Skanda Purana · Chapter 4.66

// skanda uvāca // //
jyeṣṭheśvarasya parito liṃgānyanyāni yāni tu //
tāni te kathayiṣyāmi śṛṇu vātāpitāpana

jyeṣṭheśāddakṣiṇe bhāge liṃgamapsarasāṃ śubham //
tatraivāpsarasaḥ kūpaḥ saubhāgyodakasaṃjñakaḥ

tatkūpajalasusnāto vilokyāpsaraseśvaram //
na daurbhāgyamavāpnoti nārī vā puruṣothavā

tatraiva kukkuṭeśākhyaṃ liṃgaṃ vāpīsamīpagam//
tasya pūjanataḥ puṃsāṃ kuṭuṃbaṃ parivardhate

pitāmaheśvaraṃ liṃgaṃ jyeṣṭhavāpītaṭe śubham //
tatra śrāddhaṃ naraḥ kṛtvā pitṝṇāṃ mudamarpayet

pitāmaheśānnairṛtyāṃ pūjanīyaṃ prayatnataḥ //
gadādhareśvaraṃ liṃgaṃ pitṝṇāṃ paritṛptidam

diśi puṇyajanākhyāyāṃ liṃgājjyeṣṭheśvarānmune//
vāsukīśvarasaṃjñaṃ ca liṃgamarcyaṃ samaṃtataḥ

tatra vāsukikuṃḍe ca snānadānādikāḥ kriyāḥ //
sarpabhītiharāḥ puṃsāṃ vāsukīśaprabhāvataḥ

yaḥ snāto nāgapaṃcamyāṃ kuṃḍe vāsukisaṃjñite //
na tasya viṣasaṃsargo bhavetsarpasamudbhavaḥ

kartavyā nāgapañcamyāṃ yātrā varṣāsu tatra vai//
nāgāḥ prasannā jāyaṃte kule tasyāpi sarvadā

tatkuṇḍātpaścime bhāge liṃgaṃ vai takṣakeśvaram//
pūjanīyaṃ prayatnena bhaktānāṃ sarvasiddhidam

munestasyottare bhāge kuṇḍaṃ takṣakasaṃjñitam //
kṛtodakakriyastatra na sarpairabhibhūyate

tatkuṇḍāduttare bhāge kṣetraṃ kṣemakaraḥ sadā//
bhaktānāṃ sādhvasadhvaṃsī kapālī nāma bhairavaḥ

bhairavasya mahākṣetraṃ tadvai sādhakasiddhidam//
tatra saṃsādhitā vidyāḥ ṣaṇmāsātatsiddhimāpnuyuḥ

tatra caṇḍī mahāmuṇḍā bhaktavighnopaśāṃtidā/
balipūjopahārādyaiḥ pūjyā svābhīṣṭasiddhaye

tasyā yātrāṃ tu yaḥ kuryānmahāṣṭamyāṃ narottamaḥ //
yaśasvī putrapautrāḍhyo lakṣmīvām̐ścāpi jāyate

mahāmuṇḍā pratīcyāṃ tu catuḥsāgaravāpikā //
tasyāṃ snāto bhavetsnātaḥ sāgareṣu caturṣvapi

mahāprasiddhaṃ tatsthānaṃ catuḥsāgarasaṃjñitam//
catvāri tatra liṃgāni sāgaraiḥ sthāpitāni ca

tasyā vāpyāścaturdikṣu pūjitāni dahaṃtyagham //
taduttare mahāliṃgaṃ vṛṣabheśvarasaṃjñitam

harasya vṛṣabheṇaiva sthāpitaṃ tatsvabhaktitaḥ //
tasya darśanataḥ puṃsāṃ ṣaṇmāsānmuktirudbhavet

vṛṣeśvarādudīcyāṃ tu gaṃdharveśvarasaṃjñitam //
gaṃdharvakuṇḍaṃ tatprācyāṃ tatra snātvā narottamaḥ

gaṃdharveśvaramabhyarcya dattvā dānāni śaktitaḥ //
santarpya pitṝdevāṃśca gaṃdharvaiḥ saha modate

karkoṭanāmā nāgosti gandharveśvarapūrvataḥ //
tatra karkoṭavāpī ca liṃgaṃ karkoṭakeśvaram

tasyāṃ vāpyāṃ naraḥ snātvā karkoṭeśaṃ samarcya ca //
karkoṭanāgamārādhya nāgaloke mahīyate

karkoṭa nāgo yairdṛṣṭastadvāpyāṃ vihitodakaiḥ //
kramate na viṣaṃ teṣāṃ dehe sthāvarajaṃgamam

karkoṭeśātpratīcyāṃ tu dhuṃdhumārīśvarābhidham //
talliṃgābhyarcanātpuṃsāṃ na bhavedvairijaṃ bhayam

purūraveśvaraṃ liṃgaṃ tadudīcyāṃ vyavasthitam //
draṣṭavyaṃ tatprayatnena caturvargaphalapradam

diggajenārcitaṃ liṃgaṃ supratīkena tatpuraḥ //
supratīkeśvaraṃ nāmnā yaśobalavivardhanam

saraśca supratīkākhyaṃ tatpuro bhāsate mahat //
tatra snātvā ca talliṃgaṃ dṛṣṭvā dikpatitāṃ labhet

tatrāstyekā mahāgaurī nāmnā vijayabhairavī //
rakṣārthamuttarādvāri sthitā pūjyeṣṭasiddhaye

varaṇāyāstaṭe ramye gaṇau huṃḍanamuṃḍanau //
kṣetrarakṣāṃ vidhattastau vighnastaṃbhana kārakau

tau draṣṭavyau prayatnena kṣetranirvighna hetave //
huṃḍaneśaṃ muṃḍaneśaṃ tatra dṛṣṭvā sukhī bhavet

skaṃda uvāca // //
ilvalāre kathāmekāṃ śṛṇuṣvāvahito bhava //
varaṇāyāstaṭe ramye yadvṛtta pūrvamuttamam

ekadādrīṃdramālokya menā saṃhṛṣṭamānasam //
umāṃ saṃsmṛtya niḥśvasya provāceti pativratā

// menovāca // //
āryaputra na jānāmi pravṛttimapi kāṃcana //
vivāhasamayādūrdhvaṃ tasyā gauryā girīśvara

sa vṛṣeṃdragatirdevo bhasmoraga vibhūṣaṇaḥ //
mahāpitṛvanāvāso digvāsāḥ kvāsti saṃprati

aṣṭau yā mātaro dṛṣṭā brāhmī prabhṛtayaḥ priya //
svasvarūpāstā manye'haṃ bālikāḥ kaṣṭahetavaḥ

tasyaikasya na kopyanyostyadvitīyasya śūlinaḥ //
tadudaṃtapravṛttyai ca kriyatāmudyamo vibho

tasyāḥ priyāyā vākyena tadapatyapriyo giriḥ //
uvāca vacanaṃ sāsramumā vātsalyasannagīḥ

// girirāja uvāca // //
ahameva gamiṣyāmi tasyā mene gaveṣaṇe //
nitarāṃ bādhate prema tadadṛṣṭyagnidūṣitam

yadā prabhṛti sā gaurī nirgatā mama sadmataḥ //
manye mene tadārabhya padmasadmā viniryayau

tadālāpāmṛtadhayau na me śabdagrahau priye //
prāṇeśvari tadārabhya syātāṃ śabdāṃtaragrahau

jaivātṛkī yatohnaḥ syāddūrībhūtā dṛśormama //
aho jaivātṛkī jyotsnā tatohnoti dunoti mām

ityuktvādāya ratnāni vāsāṃsi vividhāni ca //
dharādhareṃdro niryātaḥ śubhalagnabalodaye

agastya uvāca // //
kāni kāni ca ratnāni kiyaṃtyapi ca ṣaṇmukha //
yānyādāya pratasthe sa tāni me brūhi pṛcchataḥ

// skaṃda uvāca //
tulā muktāphalānāṃ tu koṭidvaya parīmitāḥ //
tathā vāritarāṇāṃ ca hīrakāṇāṃ tulā śatam

navalakṣādhikaṃ vipra ṣaḍasrāṇāṃ sutejasām //
lakṣadvayaṃ vidūrāṇāṃ tulāvimalavarcasāma

koṭayaḥ padmarāgāṇāṃ paṃcāvaihi tulā mune //
puṣparāga tulālakṣaṃ guṇitaṃ navasaṃkhyayā

tathā gomeda ratnānāṃ tulālakṣamitā munai //
iṃdranīlamaṇīnāṃ ca tulāḥ koṭyardha saṃmitāḥ

garuḍodgāraratnānāṃ tulāḥ prayutasaṃmitāḥ //
śuddhavidrumaratnānāṃ tulāśca navakoṭayaḥ

aṣṭāṃgābharaṇānāṃ ca saṃkhyā kartuṃ na śakyate //
vāsasāṃ ca vicitrāṇāṃ komalānāṃ tathā mune

cāmarāṇi ca bhūyāṃsi dravyāṇyāmodavaṃti ca //
suvarṇadāsadāsyādīnyasaṃkhyātāni vai mune

sarvāṇyapi samādāya pratasthe bhūdhareśvaraḥ //
āgatya varaṇātīraṃ dūrātkāśīmalokayat

anekaratnanicayaiḥ khacitā'khilabhūmikām //
nānāprāsādamāṇikyajyotistatatatāṃbarām

saudhāgravividhasvarṇakalaśojvaladiṅmukhām //
jayaṃtīvaijayaṃtīnāṃ nikaraistridivasthalīm

mahāsiddhyaṣṭakasyāpi krīḍābhavanamadbhutam //
jitakalpadumavanāṃ vanaiḥ sarvaphalāvanaiḥ

iti kāśīsamṛddhiṃ sa vilokyābhūdvilajjitaḥ //
uvāca ca manasyeva bhūdhareṃdra idaṃ vacaḥ

prāsādeṣu pratolīṣu prākāreṣu gṛheṣu ca //
gopureṣu vicitreṣu kapāṭeṣu taṭeṣvapi

maṇimāṇikyaratnānāmucchalaccārurociṣām //
jyotirjālairjaṭilitaṃ yayedamavalokyate

dyāvābhūmyoraṃtarālaṃ tatheti samavaimyaham //
īdṛksaṃpattisaṃbhāraḥ kuverasyāpi no gṛhe

api vaikuṃṭhabhuvane netarasyeha kā kathā //
iti yāvadgirīṃdrosau saṃbhāvayati cetasi

tāvatkārpaṭikaḥ kaścittallocanapathaṃ gataḥ //
āhūya bahumānaṃ tamapṛcchaccācaleśvaraḥ

// himavānuvāca // //
haṃho kārpaṭika śreṣṭha adhyāsvaitadihāsanam //
svapurodaṃtamākhyāhi kimapūrvamihādhvaga

kotra saṃpratyadhiṣṭhātā kimadhiṣṭhātṛ ceṣṭitam //
yadi jānāsi tatsarvamihācakṣva mamāgrataḥ

sopi kārpaṭikastasya girirājasya bhāṣitam //
samākarṇya samācaṣṭuṃ mune samupacakrame

// kārpaṭika uvāca // //
ācakṣe śṛṇu rājeṃdra yatpṛṣṭosmi tvayākhilam //
ahāni paṃcaṣāṇyeva vyatikrāṃtāni mānada

samāyāte jagannāthe parvateṃdra sutāpatau //
suṃdarānmaṃdarādadrerdivodāse gate divi

yo vai jagadadhiṣṭhātā sodhiṣṭhātātra sarvagaḥ //
sarvadṛksarvadaḥ śarvaḥ kathaṃ na jñāyate vibho

manye dṛṣatsvarūposi dṛṣadopi kaṭhoradhīḥ //
yato viśveśvaraṃ kāśyāṃ na vetsi girijāpatim

svabhāvakaṭhinātmāpi sa varaṃ himavāngiriḥ //
prāṇādhika sutā dānādyo dhinodviśvanāyakam

bibhratsahaja kāṭhinyaṃ jāto gaurīgururguruḥ //
śaṃbhuṃ prapūjya sutayā srajā viśvagurorapi

ceṣṭitaṃ tasya ko veda vedavedyasya ceśituḥ //
manāgiti ca jānehaṃ tacceṣṭitamidaṃ jagat

adhiṣṭhātā mayā khyātastathādhiṣṭhātṛ ceṣṭitam //
apūrvaṃ yattvayāpṛṣṭaṃ tadākhyāmi ca tacchṛṇu

śubhe jyeṣṭheśvarasthāne sāṃprataṃ sa umāpatiḥ //
kāśīṃ prāpya mudā tiṣṭhedgirirājāṃgajā sakhaḥ

// skaṃda uvāca // //
yadā yadā sa girijā mṛdunāmākṣarāmṛtam //
āviṣkaroti pathiko'drīṃdro hṛṣyettadātadā

umānāmāmṛtaṃ pītaṃ yeneha jagatītale //
na jātu jananīstanyaṃ sa pibetkuṃbhasaṃbhava

umetidvyakṣaraṃ maṃtraṃ yo'harniśamanusmaret //
na smareccitraguptastaṃ kṛtapāpamapi dvija

punaḥ śuśrāva himavānhṛṣṭaḥ kārpaṭikoditam //
// kārpaṭika uvāca // //
rājanviśveśvarārtheyaḥ prāsādo viśvakarmaṇā

nirmīyate sunirmāṇo janmi nirvāṇadāyinaḥ //
tadapūrvaṃ na karṇābhyāmapyākarṇitavānaham

yatrātimitratejobhiḥ śalākābhiḥ samaṃtataḥ //
maṇimāṇikyaratnānāṃ prāsādebhittayaḥ kṛtāḥ

yatra saṃti śataṃ staṃbhā bhāsvaṃto dvādaśottarāḥ //
ekaikaṃ bhuvanaṃ dhartumaṣṭāṣṭāviti kalpitāḥ

caturdaśasu yā śobhā viṣṭapeṣu samaṃtataḥ //
tasminvimāne sāstīha śatakoṭiguṇottarā

caṃdrakāṃtamaṇīnāṃ ca staṃbhādhāra śilāśca yāḥ //
citraratnamayaistaṃbhaiḥ staṃbhitāstatprabhābharāḥ

padmarāgeṃdranīlānāṃ śālīnāḥ śālabhaṃjikāḥ //
nīrājayaṃtyahorātraṃ yatra rajapradīpakaiḥ

sphuratsphaṭikanirmāṇa ślakṣṇa padmaśilātale //
anekaratnarūpāṇi vicitrāṇi samaṃtataḥ

āraktapītamaṃjiṣṭha nīlakirmīravarṇakaiḥ //
vinyastānīva bhāsaṃte citre citrakṛtāyataḥ

dṛkpicchilā vilokyaṃte māṇikyastaṃbharājayaḥ //
yato'vimukte svakṣetre mokṣalakṣmyaṃkurā iva

ratnākarebhyaḥ sarvebhyo gaṇā ratnoccayānbahūn //
rāśīṃścakruḥ samānīya yatrādriśikharopamān

yatra pātālatalato nāgānāṃ kośaveśmataḥ//
gaṇairmaṇigaṇāḥ sarve samāhṛtya girīkṛtāḥ

śivabhaktaḥ svayaṃ yatra paulastyaḥ svadrikūṭataḥ //
koṭihāṭakakūṭāni ānayāmāsa rākṣasaiḥ

prāsādanirmitiṃ śrutvā bhaktā dvīpāṃtarasthitāḥ //
māṇikyāni samājahruryathāsaṃkhyānyaho nṛpa

ciṃtāmaṇiḥ svayaṃ yatra kamarṇe viśvakarmaṇe //
viśrāṇayedahorātraṃ vicitrāṃściṃ titānmaṇīn

nānāvarṇapatākāśca yatra kalpamahīruhaḥ //
analpāḥ kalpayaṃtyeva nityabhaktisamanvitāḥ

abdhayo yatra satataṃ dadhikṣīrekṣusarpiṣām //
paṃcāmṛtānāṃ kalaśaiḥ snapayaṃti dinedine

yatra kāmadughā nityaṃ snapayenmadhudhārayā //
svadugdhayā svayaṃ bhaktyā viśveśaṃ liṃgarūpiṇam

gaṃdhasārarasairyaṃ ca sevate malayācalaḥ //
karpūraraṃbhā karpūrapūrairbhaktyā niṣevate

ityādya pūrvaṃ yatrāsti pratyahaṃ śaṃkarālaye //
kathaṃ taṃ tvamumākātaṃ na vetsi kaṭhināśaya

iti tasya samṛddhiṃ tāṃ dṛṣṭvā jāmāturadrirāṭa //
trapayā paribhūtobhūnnitarāṃ kuṃbhasaṃbhava

tasmai kārpaṭikāyātha sa dattvā pāritoṣikam //
punaściṃtāparojāto'drirāṭkārpaṭike gate

uvāceti manasyeva vismayotphullalocanaḥ //
aho bhadramidaṃ jātaṃ yattvayā śrāvi śarmabhāk

yāvatsaṃpattisaṃbhāraḥ śrūyate dṛśyatetra vai //
jāmāturatra sadane līlā trijagatīpateḥ

tataḥ prābhṛtakastuccho nitarāṃ pratibhāti me //
kanyārthaṃ yo mayā nīto jāmātuḥ paritoṣakṛt

ahaṃ manye tathaivāsau yathādarśi mayā purā //
vṛddhokṣamātrasaṃpattiḥ sarvakarmaparāṅmukhaḥ

nainaṃ kopi vijānīyānnānvayosya kadā'cana //
nāmāpi yasya naikaṃ ca kiṃdeśīyaśca nohyate

kiṃvṛttaśca kimācāro nāmamātreṇa ceśvaraḥ //
aiśvaryasūcakaṃ vastu yasya kiṃcinna lakṣyate

sosau nirvāṇasaṃpattiṃ raṃkāyāpi dadātyaho //
sumukhaḥ sarvakarmāṇi phalavaṃti karoti saḥ

vedavedyo hi sarvajño yatsaṃtāno'khilaṃ jagat //
yaṃ na kopi hi vedādau vedavedyaḥ sa eṣa vai

yonabhijñaḥ sadājñātaḥ sa sarvajñoyameva hi //
yasyaikamapi no nāma puṃsā jñeyaṃ na kenacit

sarveṣāṃ sarvanāmāni yasya nāmāni niścitam //
sosau hi sarvadeśīyaḥ sarvebhyaḥ sarvasiddhidaḥ

yasya deśo na vidito yastu vṛttiparāṅmukhaḥ//
ācārahīnamiva yaṃ purā'paśyaṃ kaṭhoradhīḥ

śrutismṛtī yataḥ sarvamācāraṃ vitta eva hi //
nāmamātreṇa niyataṃ yamajñāsiṣamīśvaram

sākṣādīśvara evaiṣa sonyeṣvaiśvaryasūcakaḥ //
api sarvaguṇādhāro guṇātītaḥ parāparaḥ

arvācīna ihāpyeṣa parācīnaḥ parātparaḥ //
bhūdharāṇāmahaṃ nātho viśvanātha umāpatiḥ

ahaṃ pramitasaṃpattiraprameya dhanohyasau //
tucchaprābhṛta kastasmānnedānīmasya darśanam

kariṣyetha kariṣyāmi vyāvṛttyāgatya karhicit //
saṃpradhāryeti manasi sāyaṃ sa ca girīśvaraḥ

āhūya sarvānanugānpārvatīyānmahābalān //
ādiṣṭavānidaṃ vākyaṃ sarve yūyaṃ balādhikāḥ

kurvaṃtvekaṃ mamādeśaṃ yāvannodyati bhānumān //
tāvacchivālayaṃ caikaṃ vidadhatvatra satvaram

yasminkṛte kṛtārthaḥ syāmiha loke paratra ca //
samāgatyeha kāśyāṃ yaḥ kuryādekaṃ śivālayam

tena trailokyamakhilaṃ sālayaṃ kṛtameva hi //
tena dattāni dānāni mahāṃti vidhipūrvakam

suparvaṇi supātrāya sutātha śraddhayādhikam //
yena svavittamānena dharmopārjita vittataḥ

kṛtaṃ śaṃbhormahāsadma na taṃ padmā tyajetkvacit //
tapāṃsi tena taptāni śīrṇaparṇāśanānyapi

vārāṇasīṃ samāsādya yenākāri śivālayaḥ //
aśeṣāḥ suviśeṣāḍhyā iṣṭāṃstena mahāmakhāḥ

ānaṃdakānane yena devadevālayaḥ kṛtaḥ //
iti tasya samādeśaṃ samākarṇyānugāstataḥ /

cakrurdevālayaṃ śreṣṭhaṃ yāvadvyuṣṭā na yāminī //
tāvacchaileśvaraṃ liṃgaṃ śaileśena pratiṣṭhitam //
caṃdrakāṃtamaṇeścaṃcatkāṃtiścetitamaṃḍapam

alekhayatpraśastiṃ ca praśastākṣaramālinīm //
vyācakṣāṇāṃ nijāṃ sarvaṃ gotrebhyopyadhikonnatim

tato'ruṇodaye jāte snātvā paṃcanade hrade //
śailarājaḥ kālarājaṃ namaskṛtya samarcya ca

tatra rāśiṃ samutsṛjya paritastavarito yayau //
pārvatīyairanugataḥ sarvairapi nijālayam

tataḥ prātaḥ samālokya gaṇau huṃḍanamuṃḍano //
hṛṣṭau devālayaṃ ramyaṃ varaṇāyāstaṭe śubhe

adṛṣṭapūrvadevāya nivedayitumāgatau //
tau tu dṛṣṭvā mahādevamumādarśitadarpaṇam

praṇamya daṃḍavadbhūmau kṛtāṃjalipuṭau gaṇau //
kṛtābhyanujño bhrūkṣepādvijñaptimatha cakratuḥ

devadeva na jānīvaḥ kenaciddṛḍhabhaktinā //
atīva ramyaḥ prāsādo nirmito varaṇātaṭe

āsāyaṃ naikṣicāvābhyāṃ dṛṣṭodyaiva prage vibho//
gaṇoditamitīśāno niśamyāha girīṃdrajām

vijñātasarvavṛttāṃtaḥ sarvajñopyanabhijñavat //
acaleṃdrāgajeyāvastatprāsādavilokane

ityuktveśaḥ sagirijo niragātsagaṇo mune//
mahāsyaṃdanamāruhya prāsādaṃ draṣṭumutsukaḥ

athāluloke giriśaḥ prāsādaṃ varaṇātaṭe //
atīva ramyaracanaṃ yāminīmātranirmitam

syaṃdanādavaruhyātha garbhāgāramavīviśat //
dadarśa ca mahāliṃgaṃ caṃdrakāṃtaśilāmayam

dedīpyamānaṃ mahasā mokṣalakṣmyaṃkurākṛti //
dṛṣṭiprasādajananaṃ punarjananaśātanam

kenedaṃ sthāpitaṃ liṃgaṃ yāvajjijñāsatīśvaraḥ //
tāvaddarśa purataḥ praśastiṃ kartṛsūcikām//
vācayitveva ca manāṅmanasyeva manojahṛt //
uvāca devo diṣṭyeti prekṣasvātmapituḥ kṛtim

umā śrutyeti saṃhṛṣṭā kadaṃbakusumaśriyam //
ānaṃdāṃkuralakṣmīvadaṃgeṣu paribibhratī

tato vyajijñapaddevaṃ devī pādau praṇamya ca //
asmim̐lliṃgavare nātha tvayā stheyamaharniśam

asya liṃgasya ye bhaktā śaileśasya maheśituḥ //
tebhyastvaṃ mahatīmṛddhiṃ dāsyasīha paratra ca

tatheti deva uktvā tāṃ pārvatīṃ punarabravīt //
varaṇāyāṃ kṛtasnānaiḥ śaileśo yaiḥ samarcitaḥ

pitṝnsaṃtarpya ca mudā dattvā dānāni śaktitaḥ //
na teṣāṃ punarāvṛttiratra saṃsāravartmani

śailaiśvare mahāliṃge nityaṃ sthāsyāmyahaṃ śubhe //
pradāsyāmi parāṃ muktimetalliṃgārcake jane

śaileśvaraṃ ye drakṣyaṃti varaṇāyāḥ surodhasi //
teṣāṃ kāśyāṃ nivasatāṃ duḥkhaṃ nābhibhaviṣyati

umayāpi varo dattastatra liṃge ghaṭodbhava //
śaileśvarasya ye bhaktāste me putrā na saṃśayaḥ

skaṃda uvāva / //
iti śaileśvaraṃ liṃgaṃ kathitaṃ te mahāmune //
idānīṃ kathayiṣyāmi ratneśvarasamudbhavam

śrutvā śaileśa māhātmyaṃ śraddhayā parayā naraḥ //
pāpakaṃcukamutsṛjya śivalokamavāpnuyāt

. //
iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśākhaṃḍe uttarārdhe śaileśādi liṃganirṇayonāma ṣaṭṣaṣṭitamo'dhyāyaḥ