavarā mithaḥ pariyiyāsavaḥ //
mahājhaṃjhānilaḥ prāptaḥ parvatāṃdolanakṣamaḥ

makhamaṃḍapa bhūstena kṣaṇataḥ sthapuṭīkṛtā //
akāṃḍaṃ taḍidāpāto jātobhūdbhūprakapanaḥ

divaścolkāḥ prapatitāḥ piśācā nṛtyamādadhuḥ //
ātāpigṛdhrairupari gagane maṃḍalāyitam

raveradhastādaśivaṃ śivāstatrāpyarāriṣuḥ //
meghārudhiravipuḍbhistatra vṛṣṭiṃ vyadhuḥ parām

nirghātaniḥsvano bhūmerutthito hṛtprakaṃpanaḥ //
divyāyudhāni ca mitho yudhyaṃti smātibhīṣaṇam

havanīyaṃ mahadravyaṃ dūṣitaṃ kroṣṭubhiḥ śvabhiḥ //
cakorāḥ karaṭāstatra viceruryajñamaṃḍape

śmaśānavāṭavajjāto yajñavāṭaḥ sa vai kṣaṇāta//
yadyatrāvasthitaṃ sarvaṃ tattatraiva pariṣṭhitam

citranyastamivāsīcca vastujātamaśobhi ca //
sthagitā iva saṃvṛttāstatra cakradharādayaḥ

dakṣopi vadanaglānimavāpya saparicchadaḥ //
punaryathākathaṃcicca yajñaṃ prāvartayandvijāḥ

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍa uttarārdhe satīdehavisarjanaṃ nāmāṣṭāśītitamo'dhyāyaḥ