Skanda Purana · Chapter 4.77

// pārvatyuvāca // //
namaste devadeveśa praṇamatkaruṇānidhe //
vada kedāramāhātmyaṃ bhaktānāmanukaṃpayā

tasmim̐lliṃge mahāprītistava kāśyāmanuttamā //
tadbhaktāśca janā nityaṃ devadevamahādhiyaḥ

// devadeva uvāca // //
śṛṇvaparṇebhidhāsyāmi kedāreśvara saṃkathām //
samākarṇyāpi yāṃ pāpopyapāpo jāyate kṣaṇāt

kedāraṃ yātukāmasya puṃso niścitacetasaḥ //
ājanmasaṃcitaṃ pāpaṃ tatkṣaṇādeva naśyati

gṛhādvinirgate puṃsi kedāramabhiniścitam // janmadvayārjitaṃ pāpaṃ śarīrādapi nirvrajet

madhye mārgaṃ prapannasya trijanmajanitaṃ tvagham //
dehagehādviniḥsṛtya nirāśaṃ yāti niḥśvasat

sāyaṃkedārakedārakedāreti triruccaran//
gṛhepi nivasannūnaṃ yātrāphalamavāpnuyāt

dṛṣṭvā kedāraśikharaṃ pītvā tatratyamaṃbu ca //
saptajanmakṛtātpāpānmucyate nātra saṃśayaḥ

harapāpahrade snātvā kedāreśaṃ prapūjya ca //
koṭijanmārjitainobhirmucyate nātra saṃśayaḥ

sakṛtpraṇamya kedāraṃ harapāpakṛtodakaḥ //
sthāpya liṃgaṃ hṛdaṃbhoje prāṃte mokṣaṃ gamiṣyati

harapāpahrade śrāddhaṃ śraddhayā yaḥ kariṣyati //
uddhṛtya saptapuruṣānsa me lokaṃ gamiṣyati

purā rāthaṃtare kalpe yadabhūdatra tacchṛṇu //
aparṇe dattakarṇā tvaṃ varṇayāmi tavāgrataḥ

eko brāhmaṇadāyāda ujjayinyā ihāgataḥ //
kṛtopanayanaḥ pitrā brahmacaryavratesthitaḥ

sthalīṃ pāśupatīṃ kāśīṃ sa vilokya samaṃtataḥ//
dvijaiḥ pāśupataiḥ kīrṇāṃ jaṭāmukuṭabhūṣitaiḥ

kṛtaliṃgasamarcaiśca bhūtibhūṣitavarṣmabhiḥ //
bhikṣāhṛtānnasaṃtuṣṭaiḥ puṣṭairgaṃgāmṛtodakaiḥ

babhūvānaṃditamanā vrataṃ jagrāha cottamam//
hiraṇyagarbhādācāryānmahatpāśupatābhidham

sa ca śiṣyo vaśiṣṭhobhūtsarvapāśupatottamaḥ //
snātvā hrade harapāpe nityaprātaḥ samutthitaḥ

vibhūtyāharahaḥ snāti trikālaṃ liṃgamarcayan //
nāṃtaraṃ sa vijānāti śivaliṃge gurau tathā

sa dvādaśābdadeśīyo vaśiṣṭho guruṇā saha //
yayau kedārayātrārthaṃ giriṃ gaurīgurorgurum

yatra gatvā na śocaṃti kiṃcitsaṃsāriṇaḥ kvacita //
prāśyodakaṃ liṃgarūpaṃ liṃgarūpatvamāgatāḥ

asidhāraṃ giriṃ prāpya vaśiṣṭhasya tapasvinaḥ //
gururhiraṇyagarbhākhyaḥ paṃcatvamagamattadā

paśyatāṃ tāpasānāṃ ca vimāne sārvakāmike //
āropya taṃ pāriṣadāḥ kailāsamanayanmudā

yastu kedāramuddiśya gehādardhapathepyaho //
akātarastyajetprāṇānkailāse sa ciraṃ vaset

tadāścaryaṃ samālokya sa vaśiṣṭhastapodhanaḥ //
kedārameva liṃgeṣu bahvamaṃsta suniścitam

atha kṛtvā sa kaidārīṃ yātrāṃ vārāṇasīmagāt //
agrahīnniyamaṃ cāpi yathārthaṃ cākarotpunaḥ //

prati caitraṃ sadā caitryāṃ yāvajjīvamahaṃ dhruvam //
vilokayiṣye kedāraṃ vasanvārāṇasīṃ purīm

tena yātrāḥ kṛtāḥ samyak ṣaṣṭirekādhikā mudā //
ānaṃdakānane nityaṃ vasatā brahmacāriṇā

punaryātrāṃ sa vai cakre madhau nikaṭavartini //
paramotsāhasaṃtuṣṭaḥ palitā kalitopyalam

tapodhanaistannidhanaṃ śaṃkamānairnivāritaḥ //
kāruṇyapūrṇahṛdayairanyairapi ca saṃgibhiḥ

tatopi na tadutsāhabhaṃgobhūddṛḍhacetasaḥ //
madhye mārgaṃ mṛtasyāpi guroriva gatirmama

iti niścitacetaske vaśiṣṭhe tāpase śucau //
aśūdrānna parīpuṣṭe tuṣṭohaṃ caṃḍike'bhavam

svapremayā sa saṃprokto vaśiṣṭhastāpasottamaḥ //
dṛḍhavrata prasannosmi kedāraṃ viddhi māmiha

abhīṣṭaṃ ca varaṃ mattaḥ prārthayasvāvicāritam //
ityuktavatyapi mayi svapno mithyeti sobravīt

tatopi sa mayā proktaḥ svapno mithyā'śuciṣmatām //
bhavādṛśāmamithyaiva svākhyā sadṛśavartinām

varaṃ brūhi prasannosmi svapnaśaṃkāṃ tyaja dvija //
tava sattvavataḥ kiṃcinmayādeyaṃ na kiṃcana

ityuktaṃ me samākarṇya varayāmāsa māmiti //
śiṣyo hiraṇyagarbhasya tapasvijanasattamaḥ

yadi prasanno deveśa tadā me sānugā ime //
sarve śūlinnugrāhyā eṣa eva varo mama

devi tasyedamākarṇya paropakṛtiśālinaḥ //
vacanaṃ nitarāṃ prītastatheti tamuvāca ha

punaḥ paropakaraṇāttattapo dviguṇīkṛtam //
tena puṇyena sa mayā punaḥ prokto varaṃ vṛṇu

sa vaśiṣṭho mahāprājño dṛḍha pāśupatavrataḥ //
devi me prārthayāmāsa himaśailādiha sthitim

tatastattapasākṛṣṭaḥ kalāmātreṇa tatra hi //
himaśaile tataścātra sarvabhāvena saṃsthitaḥ

tataḥ prabhāte saṃjāte sarveṣāṃ paśyatāmaham //
himādre prasthitaḥ prāptastūyamānaḥ surarṣibhiḥ

vaśiṣṭhaṃ purataḥ kṛtvā sarvasārthasamāyutam //
harapāpahrade tīrthe sthitohaṃ tadnugrahāt

matparigrahataḥ sarve harapāpe kṛtodakāḥ //
ārādhya māmanenaiva vapuṣā siddhimāgatāḥ

tadā prabhṛti liṃgesminsthitaḥ sādhakasiddhaye //
avimukte pare kṣetre kalikāle viśeṣataḥ

tuṣārādriṃ samāruhya kedāraṃ vīkṣya yatphalam //
tatphalaṃ saptaguṇitaṃ kāśyāṃ kedāradarśane

gaurīkuṃḍaṃ yathā tatra haṃsatīrthaṃ ca nirmalam //
yathā madhusravā gaṃgā kāśyāṃ tadakhilaṃ tathā

idaṃ tīrthaṃ harapāpaṃ saptajanmāghanāśanam //
gaṃgāyāṃ militaṃ paścājjanmakoṭikṛtāghaham

atra pūrvaṃ tu kākolau yudhyatau khānnipetatuḥ //
paśyatāṃ tatra saṃsthānāṃ haṃsau bhūtvā vinirgatau

gauri tvayā kṛtaṃ pūrvaṃ snānamatra mahāhrade //
gaurītīrthaṃ tataḥ khyātaṃ sarvatīrthottamottamam

atrāmṛtasravā gaṃgā mahāmohāṃdhakārahṛt //
anekajanmajanita jāḍyadhvaṃsavidhāyinī

sarasā mānasenātra pūrvaṃ taptaṃ mahātapaḥ //
atastu mānasaṃ tīrthaṃ jane khyātimidaṃ gatam

atra pūrvaṃ janaḥ snānamātreṇaiva pramucyate //
paścātprasāditaścāhaṃ tridaśairmuktidurdṛśaiḥ

sarve muktiṃ gamiṣyaṃti yadi deveha mānavāḥ //
kedārakuṃḍe susnātāstadocchittirbhaviṣyati

sarveṣāmeva varṇānāmāśramāṇāṃ ca dharmiṇām//
tasmāttanuvisargetra mokṣaṃ dāsyati nānyathā

tatastaduparodhena tatheti ca mayoditam //
tadārabhya mahādevi snānātkedārakuṃḍataḥ//

samarcanācca bhaktyā vai mama nāma japādapi //
naiḥśreyasīṃ śriyaṃ dadyāmanyatrāpi tanutyajāma

kedāratīrthe yaḥ snātvā piṃḍāndāsyati cātvaraḥ //
ekottaraśataṃ vaṃśyāstasya tīrṇā bhavāṃbudhim

bhaumavāre yadā darśastadā yaḥ śrāddhado naraḥ //
kedārakuṃḍamāsādya gayāśrāddhena kiṃ tataḥ

kedāraṃ gaṃtukāmasya buddhirdeyā narairiyam //
kāśyāṃ spṛśaṃstvaṃ kedāraṃ kṛtakṛtyo bhaviṣyasi

caitrakṛṣṇacaturdaśyāmupavāsaṃ vidhāya ca //
trigaṃḍūṣānpibanprātarhṛlliṃgamadhitiṣṭhati

kedārodakapānena yathā tatra phalaṃ bhavet //
tathātra jāyate puṃsāṃ strīṇāṃ cāpi na saṃśayaḥ

kedārabhaktaṃ saṃpūjya vāsonnadraviṇādibhiḥ //
ājanmajanitaṃ pāpaṃ tyaktvā yāti mamālayam //

āṣaṇmāsaṃ trikālaṃ yaḥ kedāreśaṃ namasyati //
taṃ namasyaṃti satataṃ lokapālā yamādayaḥ

kalau kedāramāhātmyaṃ yopi kopi na vetsyati //
yo vetsyati supuṇyātmā sarvaṃ vetsyati sa dhruvam

kedāreśaṃ sakṛddṛṣṭvā devi me'nucaro bhavet //
tasmātkāśyāṃ prayatnena kedāreśaṃ vilokayet

citrāṃgadeśvaraṃ liṃgaṃ kedārāduttare śubham //
tasyārcanānnaro nityaṃ svargabhogānupāśnute

kedārāddakṣiṇe bhāge nīlakaṃṭha vilokanāt //
saṃsāroragadaṣṭasya tasya nāsti viṣādbhayam

tadvāyavyaṃbarīṣeśo narastadavalokanāt //
garbhavāsaṃ na cāpnoti saṃsāre duḥkhasaṃkule

iṃdradyumneśvaraṃ liṃgaṃ tatsamīpe samarcya ca //
tejomayena yānena sa svarga bhuvi modate

taddakṣiṇe naro dṛṣṭvā liṃgaṃ kālaṃjareśvaram //
jarāṃ kālaṃ vinirjitya mama loke vasecciram

dṛṣṭvā kṣemeśvaraṃ liṃgamudkcitrāṃgadeśvarāt //
sarvatra kṣemamāpnoti loke'tra ca paratra ca

// skaṃda uvāca // //
devadevena viṃdhyāre kedāra mahimā mahān //
ityākhyāyi purāṃbāyai mayā tepi nirūpitaḥ

kedāreśvaraliṃgasya śrutvotpattiṃ kṛtī naraḥ //
śivalokamavāpnoti niṣpāpo jāyate kṣaṇāt

//
iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṃḍa uttarārdhe kedāramahimākhyānaṃ nāma saptasaptatitamo'dhyāyaḥ