Skanda Purana · Chapter 4.78

// pārvatyuvāca //
ānaṃdakānane śaṃbho yalliṃgaṃ puṇyavardhanam //
yannāmasmaraṇādeva mahāpātakasaṃkṣayaḥ

yatsevyaṃ sādhakairnityaṃ yatra prītiranuttamā //
yatra dattaṃ hutaṃ japtaṃ dhyātaṃ bhavati cākṣayam

yasya saṃsmaraṇādeva yalliṃgasya vilokanāt //
yalliṃgapraṇateścāpi yasya saṃsparśanādapi

paṃcāmṛtādi snapanapūrvādyasyārcanādapi //
talliṃgaṃ kathayeśāna bhavecchreyaḥ paraṃparā

// skaṃda uvāca // //
iti devīsamuditaṃ samākarṇya vaṭodbhava //
sarvajñena yadākhyātaṃ tadākhyāsyāmi te śṛṇu

devadeva uvāca // //
ume bhavatyā yatpṛṣṭaṃ bhavabaṃdhavimokṣakṛt //
tato'haṃ kathayiṣyāmi liṃgaṃ sthiramanā bhava

ānaṃdakānane cātra rahasyaṃ paramaṃ mama //
na mayā kasyacitkhyātaṃ na praṣṭuṃ vetti kaścana

saṃti liṃgānyanekāni mamānaṃdavane priye//
paraṃ tvayā yathā pṛṣṭaṃ yathāvattadbravīmi te

yatra muktisvarūpā tvaṃ svayaṃ tiṣṭhasi viśvage //
yatra te naṃdanaścāsti kṣetraṃ vighnavighātakṛt

mamāpi yena tripuraṃ samare jayakāṃkṣiṇaḥ //
jayāśā pūritā stutyā bahumodakadānataḥ

yatrāsti tīrthamaghahṛtpitṛprītivivardhanam //
yatsnānādvṛtrahā vṛtravadhapāpādvimuktavān

dharmādhikaraṇaṃ yatra dharmarājopyavāptavān //
suduṣkaraṃ tapastaptvā parameṇa samādhinā

pakṣiṇopi hi yatrāpurjñānaṃ saṃsāramocanam //
ramyo hiraṇmayo yatra babhūva bahupāddrumaḥ //

yalliṃgadarśanādeva durdamo nāma pārthivaḥ //
udvejakopi lokānāṃ kṣaṇāddharmamatistvabhūt

tasya liṃgasya māhātmyamāvirbhāvaṃ ca suṃdari //
niśāmayābhidhāsyāmi mahāpātaka nāśanam

dharmapīṭhaṃ taduddiṣṭamatrānaṃdavane mama //
tatpīṭhadarśanādeva naraḥ pāpaiḥ pramucyate

purā vivasvataḥ putro yamaḥ paramasaṃyamī //
tapastatāpa vipulaṃ viśālākṣi tavāgrataḥ

śiśire jalamadhyastho varṣāsvabhrāvakāśakaḥ //
tapartau paṃcavahnisthaḥ kadāciditi taptavān

pādāgrāṃguṣṭhabhūsparśī bahukālaṃ sa tasthivān //
ekapādasthitaḥ sopi kadācidbahvanehasam

samīrābhyavahartāsīdbahudiṣṭaṃ sadiṣṭavān //
papau sa tu pipāsuḥ sankuśāgrajalavipruṣaḥ

divyāṃ caturyugīmitthaṃ sa nināya tapaścaran //
caturguṇaṃ didṛkṣurmāṃ parameṇa samādhinā

tatohaṃ tasya tapasā saṃtuṣṭaḥ sthiracetasaḥ //
yayau tasmai varāndātuṃ śamanāya mahātmane

vaṭaḥ kāṃcanaśākhākhyo yastapastāpasaṃtatim //
dūrīcakāra succhāyo bahudvijasamāśrayaḥ

maṃdamada marullola pallavaiḥ karapallavaiḥ //
yodhvagānadhvasaṃtaptānāhvaye divatāpahṛt

svānurāgaiḥ surabhibhiḥ svādubhiśca pacelimaiḥ //
prīṇayedarthisārthaṃ yo vṛttairnijaphalairalam

tadadhastātparaṃ vīkṣya tamahaṃ tapanāṃgajam //
sthāṇuniścala varṣmāṇaṃ nāsāgranyastalocanam

tapastejobhirudyadbhiḥ paritaḥ paridhīkṛtam //
bhānumaṃtamivākāśe sunīle svena tejasā

svākhyāṃkitaṃ mahāliṃgaṃ pratiṣṭhāpyātibhaktitaḥ //
svaccha sūryopalamayatejaḥ puṃjairivārcitam

sākṣīkṛtyeva talliṃgaṃ tapyamānaṃ mahattapaḥ //
pratyavocaṃ dharmarājaṃ varaṃ brūhīti bhāskare

alaṃ taptvā mahābhāga prasannosmi śubhavrata //
niśamya śamanaśceti dṛṣṭvā māṃ praṇanāma ha

cakāra stavanaṃ cāpi parihṛṣṭeṃdriyeśvaraḥ //
nirvyājaṃ sa samādhiṃ ca visṛjya bradhnanaṃdanaḥ

dharma uvāca // //
namonamaḥ kāraṇakāraṇānāṃ namonamaḥ kāraṇavarjitāya //
namonamaḥ kāryamayāya tubhyaṃ namonamaḥ kāryavibhinnarūpa

arūparūpāya samastarūpiṇe parāṇurūpāya parāparāya //
apārapārāya parābdhipāra pradāya tubhyaṃ śaśimaulaye namaḥ//

anīśvarastvaṃ jagadīśvarastvaṃ guṇātmakastvaṃ guṇavarjitastvam //
kālātparastvaṃ prakṛteḥ parastvaṃ kālāya kālātprakṛte namaste

tvameva nirvāṇapada pradosi tvameva nirvāṇamanaṃtaśakte //
tvamātmarūpaḥ paramātmarūpastvamaṃtarātmāsi carācarasya

tvatto jagattvaṃ jagadevasākṣājjagattvadīyaṃ jagadekabaṃdho //
hartāvitā tvaṃ prathamo vidhātā vidhātṛviṣṇvīśa namo namaste

mṛḍastvameva śrutivartmageṣu tvameva bhīmo'śrutivartmageṣu //
tvaṃ śaṃkaraḥ somasubhaktibhājāmugrosi rudra tvamabhaktibhājām

tvameva śūlī dviṣatāṃ tvameva vinamraceto vacasāṃ śivosi //
śrīkaṃṭha ekaḥ svapadaśritānāṃ durātmanāṃ hālahalograkaṃṭhaḥ

namostu te śaṃkara śāṃtaśaṃbho namostu te caṃdrakalāvataṃsa //
namostu tubhyaṃ phaṇibhūṣaṇāya pinākapāṇeṃ'dhakavairiṇe namaḥ

sa eva dhanyastava bhaktibhāgyastavārcako yaḥ sukṛtī sa eva //
tavastutiṃ yaḥ kurute sadaiva sa stūyate duścyavanādi devaiḥ

kastvāmiha stotumanaṃtaśakte śaknoti mādṛglaghubuddhivaibhavaḥ //
prācāṃ na vācāmihagocaro yaḥ stutistvayīyaṃ natireva yāvat

skaṃda uvāca// //
udīrya sūryasya sutotibhaktyā namaḥ śivāyeti samuccaransaḥ //
ilāmilanmauliratīva hṛṣṭaḥ sahasrakṛtvaḥ praṇanāma śaṃbhum

tataḥ śivastaṃ tapasātikhinnaṃ nivārya tābhyaḥ praṇatibhya īśvaraḥ //
varāndadau saptaturaṃgasūnave tvaṃ dharmarājo bhava nāmatopi

tvameva dharmādhikṛtau samasta śarīriṇāṃ sthāvarajaṃgamānām //
mayā niyuktodya dinādikṛtyaḥ praśādhi sarvānmama śāsanena

tvaṃ dakṣiṇāyāśca diśodhināthastvaṃ karmasākṣī bhava sarvajaṃtoḥ //
tvaddarśitādhvāna ito vrajaṃtu svakarmayogyāṃ gatimuttamādhamāḥ

tvayā yadetanmamabhaktibhājā liṃgaṃ samārādhitamatra dharma //
taddarśanātsparśanato'rcanācca siddhirbhaviṣyatyacireṇa puṃsām

dharmeśvaraṃ yaḥ sakṛdeva martyo vilokayiṣyatyavadātabuddhiḥ //
snātvā puraste'tra ca dharmatīrthe na tasya dūre puruṣārthasiddhiḥ

kṛtvāpyaghānāmiha yaḥ sahasraṃ dharmeśvaraṃ paśyati daivayogāt//
sahetano jātu sa nārakīṃ vyathāṃ kathāṃ tadīyāṃ divikurvatemarāḥ

yo dharmapīṭhaṃ pratilabhya kāśyāṃ svaśreyase no yatate'tra martyaḥ //
kathaṃ sa dharmatvamivātitejāḥ kariṣyati svaṃ kṛtakṛtyameva //
tvayā yathāptā iha dharmarāja manorathāste gurubhistapobhiḥ //
tathaiva dharmeśvarabhaktibhājāṃ kāmāḥ phaliṣyaṃti na saṃśayotra

kṛtvāpyaghānyeva mahāṃtyapīha dharmeśvarārcāṃ sakṛdeva kurvan //
kuto bibheti priyabaṃdhureva tava tvadīyārcita liṃgabhaktaḥ

patreṇa puṣpeṇa jalena dūrvayā yo dharmadharmeśvaramarcayiṣyati //
samarcayiṣyaṃtyamṛtāṃdhasastaṃ maṃdāramālābhiratiprahṛṣṭāḥ

tvatto vibheṣyaṃti kṛtainaso ye bhayaṃ na teṣāṃ bhavitā kadācit //
dharmeśvarārcā racanāṃ kariṣyatāṃ hariṣyatāṃ baṃdhutayāmanaste

yadatra dāsyaṃti hi dharmapīṭhe narā dyunadyāṃ kṛtamajjanāśca //
tadakṣayaṃ bhāvi yugāṃtarepi kṛtapraṇāmāstava dharmaliṃge

ye kārtike māsi sitāṣṭamī tithau yātrāṃ kariṣyaṃti narā upoṣitāḥ //
rātrau ca vai jāgaraṇaṃ mahotsavairdharmeśvare tena punarbhavā bhuvi

stutiṃ ca ye vai tvadudīritāmimāṃ narāḥ paṭhiṣyaṃti tavāgrataḥ kvacit //
nirenasaste mama lokagāminaḥ prāpsyaṃti te vaibhavataḥ sakhitvam

punarvaraṃ brūhi yathepsitaṃ dade tejonidhernaṃdana dharmarāja //
adeyamatrāsti na kiṃcideva te vidhehi vāgudyamamātrameva

prasannamūrtiṃ sa vilokya śaṃkaraṃ kāruṇyapūrṇaṃ svamanorathābhidam //
ānaṃdasaṃdohasaronimagno vaktuṃ kṣaṇaṃ naiva śaśāka kiṃcit

//
iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍa uttarārdhe dharmeśamahimākhyānaṃ nāmāṣṭasaptatitamo'dhyāyaḥ